Sáni Lúkasï 1

Ichap'etarakua

1Uánekuaksï jánkorhent'asti karantani imani ampe enka Acha Diósï juchantsïni jinkuni úka, 2ísï eskats'ïni na aiankuka ima enkaksï exekorheka uénani jámani, ka enkaksï tátsekua uantakuani aiankpent'ani ánchekorheni p'ika. 3Acha Teófilu, jít'uni sésimentuni iámentu ampe iatsitakuarhu kurhankorheska néna uénakorhespi, ka sési péntaska ka exeska eska marhuauaka iámentu íni ampe karachent'anikini, 4eskari sésimentu míteaka eska ísïskamentu ima ampe enkari xáni aiankunhakia.

I. JUANU ITSÏ ATATS'ÏKPIRI KA JESUSI ENKAKSÏ SAPIPKA

(1.5—2.52)

1. Aiankperatecha

(1.5-56)

Ánjeli ma Juanu itsï atats'ïkpiriri kóntperakua uantant'a'sti

5Jimak'ani isï enka Erodesi Judea irecheni jápka, jarhaspti táta ma enka Sakariasï arhinhempka, enka Abiásïcha jinkunipka. Imeri uarhiti Aaroniri sïrukuespti ka Isabeli arhinhasïrempti. 6Ka tsimarhenksï nóma ampe arhikua jukaspti Diósïni japarini, ka Acheri uantakuani ka juramukuechanksï kurhantirakusïrempti ka nómpemaksï nósesi jásï ampe exemenhantasïrempti. 7Ka nóksï ma sapini kóntenhaspti, jimpoka Isabeli no úsïrempka sapi káani; ka jimpokat'uksï tsimarheni kánekua k'érispkia.

8Ma xanhari, jimak'ani enkaksï Sakariasïri tátecha p'itarapka k'éri tiósïo marhuani, 9ka ísï eskaksï tátecha na p'intekua jatsipka, Sakariasïni niárakueraspti k'éri tiósïo xunhanta jatsikuni. 10Ka eka na xunhanta kurhiranhani jápka, iámu jima anapuecha uérakua janhaspti uantamukukorhenhani. 11Ka enka ísï úkorheni jápka, Sakariasïni ánjeli ma xarhakuspti, xunhanta kurhiratarakuarhu t'irerkantani anhaxurhitini jarhani. 12Ka ánjelini exerini, Sakariasï kánekua ísku pakareraspti ka kánekua chérakorhespti. 13Ka ánjeli arhispti:

–Sakariasï, ásï jáma chéni, jimpoka Diósï kurhaskia chéti uantamukukorhekua, ka chéti uarhiti Isabeli sapini ma kánkorheatia; ka Juánuri arhiratarkorheaka, 14t'úri kánekua tsípeaka, ka uánekua tsípenhaati enka ima antap'enuaka, 15jimpoka chéti uátsï Achani jinkuni k'éri ampeuaka. Nóma jásï ka nómeni kauikua ts'émuati, ka nótki jamperi kánkorhenhani janhaati enka t'uíni Espiritu Sántuni iámu incharhekorhetini jauakia. 16Ka uánekua Israeli anapuecha Acha Diósïni jinkuni péntauati. 17Inte Juánu Eliasïri uinhapekua ka espiritu jinkuni Achani urhekupaati, ka tátjempechani uáp'echani jinkuni sési arhip'etarantauati, ka no kurhantirechani jurhentauati eskaksï míakua jukaaka. Ka ísï jámaparini iretani miátaati eskaksï Achani sési erokaaka.

18Ka Sakariasï ánjelini kurhamarhespti:

–¿Ka anti ji néna sésimentuni míteaia eskarini no ískusï ísï arhini jaka? Jimpokani jucha kánekua k'ératiskia.

19Ka ánjeli arhispti:

Ji Gabrieliska ka Diósïni marhuakusïnka, ka imarini axasti t'únkeni jinkuni uantontskorheni, ka íni ampakiti aiankperakuakini juácheni. 20Ka enkarini ísï no jakak'ucheka inteni ampe enkakini ji arhika, nunuxiri úkorheaka; nóri úaka uantani imani jurhiatekua jamperi, enka jamperi iámu ampe ísï úkorheaka.

21Ka enka incharini ísï úkorheni jápka, Sakariasï uérakua eronhantaxapti ka iámentuechaksï kurhamarhekorhesïrempti antisï xáni ióntani jápi k'éri tiósïo uéntani. 22Ka enka na ióni jimpo uéntapkia, no úsïrempti uantaxetspeni; ka sóntku jánhaskanheraspti eska k'éri tiósïo incharini ampe ma xarhakuspka, jimpoka no úsïrempka uantani ka jimpoka manak'urhaparinterku aiankpexapkia; ka nunuxi pakaraspti.

