Sáni Mateo 22
22
Tempuchakueri uantantskua
(Lk 14.15-24)
1Jesusi ménteru uantantskua ma arhiaspti: 2“Auantarhu anapu irechekua, ireche méni jáxesti enka uáp'ani tempuchatani jámani k'uínchekua úntapka. 3Ka axaaspti jántspirichani eskaksï nipirinka ióarhip'entani, ka ima enkaksï uantap'anhantapka nóksï uékaspti nirani. 4Ménteru máteru játspirichani axaaspti ka arhiaspti: ‘Arhia je eska t'irekua jaiaraskia. Uákasï p'ukurakatechani uantikutarkorheaska, ka iámentu ampe jaiarastia, junkueksïa tempuchakuarhu.’ 5Ka ima enkaksï uantap'anhantapka ískuksï kurhach'aaspti, ma tarhekorheni niraspti, ka máteru imeri úkua ampe kámaspti, 6máteruksï jántspirichani jupikaaspti ka uántikuasptiksï. 7Irecha íni ampe mítetini, kánekua ikiaspti, ka axaaspti p'urhek'utichani ka uántikutarkorheaspti atap'itichani ka kurhupakuaspti. 8Ka jántspirichani arhiaspti: ‘Sési jimpo tempuchakuarhu iámentu ampe jaiarastia, ka ima enkaksï uantap'anhantaka nóksï nitatarhesti.’ 9Ni je uéramani ísï ka néni enkats'ï xáni kúmaaka, p'ímarhe je. 10Ka jántspirichaksï uéraspti ka p'ímarhesïremptiksï imani enkaksï kúmempka, ampakiti k'uiripuechani ka ístu no amparhatichani ka tempuchakuarhu no jantanhenhaxaptia.”
11“Enka irecha inchant'apka exeani imani enkaksï p'ímarhenhapka, exespti ma enka no ísï xukuparhatini jápka eska tempuchakuarhu na xukuparhanhantak'a, 12ka arhispti: ‘Pámpiri, ¿Nénari jimposï ísï xukuparhatini incha?’ Ka ima pínasku pakaraspti. 13Jiák'ani irecha arhiaspti jarhop'irichani: ‘Jóntuku je ka jók'u je ka páp'akantu peta je; jimeuati uekua ka enka sînichani kirisïmentinhantaaka.’ 14Jimpokaksï uánekua uantap'anhasïnka ka namuntkuksïsï erakunhantat'i.”
Jesusinksï ts'ék'ukuekasti
(Mk 12.13-17; Lk 20.20-26)
15Fariseuechaksï jima kéntikuspti ka uantontskorhesptiksï néna enkaksï úpirinka Jesusini ampe uantarani, ka imani jimpoksï k'amanharhirantani. 16Ka máru imecheri jurhenkorherichanksï erodiasïcheri jinkuni axaaspti, eskaksï Jesusini arhipirinka: “Jurhentpiri, míteskachi eskari kánekua tsitisïnka jurhimpekua ampe, ka eskari sési jimpo Diósïri xanharini jurhentpesïnka eska néka, ka ískuri kurhachpesïnka ampe enka xáni uantanhani jarhak'a, jimpokari t'u no k'uiripunisï sési pakarakuni jámka. 17Arhits'ïni, ¿Nári erankusïnki? ¿Sésekua jarhaski o no sésekua jarhaski Sésarini maiamuni?” 18Ka Jesusi mítetini ampe enkaksï nósesi ampe eratseni jápka, arhiaspti: “Ískuts'ï ísï uantasïnka, ¿Antits'ïnisï ts'ék'uni uék'i? 19Tumina taiakata máts'ï exera.”
Imaksï exeraspti ma enka ma jurhiatekua jimpo antanhak'a. 20Ka arhiaspti: “¿Nésï ixu jukanharhi, ka néri jakankurhikuasï ixu karanharhikukata jaki?” 21Ka imaksï arhispti eska Sésaririspka. Ka Jesusi arhiaspti: “Sésarini íntsku je ampe enka Sésaririka, ka Diósïni ampe enka Diósïrika.” 22Íni ampeksï kurharini ískuksï pakareraspti ka kéntikukusptiksï.
