Sáni Lúkasï 3

II. AMPANTSKAKUA ENKA JESUSI UÉNAKA AMPE NIÁTANI

(3.1—4.13)

1. Juánu Itsï atats'ïkpiri k'arhintekuarhu

(Mt 3.1-12; Mk 1.1-8; Jn 1.19-28)

1Enka Tiberio témpeni iúmu uéxurhini Roma juramuni jápkia, ka enka Pónsio Pilatu Judea juramuni jápka, Erodesi Galilea juramuxapti, Filipu Iturea ka Trakonitet'u juramuxapti, ka Abilene Lisania juramuxapti. Erodesi ka Filipu erachisptiksï. 2Anasi ka Kaifasiksï k'éri tátechespti. Jimak'ani isï, Sakariasï uáp'a Juánuni Diósïri uantakua niárakuspti, enka jimesï jámani jápka enka nónema irekaka. 3Ka Juánu iápuru iurhekua Jordanirhu uanamukuni isï jámaspti, arhits'ïkpeparini eska itsï atats'ïnhapirinka ka eskaksï Diósïni antarhentapirinka, ka eska ísï, Diósï púakuantaapirinka. 4I ampe ísï úkorhesti eska Diósïri uantari Isaiasi na karaka:

“Nema uinhachaxati jimesï enka nónema irekaka:

‘Achani xanhari ampatskakuntsï je;

Jurhimpentu ma xanhari mítaku je.

5Iámentu jauantekuechaksï uininhanhantaati,

ka iámentu juáta ka k'úmstechaksï p'arhikua játs'ïtanhantaati,

xanharicha enkaksï k'untsïnteka jurhimpentskaranhantaatiksï,

ka nani enka penhenteka p'arhikjantskanhantaati.

6Ma parhakpeni exeati p'ímutantskua enka Diósï axani jaka.’ ”

7Enka uánekua ninhempka eska Juánu itsï atats'ïkuapirinka, ima ísï arhiasïrempti: “¡Akuitseni járhaticha! ¿Chánksïni ne arhiski eskats'ï úaka ikimperatani sïpakorhekuni enka janoni jaka? 8Jánkua jimpo xarhata je eskats'ï sési jimpo chári irekuani jurhimperantaskia, ásï uéna je uantani: ‘¡Jucha Abraniri sïrukueska!’ Jimpokaksïni sési jimposï arhik'a eska Diósï úsïnka arini tsakapuechani jamperi Abraniri sïrukua úantaani. 9Ka támu, ch'aparakua uarhomukuntskakata jarhastia enka p'ukurichani sïrankua jinkuni p'itaskuak'a. Náki uék'i ma anhatapu enka nómpema marhuak'a, ch'apanhasïnti ka chpírirhu k'uanip'anhasïnti.”

10Jimak'anksï Juánuni kurhamarhespti:

–¿Ka jucha néna jámaia?

11Ka Juánu ísï arhiaspti:

–Ne enka tsimani xukuparhakua jatsika, íntskue ma imani enka nóma jatsika; ka ne enka t'irekua jatsikorheka, imani jinkuni marhuate enka nómpema jinkuni t'ireni jaka.

12Ístuksï máru tumina tánaticha antarheraspti itsï atats'ïkuekani, ka Juánunksï kurhamarhespti:

–Jurhentpiri, ¿Juchari jimpo ampe úkueski?

13Ka Juánu arhiaspti:

–Ásï nitamama je jukari maiampetarpeni eska xántku juramukata jaka.

14Ístuksï máru p'urhek'uticha kurhamarhespti:

–¿Ka anti jucha ampe uétarhenchasïnki úni?

Juánu arhiaspti:

–Ásï nemani ampe ma chéraparini euakorhe je ka nít'u ísku jatini nemani k'uaninharhitant'a'ni ampe ma enka no úka; ka jaiapanhentsï je eskats'ï xáni maiamunhak'a.

15Ísï jánhaspti kánekua eroeronharhinhani ka kurhamarhekorhenhasïrempti: “¿Anti Juánu Krístueia?” 16Ka Juánu iámentu arhiaspti: “Sési jimpo jíksïni itsï jimpok'u itsï atats'ïkuxaka; k'óru jurhaxati ma enkaksïni Espiritu Sántu ka chpíri jimpo pímpinhak'unt'aaka. Ima jínteni jinkuni sánteru k'éri ampesti, xáni k'éristi enkani jamperi no nitatarheka imeri kuarhachichani kuerantukuani. 17Kátakutarakua jupikapuxatia, ka tríjuni kátakuati, ka pájani jarharetaati. Tríjuni patsakorheati, ka pájani kurhint'aati chpírirhu enka nómeni póp'eaka.”

