Sáni Markusï 16
16
Jesusiri tsíntskua
(Mt 28.1-10; Lk 24.1-12; Jn 20.1-10)
1Enka sábadu nitamapkia, Maria Magdalena, ka Maria, Santiagueri amampa, ka Salome, p'untsumekuechanksï piáspti enkaksï Jesusini atarhentapirinka. 2Ka pauantekua xarhentku, enka jurhiata antarani jápkia, nirasptiksï jima enkaksï uarhiricha jatsinhantak'a, 3ka arhip'erapaxaptiksï:
–¿Ka anti néts'ïni kéntitacheaia tsakapu enka ómutakorheni jaka?
4Ka enkaksï na niárapkia, tsakapu t'uíni támu jarhasptia, náuek'i ima tsakapu kánekua k'énharhipka. 5Inchanhesptiksï jima nani enka Jesusi pénhantapka, ka jimaksï tumpini ma exespti, t'irerkantani uaxakatini jarhani, t'uput'upusï xukuparhatini, ka chérakorhesptiksï. 6Ka ima tumpi arhiaspti:
–Ásï che je. Cháts'ï Jesusi Nasareti anapuni jirinhantaxamka, imani enka krúsirhu cháparhatanhaka. Nóteru ixu jarhastia, tsíntastia. Exetkiru jeia axu enka pénhantapka 7Ni je imeri jurhenkorherichani aiankuaani, ka ístu Pédruni: Ima Galilea niraxati, jimats'ï exent'aaka ménteru, ísï eskaksïni ima na arhirini jápkia.
8Uarhitichaksï uiriapantaspti, manarapant'ani, ka nónemaniksï aiankuspti, jimpokaksï chérakorhetixapka.
Jesusi Maria Magdalenani xarhakuntaspti
(Jn 20.11-18)
9[Dominku juthiatekua tsípa, jiák'ani enka Jesusi na tsíntapkia, Maria Magdalenani uénaspti xarhakuntani, imani Magdalenani enka iúmu tsimani nóampakitichani petarhetant'a'apka. 10Ima máteruechani niraspti aiankuantaani enkaksï Jesusini p'amok'uni mískorheni ka uerani jápka. 11Ka nóksï jakak'ukuspti nák'irukaksï kurhani jápka eska ima uarhiti Jesusini tsípiti exent'aspka.
Jesusi xarhakuantasti tsimani jurhenkorherichani
(Lk 24.13-35)
12Ísï tátsekua, Jesusi ménterueni xarhakuaspti máteru tsimani jurhenkorherichani enkaksï juátarhu nirani jápka. 13Ka imat'uksï niraspti máteruechani aiankuani; ka imat'uksï máteruecha mák'ueni no jakak'ukuaspti.
Jurhenkorhericheri ánchperata úkua
(Mt 28.16-20; Lk 24.36-49; Jn 20.19-23)
14Ka tátsekua, k'ámarani jámania, Jesusi témpeni ma jurhenkorherichani xarhakuantaaspti, enkaksï t'ireni jápka. Ka arhinharhikuaspti jimpokaksï mintsitani chuperaspka ka jimpokaksï no jakak'ukuaspka imechani enkaksï exepka eska tsíntaspkia. 15Ka arhiaspti: “Iámu parhakpentsï niuaka ampakiti aiankperakuani aiankpent'ani. 16Ka ne eka jakak'uaka ka itsï atats'ïni, p'ímutantskateuati; ka ne enka no jakak'uaka, tsînchetini pakaraati. 17Ka jakak'utichaksï íni ampe xarhataati: Jucheti juramukua jimpoksï úati nóampakitichani petarhpeantani; ka úatiksï máteru uantakuechaniksï uantaani; 18ka nómpemaksï úkorhenchaati náuek'iksï akuitsechani jupiani ka náuek'iksï uántikpetarakua itsïmani; ka p'amenchatichani p'áts'ïkuauati ka imaksï ampakentaati.”
Jesusiri kénchentskua
(Lk 24.50-53)
19Ka enka Jesusi na k'amarapkia ísï uantani, p'íkunhantasptia auantarhu, ka Diósïri t'irerkantani uaxakaspti. 20Ka jurhenkorherichaksï niraspti iápuru isï ampakiti aiankperakua aiankpeni, ka Acha jarhuatapasïrempti, jimpokaksï uantakuani milagruechani jimpo tsïrimerapasïrempka.]
Currently Selected:
Sáni Markusï 16: DKPJ
Highlight
Copy
Compare
Share
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