23Ka enka na k'amarapkia k'éri tiósïo marhuani, Sakariasï chénjempo níntaspti. 24Ka tátsekua enka na i ampe úkorhepkia, imeri uarhiti Isabeli sapini ma erokorhexaptia, ka iúmu kutsï no uéraspti, ísï eratseparini: 25“Acharini kóntentastia, ka ísï jámani nóteruni arhinhchanhaakia.”

Ánjeli ma Jesusiri antap'enukua aiankpesti

26Kuímu kutsï nitamatini, Diósï axaspti ánjeli Gabrielini Galilea anapu iretarhu ma enka Nasareti arhinhak'a, 27jima irekaspti uátsï ma enka Maria arhinhempka; no p'árhekatespti, k'óru kurhak'orhekata jarhasptia eska tataka ma jinkuni uampuchapirinka enka Jose arhinhempka, enka irecha Dabiri sïrukuepka. 28Ánjeli jima inchaspti enka uátsï jápka, ka arhispti:

–¡Tsípe t'u, kánekuamenturi xénhchakateska! Acha t'únkeni jinkunisti.

29Ka Maria ísku pakareraspti ísï kurharini, ka kurhamarhekorhesirempti, ¿Ampe arhikuekempki enka ísï uantap'apka? 30Ka ánjeli arhispti:

–Maria ásï jáma chéni, jimpoka Diósï t'únkenimentu jinkuniska. 31Iásïri uératini sapini erokorheni jauaka: Sapiniri ma kánkorheaka, ka Jesusi arhiratarkorheakari. 32Ka ima k'éri ampeuati, ka arhiatiksï eska ima uáp'eska enka K'érika, ka Acha Diósï k'érikuarhu péraati, mák'ueni eska tátjempa Dabini na pérapka, 33ka eska méntku ísï Jakobueri sïrukuechani juramuakuauaka. Ka imeri juramukua nómeni k'amakurhiati.

34Ka Maria ánjelini arhispti:

–¿Ka inte ampe néna ísï úkorhea? Enkarini nótki ma tataka píreni jaka.

35Ka ánjeli mókunt'ani arhispti:

–Espiritu Sántukini antarheraati, ka Diósïri uinhapekuakini t'únkeni antats'ïkueraati, ísï jimpo, sapi enka antap'enuaka Sántuesti ka Diósï Uáp'esti. 36Isabelit'u sapini ma kámaati, ima enka t'únkeni jinkuni márkueka, nák'iruka k'érikia, ka enkaksï arhimpka eska no úsïrempka sapi káani, kuímu kutsïstia enka sapi jinkuni jámani jakaia. 37Jimpoka Diósï nómpema no úsïnka úni.

38Jimak'ani Maria arhispti:

“Ji Acheri jántspiriska; Diósïrini káme eskamenturini t'u na arhika.”

Enka na ísï úkorhepka, ánjeli níntaspti.

Maria Isabelini p'urhempesti

39Ka ima jurhiatekuechani jimpo Maria sóntku iretarhu ma karhamaspti enka Judea jaka, 40ka enka Sakariasïo inchapka, Isabelini uantap'aspti. 41Ka enka Isabeli kurhapka eska Maria uantap'aspka, sapi Isabelini uinhamu manaakuspti, ka Espiritu Sántuni iámu incharhekorhespti. 42Ka jimak'ani Isabeli uinhachaparini uantaspti:

–¡Diósïkini úch'akurasti, sánteru eska iámentu nanechani ka chéti uátsïni úch'akurasti! 43¿Anti ji ampe xániski enkarini ísï juka jucheti Acheri amampa jínteni exeni? 44Enkachkakini ji kurhaka janoni, jucheti uátsïtirini manaakusti xáni tsípeni. 45¡T'u k'ória enkari jakak'uka eska iámentu ampe enkakini Acha arhik'a úkorheaka!

46Jimak'ani Maria uénhekorhespti:

“Jucheti mintsita k'éri ampe arhisïnti Acheri k'érikuani.

47Jucheti mintsita tsípexati Diósï jinkuni,

enka jucheti p'ímutantspirika.

48Jimpokarini Diósï jínteni erakuska,

enkani imeri jántsipiri sapichu méka,

ka iásï uératini méntkisïts'ïni arhiati eskani úch'akurakateska,

49jimpoka ima enka iámu uinhapekua jatsika,

jíntenirini kánekua sési ampe úcheska.

¡Pímpinhaxetisti imeri jakankurhikua!

50Ka méntku ísï p'amok'uasïnti

imechani enkaksï chénharhik'a.

51Ka imeri uinhapxurhakua jimpo

k'éramakorherichani eratsekua xerekuantasti.

52Ka jarhamekua jinkuni uantarichani juramukua euantaasti,

ka k'érikuarhu pérasti imechani enkaksï kétsekua uérak'a.

