Nehemías 2
2
Niimiasë Quirosarinquë paꞌninsoꞌ
1-2Naporoꞌ caso, Artaquirquisë copirno oꞌshitonaꞌpico. Inaso copirno yaꞌconin quëran huarëꞌ, cato shonca piꞌipi nisahuaton, aꞌna yoquiraꞌ nisarin. Naporoꞌ oꞌshitasoco, paꞌpi sëtërahuëso niꞌnin. Ina nicaton: “Paꞌpi sëtëran niꞌnahuë. Carinquënsoꞌ, co canioranhuë pochin niꞌnanquën. Nanan ipora yaꞌhuëtërinquën,” itërinco. Napotohuachincora, paꞌpi paꞌyanahuë.
3-5—Quëmasoꞌ huaꞌanëhuënquën. Nanpimiataton huaꞌanëntocoi. Iráca shimashonëhuëpita Quirosarinquë yaꞌhuëpi. Chiminpachinara, inaquëranchin nipaꞌpitopi. Inasoꞌ ninano pairanën, inimicoroꞌsari iráca ohuatopi. Onconanënpitanta ahuiquitopi. Ipora huanta ina chachin nisárin. ¡Napoaton iporasoꞌ, co nanitërahuëꞌ capa cancantaꞌhuasoꞌ! itërahuë.
—¿Ma quërancha catahuainquën nicaya? itërinco copirno. Napotohuachincora, Yosë inápaquë yaꞌhuërinso nontahuato copirno natanahuë:
—Noya niꞌpatancosoꞌ, onpopionta Cotia parti aꞌpaco pantaꞌi. Inaquë paato Quirosarin ninano anoyatontaꞌi, itërahuë. 6Copirnosoꞌ, saꞌin pirayan huënsëarin. Napotërahuësoꞌ natanahuaton, itaponco:
—Paꞌpatan: ¿Onporota huënantaran? itërinco. Napotohuachincora, tahuëri huënantaꞌhuaso shaꞌhuitërahuë. Shaꞌhuitohuatora, nohuantërin aꞌpaincosoꞌ. 7Naporahuaton chirinchiroꞌsa Iopiratisiiꞌ aquëtëran yaꞌhuëpisoꞌ, anitotacaso marëꞌ quirica copirno aninshitërahuë. “Inapitanta maꞌmarësona paꞌsarahuësoꞌ nitotatonaꞌ, Cotia parti pacaꞌhuasoꞌ quëchinaco taꞌto,” naporahuë. Ina chirinchiroꞌsasoꞌ, piꞌi yaꞌconinso parti yaꞌhuëpi. 8Asahua huaꞌan marëntaꞌ, aninshitërahuë. Inasoꞌ huaꞌan, copirno tananën aꞌpainaꞌpi. Ama nara apiratiincoso marëhuëꞌ aninshitërahuë. Yosë chinotacaso pëi pairanën yaꞌcoanaroꞌsa marëꞌ nohuantarahuë. Ninano pairanën yaꞌcoanaroꞌsa marëntaꞌ, nohuantarahuëꞌ. Caora pëinëhuë marëntaꞌ, nohuantarahuë niꞌton, aninshitërahuë.
Inapita natanpatora, Sinioro nohuanton co manta copirno apiratërincohuëꞌ.
9Yahuëꞌpatora, sontaro huaꞌanoꞌsa caꞌtanaincoso marëꞌ aꞌparin. Cahuarioroꞌsaquë inahuanta imaquirinaco. Sontaroꞌsanta cahuarioroꞌsaquë chachin imaquirinaco. Iopiratisiiꞌ aquëtëran piꞌi yaꞌconinso parti canquihuatoira, chirinchiroꞌsa copirnori quirica aꞌpatiirinsoꞌ, quëtëraꞌpiarahuë. 10Ina parti cato huaꞌanoꞌsa yaꞌhuëpi: Sanparato, Topiasë, inapita itopisoꞌ. Sanparatosoꞌ Oron piyapi. Yaꞌhuërëꞌ Topiasësoꞌ, Amon piyapi. Inapitasoꞌ israiroꞌsa catahuaꞌhuaso marëꞌ huëꞌsarahuëso natantahuatonaꞌ, paꞌpi noꞌhuitopi.
