Esdras 7
7
Istrasë aꞌnapitarë chachin Quirosarinquë canquipisoꞌ
1Huaꞌqui quëran aꞌna yaꞌhuërëꞌ, Pirsia parti huaꞌanëntaantarin. Inasoꞌ, Artaquirquisë itopi. Ina huaꞌanëntasoꞌ, aꞌnara Nihui huënton quëmapi yaꞌhuërin. Inasoꞌ, Istrasë itopi. Paꞌpinsoꞌ, Siraiasë itopi. Inanta paꞌpin Asariasë itopi. Ina paꞌpionta Iriquiasë. 2-5Iriquiasënta paꞌpin, Saromo itopi. Inanta paꞌpin, Satoco. Inanta paꞌpin, Aitopo. Ina paꞌpiontaꞌ, Amariasë. Inanta paꞌpin, Asariasë. Ina paꞌpiontaꞌ, Mirayoto. Inanta paꞌpin, Siraiasë. Ina paꞌpiontaꞌ, Osi. Inanta paꞌpin, Poqui. Ina paꞌpiontaꞌ, Apisoa. Ina paꞌpiontaꞌ, Huinisë. Inanta paꞌpin, Iriasaro. Ina paꞌpiontaꞌ, Aaron. Inasoꞌ, yaꞌnan corto huaꞌan yaꞌconinsoꞌ. 6-9Istrasësoꞌ, iráca pënëntërinsoꞌ quirica nóya nitotaton, aꞌchinaꞌpi yaꞌconin. Ina quiricaquë Sinioro nohuanton Moisësë ninshitërin. Naporahuaton Siniorori noya catahuarin. Napoaton Artaquirquisë copirnori yaꞌipi nataninsopita catahuacaso marëꞌ quëtërin. Inapoaton inasoꞌ, Papironia quëran Quirosarinquë huëntarin. Aꞌna huëntonaꞌ, israiroꞌsari imaquipi. Inapitasoꞌ aꞌnaquën corto huaꞌanoꞌsaꞌ. Aꞌnaquëntaꞌ, nihuiroꞌsaꞌ. Aꞌnapitasoꞌ, cantanaꞌpiroꞌsaꞌ. Aꞌnapitantaꞌ, yaꞌcoana aꞌpairoꞌsaꞌ. Aꞌnaquënsoꞌ, Yosë chinotacaso pëiquë sacatopisopita. Artaquirquisë nani canchisë piꞌipi copirno yaꞌconinso nisapasoꞌ, Quirosarinquë canquipi. Yaꞌnatiirinso yoquiquë yaꞌnatiirinso tahuëri chachin pipipi. Napoaponaraihuëꞌ, aꞌnatërápo yoqui nisahuaton, aꞌna tahuëri quëran Quirosarinquë canquipi. Siniorori catahuarin niꞌton, noya iratopi. 10Istrasësoꞌ, yaꞌipi cancanën quëran Sinioro pënëntërinso yanitotërin. Ina nitotahuaton, noꞌtëquën natëcaso yonquirin. Naporahuaton, aꞌnapita israiroꞌsanta aꞌchintochináchin cancantërin. 11Artaquirquisë copirnori quirica ninshitahuaton, quëtërin. Istrasësoꞌ corto huaꞌan. Naporahuaton Yosë camaitërinsopita, pënëntërinsopita, inapita noyá nitotahuaton, israiroꞌsa aꞌchintërin. Iso pochin ninshitahuaton quëtërin:
12“Ca Artaquirquisë copirnoco Istrasënquën nontaranquën. Quëmasoꞌ corto huaꞌanquën. Naporahuaton Yosë inápaquë yaꞌhuëaton, pënëntërinsoꞌ, noyá nitotëran. Ina nitotaton aꞌchinaꞌpinquën yaꞌconan.
