Sáni Mateo 21

Jesusi Jerusaleni inchaakuntasti

(Mk 11.1-11; Lk 19.28-40; Jn 12.12-19)

1Enkaksï Jerusaleni antaparhakuerani jápka, Betfageksï niáraspti ka Olibusï juátarhuksï anhaxurhispti, ka Jesusi jima uératini tsimani jurhenkorheri jémpechani axaaspti, 2ka arhiaspti: “Ni je amani ireta sapichurhu enka eraakorheni jaka, ka iretarhu inchaakutintsï, ch'anchaki kutsïni ma, ch'anchaki sapichu ma jinkuni exent'aaka, jotakataksï jarhani, kuerataa je ka juáchets'ïni je. 3Ka enkaksïni nema ampe arhiaka, cháts'ï arhiaka: ‘Tata uétarhenchaaxati ka sóntkukini juánkucheauati.’ ” 4I ampe úkorhesti enka Diósïri uantari uantaka:

5“Sióni uáp'echani arhia je:

Chéti Irecha junkuaxati,

kaxumpekua jinkuni ka ch'anchakini ma jatarini,

ch'anchaki sapichuni ma jatarini”

6Jesusiri jurhenkorherichaksï niraspti ka úsptiksï ampe enkaksï juramumenhapka. 7Pásptiksï ch'anchaki kutsïni ka ch'anchaki sapichuni ka imecheri sununtaksï tatsuparhakuspti ka Jesusi jataspti. 8Uánekuaksï xanharu sununta tatsuntskakusïrempti, ka máteruksï pímu ch'auaxkusïrempti ka xanharuksï tatsuntskasïrempti. 9Ka ima enkaksï chúxapani jápka ka urhekupanksï jarhani uinhachasïremptiksï:

“¡Dabi Uáp'a, kuáp'ets'ïni!

¡Uch'akurakateskari t'u enkari Acha jimpo jurhani jaka!

¡K'éri Acha Diósï, kuáp'ets'ïni!”

10Ka enka Jesusi Jerusaleni inchaakupka, iretarhu méntku mámaru ampe uantanhasïrempti: “¿Néski i?” 11Ka enkaksï Jesusi jinkuni nirani jápka uantasïremptiksï: “Jesusisti, Diósïri uantari Nasareti anapu enka Galilea jaka.”

Jesusi tiósïo ampe atarantstichani petant'a'asti

(Mk 11.15-19; Lk 19.45-48; Jn 2.13-22)

12Jesusi tiósïo inchaspti ka ampe atarantstichani ka ampe piárichani petant'a'aspti, ka tumina mót'akutspiricheri kép'atarakua ampe menonhakuaspti, ka ístu palomasï atarantstichani kép'atarakuani k'uanikukuaspti, 13ka arhiaspti: “Karaka jarhasti:

Jucheti k'umanchekua kómarhip'eratarakuesti

ka cháts'ï sïpak'urhecheri irekua úntaskia.”

14Ka tiósïo Jesusini pátenharhichaksï ka renket'echaksï antarheraspti ka ima ampakerantaaspti. 15Ka tátecheri urhets'ïkurichaksï ka juramukua jurhentpirichaksï ikiaspti exerini xáni k'éri ampe enka Jesusi úempka, ka ístu tumpi sapirhatichantuksï ikiakuaspti enkaksï tiósïo uinhachani jápka: “¡Kuáp'ets'ïni Dabi Uáp'a!” 16Ka Jesusinksï arhispti: “¿Kurhach'aaxakiri ampe enkaksï uantani jaka?” Ka Jesusi arhiantaaspti: “Jo. ¿Anti nóts'ï méni arhintaski?

‘Sapicha enkaksï etsukua arhani jakateru,

ampoantastiksïni pirecheni’ ”

17Ka kéntikukuaspti ka iretarhu uéakuntaspti ka Betania niraspti ka jima pakaraspti.

Jesusi jígusïni xukach'asti

(Mk 11.12-14,20-26)

18Xarhentku, Jerusaleni k'uanhatsentani jámani, Jesusi karhimaxapti. 19Ka xanhari jimpo jígusïri anhatapuni ma exespti, ka antarheraspti ka nómpema erarhutaspti, chkúrhichantku erarhutaaspti ka anhatapuni arhispti: “¡Méntku ásteru méni amanhech'akua juka!” Ka ima jígusï jimak'u k'arhispti. 20Íni ampe exerini, jurhenkorheri jémpechaksï uantasïrempti: “¿Néna jimposï jígusï xáni sóntku k'arhipa?” 21Ka Jesusi arhiantaaspti: “Sési jimpoksïni arhixaka, ekats'ï mintsikaska ka nóts'ï tsimantsimaneani, jígusïntsï no xántku ampe úkupirinka, úakats'ï jamperi anteni juátani arhini: ‘¡Mótse ka japuntarhu niára!’ Arhini, ka ísï úkorheati. 22Ka intsïnhak'ats'ï ampe enkats'ï kurhak'orheaka kómarhip'eparini ka mintsikaparini.”

