Sáni Lúkasï 4
4
Nóampakiti Jesusini ts'ék'usti
(Mt 4.1-11; Mk 1.12-13)
1Jesusi Espiritu Sántuni iámu incharhekorhetini, Jordani iurhekuarhu uératini k'uanhatsentaspti. Ka Espiritu jimesï páspti enka nónema irekaka, 2ka tsimani ekuatse jurhiatekua jima jarhaspti, ka Nóampakiti ts'ék'uspti. Imani jurhiatekuechani Jesusi nómpema arhaspti, ka k'arhimaxaptia. 3Nóampakiti jimak'ani arhispti:
–Ekari sési jimpo Diósï Uáp'eka, juramuku íni tsakapuni eska kurhinta úkorhent'aaka.
4Jesusi arhispti:
–Karakata arhisïnti: “No kurhinta atintku irekanhaati.”
5Ka tátsekua nóampakiti iótakuarhu uératini, sóntku iámentu parhakpeni anapu iretechani exeraaspti, 6ka arhispti:
–Íntskuakakini iámu juramukua, ka inte k'érati iretecheri k'érikua. Jimpokani ji intsïnhaska, ka ji íntskuaka néni enkani ji uékaaka. 7Ekarini tinkuixurhicheska, iámu ampe chétiuati.
8Ka Jesusi arhispti:
–“Karakata jarhasti: Chéti Acha Diósïniri k'éri ampe arhiaka ka imantku marhuaku.”
9Tátsekua Nóampakiti Jesusini Jerusaleni páspti, ka k'éri tióstarhu, sánteru iótakuarhu karhataspti ka arhini:
–Ekari sési jimpo Diósï Uáp'eka, ixu uératini k'uanikurhi; 10jimpoka karakata ísï arhisïnka:
Diósï juramuati eskaksïni imeri ánjelicha
kúach'akuaka ka exenksïni jarhani.
11Nómari tsakapurhu téksarhutaaka,
jimpokaksïni jupit'atini páaka.
12Ka Jesusi arhispti:
–Ístu karakata arhisïnti: “Ásï jama chéti Acha Diósïni ts'ék'uni.”
13Enka Nóampakiti nóteru jánhaskapka nénateru Jesusini ts'ék'uni, sónti kéntikukuspti.
III. JESUSI GALILEA NIRASTI
(4.14—9.50)
Jesusi Galilea uénasti ánchekorheni
(Mt 4.12-17; Mk 1.14-15)
14Jesusi Galilea k'uanhatsentaspti, Espiritu Diósïri uinhapekuani iámu incharhekorhetini, ka iápuru jimesï imeri ampe uantanhasïrempti. 15Ka ima iretecharhu k'umanchekua tánkorhentskuecharhu jurhentpesïrempti, ka iámentuechaksï k'éri exesïrempti.
Jesusi Nasareti jarhasti
(Mt 13.53-58; Mk 6.1-6)
16Jesusi Nasareti niraspti, jima enka ima k'uiripepka. Ka eska na p'intekua jatsipka, sábadu k'umanchekua tánkorhentskuarhu inchaspti, ka arhintani jauaraspti. 17Diósïri uantari Isaiasiri karakata intsïnhaspti eska arhintapirinka. Ka enka na karakatani p'irakupka, terunharhispti jima enka ísï karakata jaka:
18“Acheri Espiriturini incharhetixati,
jimpokarini míntaska eskani no
jatsikorherichani ampakiti aiankperakua pákuauaka;
axastirini ónhakatechani aiankuani eskaksï sésikua
intsïnhaaka irentani, ka eskani pátenharhichani éskatarantauaka;
ka kuáp'eani imechani enkaksï jatach'akukorheni jaka;
19ka uantant'a'ni eska Acheri sési jásï uéxurhini janoskia.”
20Tátsekua Jesusi karakatani irhintaspti, k'umanchekua tánkorhentskuarhu anapu jarhop'irini íntskuntaspti ka uaxakantaspti. Iámentu enka xáni jima janhapka jatsikueratixaptiksï exeni. 21Ka ima ísï uénaspti uantani:
–Inte ampe, enkats'ï k'amaraka kurhani iásï úkorhestia.
22Iámentuechaksï Jesusini sési uantatsesïrempti ka ískuksï pakareratixapti enka xáni sési jásï ampe uantempka. Ka kurhamarhperasïremptiksï:
–¿Anti no ísï Jose uáp'e?
23Jesusi arhiaspti:
–Ísïmentuts'ïni arhiakia jamperi: “Tsinap'iri, t'úchu urheta tsinakorhe.” Kát'uts'ïni arhiaka: “Ampe enkani jucha míteka eskari Kafarnaumi úska, ixut'u u chéti iretarhu.”
