Nehemías 1
1
Niimiasë Yosë nontërinsoꞌ
1-2Caso Niimiasëco. Tatahuësoꞌ Acariasë itopi. Artaquirquisë copirno yaꞌconinsoꞌ, nani shonca iscon piꞌipi, iscon yoqui nisarin. Naporo yoquisoꞌ, pascoa yoqui quëran iscon yoquitarin. Caso, Sosa ninanoquë yaꞌhuërahuë. Inaquë copirno yaꞌhuërin niꞌton, canta inaquë yaꞌhuërahuë. Inaquë yaꞌhuëasoco Cota parti quëran iyahuë canquirin. Inasoꞌ, Anani itërai. Inarë chachin caraya quëmapiꞌsa huëꞌpi antaꞌ. Canquihuachinara: “¿Onpopinta ipora Quirosarin ninanoquë quëparitopisopita yaꞌhuëapi?” Itërahuë. 3“Inapitaso yaꞌhuëaponaraihuëꞌ, naꞌcon parisitapi. Ninano pairanën ohuatopiquëranchin yaꞌhuëarin. Yaꞌcoana onconanoꞌsantaꞌ, iráca ahuiquitopi. Inapoatona taparo nisapi,” itërinco iyahuë.
4Ina natanato paꞌpi sëtërahuë. Huënsërahuë quëran naꞌnëmiatërahuë. Naporahuato, naꞌa tahuëri co coshatatorahuëꞌ, Yosë nontërahuë:
5“Quëmasoꞌ Sinioro Yosënquën. Inápaquë yaꞌhuëaton chini chiníquën nanantëran. Paꞌpi huëhuëpiro nininsopita ninan. Nosororinquënsopitarëꞌquën anoyatohuatana, noꞌtëquënáchin catahuaran. Camaitëransopitanta natëhuachinën inapotëran. 6Onpopionta Sinioro nontëranquënsoꞌ natanco. Israiroꞌsacoisoꞌ, quëma piyapinënpitacoi. Inapita marëꞌ tahuëri tashirë chachin nontaranquën. Tëhuënchachin quiyasoꞌ co natëtëinquënhuëꞌ, oshahuanai. Cantaꞌ, quëmopinëhuëpitaroꞌco chachin oshahuanahuë. 7Paꞌpi co noyahuëꞌ nicatoi, camaitëransopita, pënëntëransopita, inapita co natëraihuëꞌ. Quëma nohuanton iráca piyapinën Moisësë itopisoꞌ, inapita ninshitërincoi. 8Naporo chachin ina shaꞌhuitëran: ‘Coꞌsoꞌ natëtonacohuëꞌ oshahuanpachinaꞌ, yaꞌipi parti isoroꞌpaquë ayanquëarahuë. 9Napoaponahuëꞌ, co noyahuëꞌ yonquiramasopita aꞌporahuatoma casáchin tahuërëtaantahuatamaco, noya niꞌsaranquëmaꞌ. Camaitërahuësopita noya natëantahuatamaꞌ, huayonahuëso noꞌpaquë chachin chinotaantaramaco. Noꞌpaꞌ nanirinquë huarëꞌ quëpapirinënquëmahuë tërantaꞌ, isëquë chachin quëantaranquëmaꞌ,’ itërancoi.
10Quiyasoꞌ quëma piyapinënpitacoi. Chini chiníquën nanantaton Iquipito quëran ocoirancoi. 11Onpopionta Sinioro nontëranquënsoꞌ natanco. Aꞌnapita piyapinënpitantaꞌ, nontarinënsoꞌ natanquëꞌ. Quiyasoꞌ paꞌyataꞌhuainquënsoráchin cancantarai. Copirno yanontërahuë. Nontohuato, quëma nohuanton noya natanatonco catahuainco,” itërahuë.
Currently Selected:
Nehemías 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
