Sáni Lúkasï 2

Jesusiri antap'enukua

(Mt 1.18-25)

1Jimak'ani ísï, k'éri irecha Sésari Augustu juramuspti eska ma parhakpeni karap'eranhantapirinka. 2I miúp'erantskua jimak'ani únhaspti enka Kirinu Siria juramuni jápka. 3Ka iámentuechaksï jatsipirinti nirani níntani imeri iretani jimpo karakorhent'ani.

4Ísï jimpo, Jose uéakuspti imani iretani Nasareti, enka Galilea jaka, ka Beleni karhamaspti, enka Judea jaka, jima enkat'u irecha Dabi kánkorhenhapka, jimpoka Jose Dabiri sïrukuespka. 5Imeri kurhak'orhekata Maria jinkuni enka sapini erokorheni jápka, jiniksï niraspti karakorhent'ani. 6Ka enkaksï Beleni jápka, niáraspti jurhiata enka Maria charhakuni kánkorhepirinka. 7Ka uáp'a urhetini úakasï jatakuarhu kánkorhespti, ka takusï irhirhitaspti, ka chekakuarhu aponhaspti, jimpoka ják'orhekuarhu no ampantespka.

Ánjelicha ka karichi erankuticha

8Jima Beleni no iauani jarhareti, karichi erankutichaksï jámaxapti enkaksï juátarhu pakarempka karichichani kuákorheani. 9Ka mátirku Acheri ánjeli ma xarhakuaspti, ka ma uirhipantani Acheri t'íntskua t'íntskakuaspti; ka kánekuaksï chérakorhespti. 10Enka úpka, ima ánjeli arhiaspti: “Ásï che je, jimpokaksïni ampakiti aiankperakuasï juácheni juka, imani enka jimpo kánekua tsípenhaaka. 11Iásï Dabiri iretarhu p'ímutantspiri ma antap'enusti, enka Acha Krístueka. 12Arisïts'ï mítent'aaka: Tataka sapichuni máts'ï xéntaaka takusï irhiakukata ka chekakuarhu aponhetini.”

13Ka ístuksï mátirku, ánjeli jinkuni, máteru ánjeli auantarhu anapuecha xarharaspti, enkaksï Diósïni k'éri ampe arhimpka, ísïksï uantaparini:

14“¡Jini auantarhu k'éri t'íntskua Diósïristi!

¡Ka parhakpeni Diósïri xénhchakatecha, sési páp'eranhe!”

15Ka enkaksï ánjelicha karhanchent'apka, karichi erankutichaksï arhip'eraspti:

–Ju je Beleni exeni ampesï úkorhe, enkats'ïni Acha aiankuka.

16Ka sóntkuksï niraspti, ka Mariani ka Josenksï xéntaspti; ka tataka sapichu chekakuarhu aponhetixapti. 17Ka enkaksï xéntapka, p'iárasptiksï uantant'a'ni enka xáni tataka sapichueri ampe ánjeli arhiapka. 18Ka iámentu enkaksï kurhauempka imani ampe enkaksï karichi erankuticha uantantempka ískuksï pakarerasïrempti. 19Ka Maria eratsentaparini iámentu íni ampe mintsitarhu patsakorhesïrempti. 20Ka karichi erankutichaksï Diósïni k'éri ampe arhipantaspti ka pirekupantanksï, iámentu imani ampe jimpo enkaksï exepka ka kurhani, jimpoka iámentu ampe ísï úkorhespka eskaksï na aiankunhapka.

Jesusi sapiparini k'éri tiósïo pánhaspti

21Ka enka na iúmu tanimu jurhiatekua jatiripkia, tataka sapichu ts'iuerakuani pasïri p'ikuts'ïkumenhapirinti, ka Jesusi arhinhataranhaspti, ísï eska ánjeli Mariani na arhipka enka nótki sapini kámani jápka.

22Enka na nitamapkia jurhiatekuecha, ka jimpoka Moisesiri juramukuarhu ísï arhisïnka, tataka sapichunksï Jerusaleni páspti Achani míntakuntani. 23Ísïksï jámaspti jimpoka Acheri juramukuarhu ísï karakata jarhaska: “Ts'iueriti urheti, Acha míntamenhaati.” 24Ka nirasptichkaksï kéts'ïtakua pákuni, ísï eska Acheri juramukua na arhik'a: Tsimani jipunhi k'érati o tsimani jipunhi sapinharhichani.

25Jimak'ani isï, Jerusaleni irekaxapti acheti ma enka Simeoni arhinhempka. Acheti kaxumpitispti ka k'éri tiósïo jántini, enka erokorheni jápka eska Israeli p'ímutanhantapirinka. Ka Espiritu Sántuni incharhekorhetixapti, 26ka aiankuspti eska nótki uarhini japirinka eska urheta Krístuni exepirinka. 27Simeoni k'éri tiósïo niraspti jimpoka Espiritu Sántu ísï p'ikuastaspka; ka enkaksï Jose ka Maria Jesusintu pápka, ísï úni eska juramukua na arhik'a, 28Simeoni sapini kamanharhispti ka Diósïni ísï k'éri ampe arhispti:

29“Acha, iásï k'ória, íntspeskaria enkari aiatspepka:

Ekari uék'a jurak'unia eska chéti jántspiri sési p'ikuarheraparini uarhiaka.