Jesusi tsíntskueri ampe arhip'esti
(Mk 12.18-27; Lk 20.27-40)
23Imani jurhiatekuaksï Jesusini saduseuecha antarheraspti, enkaksï uantak'a eskaksï uarhiricha no tsíntasïnka, ka kurhamarhesptiksï: 24“Jurhentpiri, Moisesi uantaspti: ‘Enka acheti ma uarhiska ka nóma uáp'ani jurak'uni, erachi jémpa uarhitini tempuntaati, ka erachi jémpa k'érini uáp'echani jurak'ukuauati.’ 25Jarhasptiksï méni ísï ixu iúmu tsimani erachicha ka enka urhetipka, tempuchaspti ka nóma uáp'ani kánkorhetini uarhispti, ka erachi jémpa enka chúxapempka uarhiti jémpani tempuntaspti. 26Ka mák'ueni úkorhenchaspti ima enka k'érini chúxapempka, ka máteru enkaksï chúxapempka, iámentuksï mák'ueni jámaspti, sapichu jinkunksï iúmu tsimani erachichespti. 27Ka uarhitit'u uarhisptia. 28Tsíntskuarhu, ¿Náki íni iúmu tsimani erachicheri tempeua? Nóchkaksï iámentuecha tempuspi anti” 29Ka Jesusi mókukuantaaspti: “Diósïri karakatantsï támu ísï jánhaskatixaka ka Diósïri uinhapekuantsï no kurhankusïnka, 30jimpoka jiáni enka tsínhantaaka nóteru tempuchanhaatia, Diósïri ánjelini auantarhu anapueni járhanhantaati. 31Ka uarhiricheri tsíntskua ampe, ¿Anti nóts'ï méni arhintaski ampe enka Diósï uantaka? 32‘Jíska Abraniri Diósï, ka Isakiri Diósï, ka Jakobueri’ Ima no uarhiricheri Diósïsti, tsípiticherisï Diósïti.” 33Ísï kurhanhatini, ísku pakareranhasïrempti imeri arhits'ïkperakuechani kurhanhatini.
Sánteru k'éri juramukua
(Mk 12.28-34)
34Fariseuechaksï tánkorhent'aspti enkaksï mítepka eska Jesusi pínamataraaspka saduseuechani. 35Ka ma enka imecha jinkuni juramukua jurhentpiripka, Jesusini ts'ék'ukuekani ísï kurhamarhespti: 36“Jurhentpiri, ¿Náki arhistatsperakua sánteru k'ériski juramukuarhu?” 37Ka Jesusi arhispti: “Chéti Acha Diósïni mintsita jinkuni xénhcha ka iámu chéti tsípekua jinkuni. 38I arhistatsperakua urhetisti ka sánteru jukaparhasti. 39Ka enka chúnkumak'a sáno mák'ueni jáxesti: ‘Xénhchpeakari ísï eskari t'u na xénhchakorhek'a.’ 40Íni tsimani arhistatsperakuecharhuksï Diósïri uantaricha ka Diósïri juramukua p'erantakorhesïnti.”
¿Krístu ne uáp'eski?
(Mk 12.35-37; Lk 20.41-44)
41Enkaksï fariseuecha útasï tánkorhetini jápka, Jesusi kurhamarheaspti: 42“¿Krístuerits'ï ampe sáni eratsesïnki? ¿Ne uáp'eski?” Ka arhisptiksï: “Dabi uáp'esti.” 43Ka Jesusi arhiantaaspti: “¿Néna jimposï Dabi Espirituni jimpo Tata arhipki? Jiáni enka uantaka:
44‘Acha Diósï jucheti, Tatani arhisti:
Jurhik'antarini uaxakache,
enkakini jamperi chéti ikiatspirichani
jantantukuarhu péracheaska’
45Enka Dabit'u Acha arhik'a, ¿Néna uáp'eua?” 46Ka nónema úsïrempti mókukuntani: Nít'uteru nema tekaueni jiáni uératini ampe kurhamarheni.
Currently Selected:
Sáni Mateo 22: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