18Ísï jámaparini ka máteru uánekua ampe jimpo arhistatspeparini; Juánu ampakiti aiankperakuani aiankpesïrempti. 19Juramuti Erodesintu xukaspti, jimpoka imeri erachi témpa Erodiasïni kúrhetixapka, ka iámu imani ampe jimpot'u enka xáni nósesi ampe niátapka; 20ka Erodesi kúts'ïnchakorhesptiteru, enka Juánuni ónhatarkorhepka.

2. Jesusi uénasti ampantskarani jimpo uénaspkia ampe niátakuni

(3.21—4.13)

Jesusit'u itsï atats'ïkunhaspti

(Mt 3.13-17; Mk 1.9-11)

21Arisï úkorhespti enka Juánu itsï atats'ïkpeni jápka, Jesusit'u itsï atats'ïkunhaspti; ka enka na uantamukukorheni jápka, auanta mítakorhespti 22ka Espiritu Sántu, jipunhini jásï ma kétsespti antats'ïkuerani, ka auantarhu kurhanchekorhespti uantakua ma enka ísï arhimpka:

–T'úri jucheti uátsïti xénhchakateska, enkani ji erakuka.

Jesusiri sïrukua

(Mt 1.1-17)

23Jesusi ma ekuatse témpeni uéxurhini isï jatirispti enka imeri úkuani uénapka. Ka uantanhasïrempti eska Jose uáp'espka. Ka Jose Eli uáp'espti, 24ka Eli Matati uáp'espti, ka Matati Lebiri, ka Lebi Mélkiri, ka Mélki Janairi, ka Janai Joseri, 25ka Jose Matatiasïri, ka Matatiasï Amosiri, ka Amosi Naumiri, ka Naumi Esliri, ka Esli Nagairi, 26ka Nagai Máatiri, ka Máati Matatiasïri, ka Matatiasï Semeiri, ka Semei Josekiri, ka Joseki Joderi, 27ka Joda Joananiri, ka Joanani Reseri, ka Resa Sorobabeliri, ka Sorobabeli Salatieliri, ka Salatieli Neriri, 28ka Neri Mélkiri ka Mélki Adiri, ka Adi Kosamiri, ka Kosami Elmadamiri, ka Elmadami Eriri, 29Ka Eri Josueri, ka Josue Elieseriri, ka Elieseri Jorimiri, ka Jorimi Matatiri, 30ka Matati Lebiri, ka Lebi Simeoniri, ka Simeoni Juderi, ka Juda Joseri, ka Jose Jonamiri, ka Jonami Eliakimiri, 31ka Eliakimi Melea uáp'espti, ka Melea Menairi, ka Mena Matateri, ka Matata Nataniri, 32ka Natani Dabiri, ka Dabi Isairi, ka Isai Obediri, ka Obedi Bóosiri, ka Bóosi Salmoniri, ka Salmoni Náasoniri, 33ka Náasoni Aminadabiri, ka Aminadabi Adminiri, ka Admini Arniri, ka Arni Jesroniri, ka Jesroni Fáresiri, ka Fáresi Juderi, 34ka Juda Jakobu uáp'espti, ka Jakobu Isaakiri, ka Isaaki Abraniri, ka Abrani Táreri, ka Táre Najoriri, 35ka Najori Serukiri, ka Seruki Ragaueri, ka Ragau Pélejiri, ka Péleji Eberiri, ka Eberi Selajiri, 36ka Selaji Kainaniri, ka Kainani Arfaksadiri, ka Arfaksadi Semiri, ka Semi Noéri, ka Noe Lamekiri, 37ka Lameki Matusaleni uáp'espti, ka Matusaleni Enokiri, ka Enoki Jarediri, ka Jaredi Malaleliri, ka Malaleli Kainaniri, 38ka Kainani Enosi uáp'espti, ka Enosi Setiri, ka Seti Adaniri, ka Adani Diósï uáp'espti.

Currently Selected:

Sáni Lúkasï 3: DKPJ

Highlight

Copy

Compare