Sáni Lúkasï 5

Uánekua kurucha p'itamanhasti

(Mt 4.18-22; Mk 1.16-20)

1Ma xanhari ísï úkorhespti enka Jesusi Genesareti anapu japuntarhu uanamukuni jámani jápka, ísï p'ikuarherasïrempti eskaksï pucharaxapka enka xáni uáni uékanhempka Diósïri aiankperakuani kurhanhani. 2Ka japuntarhu uanamukutini tsimani icharhuta teparichani exeaspti. Ka uarhorichaksï kétsespti cheremakuechani uaromantaani. 3Ka Jesusi Simoniri icharhuta teparirhu jataspti, ka kómarhispti eska sáni inchamapirinka. Tátsekua teparirhu uaxarhukuspti ka jima uératini uénaspti jurhentpeni. 4Enka na k'amarapka uantani, Simonini arhispti:

–Inchama sánteru teparini ka cheremakuechani jima k'uanimaa je uarhuni.

5Ka Simoni arhispti:

–Jurhentpiri, erantskutakuskachi uarhoni ka nómachi p'itamaska; ka jimpoka t'u uantasïnka, ménteruchi k'uanimaaka.

6Enkaksï na ménteru k'uanimapka, uánekuaksï kurucha p'ímaspti, tsapakurhixaptiksïa cheremakuecha enkaksï xáni uáni p'itamapka. 7Jimak'anksï ník'urhakuaspti máteruechani enkaksï máteru teparirhu jámani jápka eskaksï nipirinka jarhuataani p'ímantani. Nirasptiksï jarhuataani ka tsimanksï teparichani sési uiniraaspti ka uekamexaptiksïa jamperi xáni uáni p'itamatini. 8Simoni Pédru ísï exeparini Jesusini tinkuixurhikuspti ka arhini:

–¡Acha, jarharentsïrini jimpokani ji k'amanharhintstiska!

9Simoni ka iámentuksï chérakorhetixapti xáni uánekua kurucha p'itamaatini. 10Santiagu ka Juánu, Sebedeo uáp'echat'uksï chéxapti, ima enkaksï Simoni jinkuni jámani jápka. Ka Jesusi Simonini arhispti:

–Ásï che, iásï uératiniri k'uiripu tánatiuaka.

11Jimak'anksï icharhutechani uémantaaspti; jurarkusptiksï iámentu ampe ka chúxapasptiksï.

Jesusi xúta jukarini ma ampakerantasti

(Mt 8.1-4; Mk 1.40-45)

12Ma jurhiatekua, enka Jesusi ireta ma jimpo jámani jápka, acheti xútku ma jima jarhaspti; ka enka Jesusini exepka, kápatseraspti ka kómarhispti:

–Acha, enkari uékaaka, úakarini ampakerantani.

13Ka Jesusi p'árhespti uantaparini:

–Uékasïnka. ¡Ampakentsïa!

P'amenchati sóntku xúta jupinapaspti. 14Ka Jesusi juramukuspti arhini:

–Ásï nemani aianku; táta jinkuntku ni, tátechaksï míte eskari ampakentaskia, ka pa kéts'ïtakua eskamentu Moisesi na juramukata jurak'uka.

15Enka úpka, sánteru mítekorhepaxapti, ka uánekua tánkorhenhantasïrempti kurhach'ani ka eska ampakerantaapirinka. 16K'óru Jesusi kéntikusïrempti uantamukukorheni jimesï enka nónema jámempka.

Jesusi púakuntasti ka ampakerantasti achetini enka no úk'a xanharani

(Mt 9.1-8; Mk 2.1-12)

17Ma xanhari enka Jesusi jurhentpeni jápka, jimaksï uaxakaspti máru fariseuecha ka máru juramukua jurhentpiricha enkaksï Galilea ka Judea ka Jerusaleni uératini jutipka. Ka Acheri uinhapekua Jesusi jinkuni xarharaxapti enka p'amenchatichani ampakerantauempka. 18Jimak'anksï niáraspti máru enkaksï jatatsekua ma jimpo pérapka achetini ma enka no úempka xanharani. Ka uéksïremptiksï incharani Jesusini pérakuni, 19ka nóksï úsïrempti incharani, jimpoka uánekua janhaspka; ísï jimpoksïsï k'umanchekuani jini p'enots'ïtapti ka p'amenchatinksï jimesï kénhaspti jatatsekua jatsiakutini Jesusini pérakuni. 20Ka eka Jesusi exepka na enkaksï xáni mintsikempka, p'amenchatini arhispti:

–P'íchpiri, k'amanharhintskuechaniri púamenhantaskia.