53Kánekua jatsikorhekua íntsaasti enkaksï t'irekua no jatsik'a,

ka jatsikorherichani ísku petant'a'asti.

54Imeri jántspiri Israelini jurhasti jarhuatani,

p'amok'perakua míaparini.

55Eska méntkisï juchari ióntki anapuechani,

Abranini ka imeri sïrukuani na aiakuapka.”

56Maria Isabelio tanimu kutsï jatsïpespti, ka tátsekua níntasptia.

2. Antap'enukuecha

(1.57—2.52)

Juánu itsï atats'ïkpiriri kóntperata

57Enka niárapka jurhiata enka Isabeli sapini kánkorhepirinkia, tataka sapichuni ma kánkorhespti. 58Imeri irenkuticha ka márkuechaksï niraspti exent'ani, ka sési ampe uantakuaksï pákuni enkaksï mítepka eska Acha kánekua kóntespka, 59ka enka sapi na iúmu tanimu jurhia antankutapkia, imaksï niáraspti ts'iuerakuani pasïri p'ikuts'ïkukuni. Ka uéksïremptiksï imantu Sakariasï jakankurhitarani, eska tátjempa na arhinhempka. 60Enka úpka, amampa ísï uantaspti:

–Nómpe, Juánu arhinhaati.

61Uánekuntasptiksï arhini:

–¿Anti? Chéni nónema ísï arhinhasïnti.

62Ka jimak'anksï tataka sapichueri tátjempani manak'urhaparini kurhamarhespti, néna uéksïrempki eska arhinhapirinka. 63Tátjempa k'ereri ma kurhak'orhespti jimpoka jima karanharhikuni uéksïrempka; ka ísï karaspti: “Juánuesti.” Ka iámentuechaksï ísku pakareraspti. 64Ka enka na karapka, Sakariasï nunuxikua jupinapaspti, ka uantakua junkuakuspti, ka Diósïni k'éri ampe arhispti. 65Ka iámentu jimak'u ísï anapuecha ísku pakareranhasïrempti, ka iápuru iretecharhu, enkaksï Judea juátechani jimpo jaka, uantanhantasïrempti ampe enka úkorhepka. 66Iámentu enkaksï kurhach'apka mintsitarhuksï patsakorhesïrempti, ka uantasïremptiksï: “¿I sapi náxani k'éri ampeua?” Jimpoka sési jimpo Acha Diósïri uinhapekua sapi jinkuni xarharasïrempka.

Sakariasïri uantamukukorhekua

67Ka Sakariasï tataka sapichueri tátjempa Espiritu Sántuni incharhekorhetini, ísï uénhekorhespti eska Diósïri uantari ma:

68“¡Acha, Israeliri Diósï k'éri ampesti

jimpoka imeri iretani p'ímutant'a'ni jurhaska!

69P'ímutantspirini máts'ïni axachesti enka iámu juramukua kámka,

enka imeri jántspiri Dabiri sïrukueka,

70ínisï ióntki aiatspepti,

enkaksï Diósïri uantari erakukatecha uantempka:

71Eskats'ïni kuáp'entapirinka imechani jinkuni enkats'ïni kurhunhek'a,

ka iámentu imechani jinkuni enkats'ïni ikiachek'a,

72eska juchari ióntki anapuechani kónteantapirinka

ka eska imeri ampakiti aiatspekuani no mirikurhipirinka.

73Ka aristi uantakua aiatspekata

enka juchari Táte Abranini aiakupka:

Eskats'ïni sésekua íntskupirinka

74no chéta jinkuni irekani jarhani,

eskats'ïni nóteru nema ikiacheaka.

75Ka ísïchi kaxumpekua ka pímpinhaxekua jinkuni marhuakuni,

ka ima jinkunchi jarhani enka jamperi xáni juchari tsípekueuaka.

76Ka t'u, jucheti uátsï, arhinhaakari

eskari Diósï k'ériri uantariska,

jimpokari Achani imeri xanharichani urhekupaaka

ampantskakupaani.

77Eskari imeri iretani p'ímutantskua mítetaraaka,

ka eskaksï k'amanharhintskuechani púamenhant'aaka.

78Jimpokats'ïni juchari Diósï, enka xáni p'amop'ek'a

iótakuarhu uératini t'íntskua jimpanhets'ïni juácheska,

79enka imechani erak'utauaka

enkaksï kánekua páp'akantu irekani jaka,

ka jupit'apantsïni eskachi jucha sési páp'eraaka.”

80Ka tataka sapichu k'uiripexapti ka imeri espiritu uinhapexapti. Ka jima irekaspti enka nónema irekaka, jimak'ani jamperi enka Israelichani xarhakuantaapka.

Currently Selected:

Sáni Lúkasï 1: DKPJ

Highlight

Copy

Compare