Heb 5

1Xb'aan naq chixjunil xyuwa'il aj tij a'an sik'b'il ru sa' xyanqeb' li winq ut xaqab'anb'il xk'anjel chiru li Yos chirixeb' li winq re yeechi'ink ut k'atok mayej chirixeb' li maak. 2Ut naxnaw xtoq'ob'ankil ruheb' li maak'a' neke'xnaw ut li sachsookeb', xb'aan naq a'an rech lub'luukileb' ajwi'. 3A'an rajb'al naq tento taamayejaq chirix xmaakeb' li tenamit jo' ajwi' chirix li xmaak xjunes rib'. 4Ut maa'ani naru tixchap li loq'laj k'anjel a'in cho'q re xjunes rib', ka'aj b'an wi' li b'oqb'il xb'aan li Yos jo' laj Aharón.

5Jo'kan ajwi' li Kriist moko yal xjunes ta kixxaqab' rib' chi k'anjelak cho'q xyuwa'il aj tij, kixk'ul b'an li xnimal loq'al a'in sa' ruq' li kiyehok chaq re:

«Laa'at li walal;

xatinyoob'tesi anaqwan».#5,5 Sal 2,7.

6Naxye ajwi' sa' jalan chik raqal:

«Laa'at aj tij chi junelik,

jo' chanru xk'anjel laj Melkisedek».#5,6 Sal 110,4.

7Chiru li xyu'am arin sa' ruuchich'och', li Kriist kitz'aamank ut ki'elajink chi kaw xyaab' xkux ut rik'in xya'al ru chiru li Yos, li wank xwankil chi kolok re chiru li kamk, ut ki'ab'iik xb'aan naq tiik xch'ool. 8Us ta a'an K'ajolb'ej, ab'an kixtzol paab'ank rik'in li rahilal kixk'ul.

9Ut naq koxtaw li xtz'aqalil re ru,#5,9 Li Jesus koxtaw li xtz'aqalil re ru cho'q aj tij ut loq'laj kames-mayej. kikanaak cho'q xyo'leb'aal li kolb'a ib' cho'q reheb' chixjunil li neke'paab'ank re, 10xb'aan naq kixaqab'aak xb'aan li Yos cho'q xyuwa'il aj tij jo' naq kiwank chaq laj Melkisedek.

Aajel ru li kawil tzekemq

11Chirix li na'leb' a'in toj wank raj naab'al li k'a'aq re ru tqaye eere, ab'anan ch'a'aj xch'olob'ankil cheru xb'aan naq timil neketaw ru. 12Laa'ex aj tzolonelex raj chik anaqwan xb'aan naq ak k'iila kutan chik eerokik; ab'an aajel ru naq toj taak'ute'q wi' chik cheru li na'leb' xetzol sa' xtiklajik chirix li Raatin li Yos; toj tento taak'eemanq eere li q'unil tzekemq ut ink'a' li kawil tzekemq. 13Xb'aan naq chixjunil li toj natu'uk, ink'a' naxnaw li xnimal tzolok chirix li choxahil tiikilal, xb'aan naq toj k'uula'al. 14A'ut li kawil tzekemq a'an cho'q reheb' li ak ninqeb', a'aneb' li ke'xk'aytesi li xk'a'uxl chi xtawb'al ru b'ar wank li us ut b'ar wank li ink'a' us.

Currently Selected:

Heb 5: QQC

Highlight

Copy

Compare