24Ka chúnkutaspti uantani:
–Ísïsti eska nóma Diósïri uantari imeri iretarhu sési eronhantasïnka. 25Ísïsptimentu, Israeliksï uánekua uarhiti tsînticha jarhaspti, imani jurhiatekuechani jimpo enka Diósïri uantari Eliasï irekani jápka, enka tanimu uéxurhini ka teruk'ani no janipka ka enka kánekua k'arhimakua japupka. 26K'óru, Eliasï nóma tsînti Israeli anapu jinkuni axanhaspti, ka Sarepta anapu ma jinkuni axanhaspti, Sidoni no iauani jarharetini. 27Ka ístuksï Israeli uánekua xúta jukarhekorhericha irekaxapti, jimak'ani isï enka Diósïri uantari Eliseo jima irekani jápka, enka úpka, Naamanik'u ampakeranhastaspti, ima enka Síria anapuepka.
28Íni ampeksï kurharini, iámentu enkaksï k'umanchekua tánkorhentskuarhu jápka kánekuaksï ikiaspti. 29Ikiatku anhaxurhinhaspti ka Jesusinksï petaataspti, ka jimaksï páspti enka sánteru iótarhukurhapka, imani juátarhu enka imecheri ireta jaka, ka jima uératinksï uekopani uéksïrempti. 30K'óru Jesusi teruk'ani ísï nitamakuaspti ka jarhareantaaspti.
Acheti ma enka nósesijasï espiritu incharhetini jápka
(Mk 1.21-28)
31Jesusi Kafarnaumi kétsemaspti, imani ireta enka Galilea anapueka, ka sábaduechani jurhentpesïrempti. 32Ka ísku pakareranhasïrempti exeparini eska ima na jurhentpempka, jimpoka jarhamekua jinkuni uantasïrempka.
33K'umanchekua tánkorhentskuarhu jarhaspti acheti ma enka nósesijasï espiritu incharhetini jápka, ka ima uinhachaspti:
34–¡Jurak'uts'ïniata! ¿Amperi uéksïni juchantsïni jinkuni, Jesusi Nasareti anapu? ¿Jurhaskits'ïni k'amak'uni? Jíkini míteska, ka míteska eskari Diósï Uáp'a pímpinhaxetiska.
35Jesusi nóampakitini ísï arhiparini xukach'aspti:
¡Pínasku ja ka uérhentsï inteni!
Jimak'ani nóampakiti achetini jima teruk'ani k'uanintskaspti iámentuechani japarini, uérhentaspti ka nómpema nósesi úkuspti. 36Ka iámentuechaksï chérakorhespti, ka arhip'erasïremptiksï:
–¿Ampe jásï uantakueski inte? Enka juramukua ka uinhapekua jinkuni nósesi járhati espirituechani juramukuak'a, ¡Ka nóampakitichaksï úsïnti uérhpentani!
37Ka jimesï Jesusiri ampeterku uantanhaxaptia.
Jesusi Simoniri tarhampirini ampakerantasti
(Mt 8.14-15; Mk 1.29-31)
38Tátsekua Jesusi k'umanchekua tánkorhentskuarhu uéntatini Simonio inchaspti. Ka jima Simoniri tarhampiri kánekua tinharaxapti, ka kómarhisptiksï Jesusini eska ampakerantapirinka. 39Jesusi antarheraspti ka k'utitsetini tinharakuani xukaspti, ka tinharakua jurak'uspti. Ka sóntku jauaraspti, ka marhuakuaxaptia.
Jesusi uánekua p'amenchatichani ampakerantaasti
(Mt 8.16-17; Mk 1.32-34)
40Enka na jurhiata ínchats'ïkupkia, iámentu enkaksï xáni mámaru járhati p'amenchati jatsiapka, Jesusinksï pákuaspti; ka mántani arhispti p'áts'ïkuani, ka ampakerantaaspti. 41Uánekua ima p'amenchatichat'uksï nóampakitichani uérhekorhent'aspti, ísïksï uinhachaparini:
–¡T'úri Diósï uáp'eska!
Ka Jesusi nóampakitichani xukaasïrempti, ka no jiáretaasïrempti eskaksï uantapirinka, jimpokaksï nóampakiticha mítespka eska ima Krístuespka.
Jesusi k'umanchekua tánkorhekuarhuecharhu uantant'a'sti
(Mk 1.35-39)
42Enka na erantepkia, Jesusi iretarhu uéakuspti, ka jima niraspti enka nónema jámempka. K'óru uáni k'uiripu niraspti jirinhantani. Nóksï jiánkuntasïrempti, 43ka Jesusi arhiasïrempti:
–Uétarhesïnti eskani ampakiti aiankperakuani; enka Diósïri irechekueka máteru iretechantuni aiankuauaka, jimpokani inteni niátanisïni axanhaka.
44Jesusi uantakuani judiouecheri k'umanchekua tánkorhentskuecharhu aiankpepasïrempti.
Currently Selected:
Sáni Lúkasï 4: DKPJ
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