13Naꞌa israiroꞌsa huaꞌanëntërahuëquë yaꞌhuëapi. Inpitasona quëmarëꞌ Quirosarinquë pacacaiso nohuantohuachinaꞌ, paꞌinaꞌ. Corto huaꞌanoꞌsahuë nipon, nihuiroꞌsahuë nipon, paꞌinaꞌ. 14Canchisë huaꞌanoꞌsa ayonquirinacosopita yaꞌhuërin. Inapitarëꞌco chachin anoyatatoi, Quirosarinquë aꞌpaaranquën. Onpopinsona Cota parti, Quirosarinquë, inaquëpita nisapi niꞌconquëꞌ. ¿Yosë pënëntërinsoꞌ quiricaquë naporinso chachin taꞌma nisacai? 15Canpita Yosënëma chinotëramasosoꞌ, Quirosarinquë yaꞌhuërin. Ina marëꞌ, oro, prata, inapita caora nohuanton acorahuë. Huaꞌanoꞌsa ayonquirinacosopitantaꞌ, inapochachin acopi. Yaꞌipi inapita inátohua quëpaquëꞌ. 16Yaꞌipi Papironia propinciaquënta natantohuatan, quëtarinën. Corto huaꞌanoꞌsaꞌ, piyapiroꞌsaꞌ, inapitanta inahuara nohuanton Yosë pëinën marëꞌ acoapi. Napohuachinaꞌ, inapitarë chachin yaꞌipi quëpaquëꞌ. 17Ina coriquiquë toroaꞌhuaroꞌsaꞌ, carniroroꞌsaꞌ, carniroaꞌhuaroꞌsaꞌ, inapita paꞌanaran. Sharoꞌsa noꞌmoquën ahuiquitacasoꞌ, huinonta artaro aipi opotacasoꞌ, inapitarë chachin paꞌanaran. Inapotahuaton Yosë chinotëramaso pëi artaronënquë ahuiquitocoꞌ. 18Oro, prata, inapita yaꞌsohuachin, maꞌsona Sinioro nohuantërinso nicatoma tiquicoꞌ. 19Nisha nisha Yosë pëinënquë ohuaracaiso marënta quëtërainquën. Inasoꞌ, ina chinotëramaso pëiquë quëmari chachin quëtontaquëꞌ. 20Yosë chinotamaso marëꞌ maꞌsona aquëtë pahuanpachin, maꞌsha tapatërinacosoꞌ pëiroꞌsaquë maꞌpatëquëꞌ. 21Ca Artaquirquisë copirnoco camaitarahuë. Iopiratisëiꞌ aquëtëran piꞌi yaꞌconinso parti, naꞌanquëma maꞌsha tapatëramacosopita yaꞌhuëramaꞌ. Ina naponquëma chachin iso pochin camaiaranquëmaꞌ. Corto huaꞌan Istrasë maꞌsona natanpachinquëmaꞌ, quëtocoꞌ. Inasoꞌ, Yosë inápaquë yaꞌhuëaton pënëntërinsoꞌ, noyá nitotërin. Ina nitotaton aꞌchinaꞌpi yaꞌconin. 22Prata natanpachinquëmaꞌ, cara huaranca cara pasa quiroquë huarënta nanitërama quëtamasoꞌ. Tricontaꞌ, cato shonca cato huaranca quiroquë huarëꞌ quëtocoꞌ. Huinohuë nipon, tomahuë nipon topachin, cato pasa cato shonca rataquë huarëꞌ nanitërama quëtacasoꞌ. Yamorantaꞌ, onposoꞌ nohuantërinsoꞌ quëtamaso yaꞌhuërin. 23Yosë inápaquë huaꞌanëntërinso pëinën marëꞌ maꞌsona nohuantohuachin, aꞌnaroáchin quëtacaso yaꞌhuërin. Ama maquëran tëranta huiꞌnahuëpita, piyapinëhuëpita, inapita inari anaꞌintacaso marëhuëꞌ inapotocoꞌ. 24Naporahuaton, isonta nitotocoꞌ: Corto huaꞌanoꞌsaꞌ, nihuiroꞌsaꞌ, cantanaꞌpiroꞌsaꞌ, yaꞌcoana aꞌpairoꞌsaꞌ, Yosë chinotacaso pëiquë sacatopisopita, inapitasoꞌ, co aꞌnapita pahuërërinacoso pochin pahuërëtapihuëꞌ. Apahuërëtohuatamasoꞌ, naꞌinaramaꞌ.
25Quëmanta Istrasë Yosë yonquínahuan acorinquën. Inapotërinquën nichinapon chachin, coisëroꞌsaꞌ, chirinchiroꞌsaꞌ, inapita acoquëꞌ. Iopiratisëiꞌ aquëtëran piꞌi yaꞌconinso partiquë inapoquëꞌ. Piyapiroꞌsa noya nicatona yaꞌhuëcaiso marëꞌ camaichinaꞌ. Yosë pënëntërinsoꞌ nitotopisopita acoquëꞌ. Co nitotopisopitahuënta acohuatan, aꞌchintëquëꞌ. 26Insosona Yosë pënëntërinsohuë nipon, ca pënëntërahuësohuë nipon, co natëhuachinahuëꞌ, tëpaꞌinaꞌ. Naꞌin naꞌinpiro nipachinaꞌ, inapochinaꞌ. Co onpopinchin tëhuëhuachinahuëꞌ, yaꞌhuërin quëran ocoirahuatonaꞌ, aꞌna noꞌpaquë tëꞌyachinaꞌ. Pahuërëchinahuë nipon, tashinan pëiquëchinahuë nipon, inapochina tënahuë,” tënin ninshitaton.
Yosparinquën taꞌton, Yosë nontërinsoꞌ
27-28Copirnori quirica quëtohuachina, Istrasësoꞌ Yosë nontaton tapon:
“Yosparinquën Sinioro. Quëmaso Yosënquën. Shimashonëhuëpitanta chinotërinquën. Quëma nohuanton, Pirsia copirno noya yonquirin. Quirosarinquë chinotiinënso pëi noya nicaton, quëma marëꞌ sacataꞌhuaisoꞌ catahuarincoi. Quëma nohuanton copirno nosororinco. Ina ayonquipisopitantaꞌ, catahuarinaco. Aꞌnapita huaꞌanoꞌsanta napotërinaco. Ina marëꞌ chiníquën cancantërahuë. Inapita catahuarinaco niꞌton, chiníquën nanantopisopita israiroꞌsa ayontonahuë. Inapitarëꞌcoi pacaꞌhuaiso marëꞌ naporahuë,” itërin.
Currently Selected:
Esdras 7: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