21Ka jimak'anksï juramukua jurhentpiricha ka fariseuecha uénaspti eratseni: “¿Néski i enka tekak'a Diósïni táp'anharhikuni? ¿Anti no Diósïk'usï úk'i k'amanharhintskuechani púatspentani?”

22K'óru Jesusi míteparini ampe enkaksï eratseni jápka, kurhamarheaspti:

–¿Antits'ïsï ísï eratsek'i? 23¿Ampe sánteru no úkua jukaski, arhini: “K'amanharhintskuechaniri púamenhantaskia”, o arhini: “Jauara ka xanhara”? 24Ka nirasïnkaksïni mítetarani eska íni parhakpeni acheti Uáp'a juramukua jatsiska k'amanharhintskuechani púatspeantaani.

Jimak'ani p'amenchatini arhispti:

–Arhixakakini, jauara ka k'arhantani chéti jatatsekuani ka ni níntani.

25Sóntkusontku, ima enka no úempka xanharani jauaraspti, ka iámentuechaksï exexapti, k'arhantaspti jatatsekuani enka jatatsetini jápka ka níntaspti Diósïni k'éri ampe arhipantani. 26Ka iámentuechaksï ísku pakareraspti ka Diósïnksï k'éri ampe arhispti, ka iámu chéparinksï uantaspti:

–Iásïchi kánekua k'éri ka sési jásï ampe exeska.

Jesusi Lebini ióarhisti

(Mt 9.9-13; Mk 2.13-17)

27Ka tátsekua Jesusi uéraspti ka tumina Roma axakua tánatini ma exespti enka Lebi arhinhempka, ka jima uaxakatixapti enka tumina tánempka. Ka Jesusi arhispti:

–Chúxapurini.

28Jimak'ani Lebi jauaraspti, ka iámentu ampe jurak'uspti ka Jesusini chúxapaspti.

29Ísï tátsekua Lebi chénjempo k'éri ma jarhop'ekua jatsispti; ka uánekua máteru tumina tánaticha tánkorhenhaspti, ka márkuksï uaxakatixapti. 30Ka fariseouechaksï juramukua jurhentpiricha jinkuni uénaspti Jesusiri jurhenkorherichani arhinhchaani, arhiaparini:

–¿Antits'ïsï tumina tánaticha ka k'amanharhintsticha jinkuni t'ireni ka kauini jaki?

31Ka Jesusi arhiaspti:

–Imaksï tsinap'irini no uétarhenchasïnti enkaksï no p'amenchani jaka, enkaksï sési jámani jaka; tsinap'irinksï p'amenchatichasï uétarhenchat'i. 32K'amanharhintstichanisïni juka tánantaani, eskaksï Diósïni antarhentaaka; no imechani enkaksï sési jaka.

Kurhamarhperakua k'arhinta jakueri

(Mt 9.14-17; Mk 2.18-22)

33Ka Jesusinksï jimak'u arhispti:

–Juánueri jurhenkorhericha ka fariseuecheri jurhenkorherichat'uksï méntkuksï k'arhinta jarhasïnti ka méntkuksï uantamukukorheni jarhasïnti, ka chéti jurhenkorherichaksï méntku t'ireni ka kauini jarhasïnti.

34Ka Jesusi arhiaspti:

–¿Anti úsïntsï cha k'arhinta jatsiani tempucheri pámpetpirichani, enka tempucha imecha jinkuni jauaka? 35K'óru niáraati jurhiata enkaksï tempuchani kéntitaaka; ka enka janoaka ima jurhiatekua, jimak'ani k'óruksï k'arhinta jauati.

36Arini terukutarantskua arhiaspti:

–Nónema takusï jimpanhe, takusï tamapu jimpo maiarasïnti; jimpoka takusï jimpanhe ísku tsîp'eaka; kát'u, jimpanhe no kasïpeati tamapu jinkuni. 37Ka nót'u kauikua jimpanhe sïkuiri úrakatarhu jatsiranhasïnti, jimpoka úberi itsïrhukua jimpanhe sïkuirini tsapakusïnka, ka kauikua tsînchesïnti, ka sïkuirit'u ampentarhekorheni. 38Jimposï úberi itsïrhukua sïkuiri jimpanherhu jatsirakueti. 39Ka nónema jarhasti enka kauikua sési xarhiperakatani ts'émutini, tátsekua auaka no iámu xarhiperakatani, jimpoka uantasïnka: “Sési xarhiperakata sánteru áspesti.”

Currently Selected:

Sáni Lúkasï 5: DKPJ

Highlight

Copy

Compare