30Jimpokani chéti p'ímutantskuani exeskia

31enkari iámentu iretechani japarini uénaka úskuni.

32Erak'utarakua enka ma parhakpeni t'íntskaraaka

ka enka chéti ireta Israeli k'érika.”

33Jesusiri tátjempa ka amampaksï ísku pakareraspti Simeonini kurharini enka tataka sapichueri ampe uantempka. 34Jimak'ani Simeoni úch'akuraspti, ka Mariani, Jesusiri amampani arhispti:

–Exe, i tataka sapichu erakukatesti, uánekua Israeli anapuecha interi jimpo tsînchenhaati ka uánekua sési niánhantaati. Inteni Diósï xarhataati, ka uánekuaksï no jiókaati, 35ka inteni jimpori t'u nósesi p'ikuarheraaka, ísï eskaksïni mintsitarhu tiámu ma jarhanhani, ka mítekorheati enka xáni ampe jatanhetsperanhak'a.

36Ístu jima jarhaspti Diósïri uantari ma enka Ána arhinhempka, kánekua kutsimiti ma enka Fenueli uáp'epka ima enka Aseriri sïrukuepka. Ima kánekua sapichu uampuchaspti ka uámpani jinkuni iúmu tsimani uéxurhini irekorhespti, 37ka tsîntisptia ka t'ámu ekuatse t'ámu (84) uéxurhini jatirisptia. Ka k'éri tiósïo nómeni kéntikusïrempti, ka tiósïo k'arhinta japarini ka uantamukukorheparini Achani chúrekua ka jurhiakua marhuakusïrempti. 38Nana Ánat'u tiósïo ima jántu niáraspti, ka uénaspti Diósïni k'éri ampe arhini ka tataka sapichueri ampe aiankuani imechani enkaksï Jerusaleni p'ímutantskua erokorheni jápka.

Nasaretiksï níntasti

39Enkaksï na k'amarapka iámu ampe úni, eska Acheri juramukua na arhistatspek'a, Nasaretiksï níntaspti enka Galilea jaka. 40Ka tataka sapichu t'arhexexapti ka uiuinhaxeni jarhani ka mímixeni jarhani, ka Diósï xénhchasïrempti.

Tataka sapichu k'éri tiósïo pakarasti

41Jesusiri tátjempa ka amampaksï p'intekua jatsispti mántani uéxurhini Jerusaleni nirani Páskueri k'uíncheni. 42Ka enka Jesusi témpeni tsimani uéxurhini jatiripkia, imaksï iámentu karhamaspti Jerusaleni k'uíncheni. 43Ka nimatiru, k'uanhatsentani jámani, tátjempa ka amampaksï no exespti eska Jesusi Jerusaleni pakaraspka. 44Ma jurhiatekuaksï xanharasptia eratseparini eska Jesusi máteruecha jinkuni k'uanhatsentaxapka, ka enkaksï jámapka imeri márkuechani kurhamarheani ka enkaksï jinkuni xáni mítperapka, 45nóksï xéntaspti. Ka k'uanhatsentasptiksï Jerusaleni Jesusini jirinhantani.

46Tanimu jurhia jimpoksï k'éri tiósïo xéntaspti, ima juramukua jurhentpiricha jinkuni uaxakatini jarhani, kurhach'aani ka mámaru ampe kurhamarheaxapti; 47ka iámentu enkaksï xáni k'urhach'ani jápka eratsentanksï pakarerasïrempti, jimpoka kánekua mímixespka ka sési mókukorhesïrempti ampe enka kurhamarhenhapirinka.

48Enkaksï tátjempa ka amampa exepka, ískuksï pakaraspti; ka amampa arhispti:

–Jucheti uátsï, ¿Antits'ïnisï ísï manata? Táte jinkunksïni uantanheaparini jámaska jirinhantani.

49Ka Jesusi arhintaspti:

–¿Antits'ïnisï jirinhantani jápi? ¿Anti nóts'ï míteski eskani jucheti Táteri k'umanchekuarhu japirinka?

50Ka imaksï no kurhankukuspti ampesï arhikuekani jápi.

51Tátsekuaksï tátjempa ka amampa jinkuni Nasareti níntaspti, ka Jesusi jima irekaspti kurhantirakuaparini. Ka amampa iámentu íni ampe mintsitarhu patsakorhepasïrempti. 52Ka Jesusi mímixekua káneraxapti ka iót'arhani jarhani, ka Diósï xénhchasïrempti ka ístuksï iámentuecha xénhchanhasïrempti.

Currently Selected:

Sáni Lúkasï 2: DKPJ

Highlight

Copy

Compare