Jesusi jarhamekua jatsisti

(Mk 11.12-14,20-26)

23Enka Jesusi tiósïo niárapka ka enka jurhentpeni jápka, tátecheri urhets'ïkurichaksï ka achamasï iretarhu anapuechaksï kurhamarhespti: “¿Náki juramukua jimpori íni ampe úxaki? ¿Nékini sésekua íntskuski?” 24Ka Jesusi arhiantaaspti: “Jít'uksïni ma ampe kurhamarheaka, ka ekats'ïni mókucheska jít'uksïni arhiaka náki juramukua jimposïni íni ampe úni jaki. 25¿Juánueri itsï atats'ïkua nani anapueski? ¿Auantarhu anapueski o parhakpeni anapueski?” Imaksï jimak'u mámaru ampe arhip'eraspti ka uantasptiksï: “Ekaksï arhiska eska auantarhu anapueska, intets'ïni arhiati: ‘¿Ka antits'ïsï no jakak'ukupkia?’ 26Ka chékorhesti arhini eska parhakpeni anapueska, jimpoka Juánu Diósïri uantari exenhasïnka.” 27Tátsekuaksï Jesusini mókukuntaspti: “Nóchi míteska.” Ka Jesusit'u arhiaspti: “Jít'uksïni no arhiaka néri juramukua jimposïni íni ampe úni jaki.”

Tsimani tumpicheri uantantskua

28Ka Jesusi kurhamarheaspti:

“¿Náts'ï erankuntasïnki? Acheti ma tsimani uáp'echani káasïrempti ka k'érini arhispti: ‘Jucheti uátsï, ni sáni jucheti úbasïrhu ánchekorheni.’ 29Ka ima mókukorhespti: ‘¡No niuaka!’ Ka xásï miántaspti ka niraspti. 30Ka sapichuntu mák'ueni arhispti ka ima arhintaspti: ‘Ia táte, niuakia.’ Ka no niraspti. 31¿Náki úski ampe enka tátjempa uékani jápka?” Ka imaksï arhispti eska k'éri. Ka Jesusi arhiaspti: “Sési jimpoksïni arhixaka, eskaksïni urhechepaaka inchani Diósïri auantarhu anapu irechekuarhu; tumina tánaticha ka uarhiti ísku jánticha. 32Jimpokaksïni Juánu janocheska jurhentakuekanksïni eskamentu Diósï na uék'a, ka nóts'ï jakak'ukuska, ka tumina tánaticha ka uarhiti ísku jántichaksï k'óru jakak'ukusti. Ka cha, nák'irukats'ï exeka nóts'ï móantaska ka nóts'ï úska jakak'ukuni.”

Tarheri no amparhaticheri uantantskua

(Mk 12.1-12; Lk 20.9-19)

33“Máteru uantantskua kurha je: Jarhaspti acheti ma enka úbasï jatsikupka, ka sési uatsotaspti ka kuáritarakua iótati ma úspti, ka tátsekua echerini tarherichani máru kuánetaaspti ka iauani ísï niraspti. 34Ka p'ikuntskuarhu, jántspiri jémpechani máru axakuaspti tarherichani, enkaksï p'ikuntskatani pákuntapirinka. 35Ka tarherichaksï nósesi káaspti, ma echakuanksï ataspti ka máterunksï uántikuni ka máterunksï tsakapkueraspti. 36Ka ménteru, ima enka echerini kánkorhempka, máteru sánteru uánekua jántspichani axaaspti, ka imechantuksï mák'ueni káaspti. 37Ka tátsekua uáp'ani axaspti ísï eratseparini: Intentsïni janhanharhicheati. 38Ka tarherichaksï uáp'ani exerini arhip'eraspti: I jurak'umenhaati echerini, ju je uántikuni ka interi echerinchi jucha pakataaka. 39Ka jupikasptiksï ka petaatant'a'nksï ka uántikusptiksï. 40¿Ampe úkuaua acheti enka úbasï jatsika jiák'ani enka niántaaka?” 41Ka arhisptiksï: “No p'amok'uauati ka no amparhati k'uiripuechani uántikuauati, ka echeri úbasï jatsikatani máteru tarherichani kuánetauati enkaksï p'ikuntskuarhu antakua íntskuntaaka.”

42Jesusi kurhamarheaspti: “¿Anti nóts'ï méni arhintaski karakatani enka arhik'a?

‘Tsakapuni,

enkaksï k'umanchekua úricha

no jaiapanhentaka,

iásï ts'umpintikuestiia.

Achasï íni ampe úti

ka ískuchi pakareratixaka exeni.’”

43“Ísï jimpoksïnisï arhini jaka, eskats'ï cha Diósïri auantarhu anapu irechekuani euanhantaaka, ka imaksï intsïnhaati enkaksï sési ampe úk'a. 44Ka ima enka tsakapurhu kuarhatseaka, únturhikorheatiksï. Ka eka i tsakapu nemani jatach'akuska puchanturhiati.”

45Tátecheri urhets'ïkuricha ka fariseuecha uantantskuechani kurharini, jánhaskasptiksï eskaksï imasï arhinhani jápka. 46Ka uékasptiksï Jesuni jupikani, ka nóksï úspti jimpokaksï iretani chérhespka jimpokaksï Jesusini Diósïri uantarini exesïrempka.

Currently Selected:

Sáni Mateo 21: DKPJ

Highlight

Copy