Ninano pairanën acoantacaso shaꞌhuirinsoꞌ
11-12Napoin quëran Quirosarinquë canquirahuë huachi. Canquirahuato, cara tahuëri chinotërahuë. Naporo tashi caraya quëmapiꞌsarëꞌco huëꞌërai quëran huënsërai. Naporoꞌ Yosë ayonquirincosoꞌ, co inso tëranta shaꞌhuichátërarahuëꞌ. Huënsërahuatoi paꞌnai. Casáchin cahuarioquë paꞌnahuë. Aꞌnapitasoꞌ, topinan ira patopi. 13Naporo tashi chachin motopiana yaꞌcoana, itopitaquëchin pipirahuë. Panca yaꞌhuan huinan itopiquë paꞌsarahuë. Ina quëran amoro inquinan yaꞌcoana itopiquë paantarahuë. Papo pochin ninano pairanën nírarahuë. Yaꞌipi ohuatopi. Onconanënpitanta iráca ahuiquitopi nírarahuë. 14Ina quëran huinan yaꞌcoana itopiquë paantarahuë. Ina pirayan copirno iꞌsha taparinsonta yaꞌhuërin. Inaquë huarëꞌ noya cahuarioquë paporahuëꞌ, ina aquëtësoꞌ, co huachi onpo pacasohuëꞌ niconin. 15Tashi chachin iꞌsha imacontarahuë. Ina quëran ninano pairanën nocorahuë. Tahuërëantarahuato, pipirahuëtaquëchin yaꞌcoantarahuë.
16Huaꞌanoꞌsasoꞌ, paꞌnahuësoꞌ co nitotopihuëꞌ. Aꞌnapita cotioroꞌsantaꞌ, co manta shaꞌhuichátërarahuëꞌ. Corto huaꞌanoꞌsaꞌ, maꞌhuanoꞌsaꞌ, huaꞌanoꞌsaꞌ, topinan piyapiroꞌsaꞌ, inapitanta pairaquë catahuatacaiso marëꞌ co nonchátërarahuëꞌ. 17Naporoꞌ shaꞌhuitërahuë huachi:
—Yaꞌipinpoa naponin yaꞌhuëarëhuasoꞌ, nitotërëhuaꞌ. Quirosarin ninanoquë pëiroꞌsa ohuatëraꞌpiapi. Paira onconanënpitanta iráca ahuiquitopi. Napoaton sacai yaꞌhuëarëhuaꞌ. Ninano pairanën acoantaꞌhuaso marëꞌ huëꞌnahuë. Huëco canpitanta nicatahuatëhua aꞌcanhuaꞌ. Inapotohuatëhua co huachi tëhuáponënpoahuëꞌ, itërahuë. 18Ina quëran Yosë catahuarincosopita shaꞌhuitërahuë. Ina nohuanton copirno nanan quëtërincosonta shaꞌhuitërahuë. Napotohuatora inapitasoꞌ:
—¡Huëco paꞌahua caniaritahuaꞌ! topi. Ina quëran sacatacaiso marëꞌ noya ninontatona niachinicancanpi. 19Sanparato, Topiasë, inapitaso napoaponahuë nocanatonacoi, tëhuarinacoi:
—¿Maꞌcha canpitanta inaquë yaniantarama nicaya? ¡Copirno ipora noꞌhuitomaꞌ, co huachi yanatëantaramahuëꞌ! itërinacoi. Aꞌna huaꞌaontaꞌ, tëhuarincoi. Inaso Arapia piyapi. Quisimo itopi.
20Tëhuapirinacoihuëꞌ:
—Yosë inápaquë huaꞌanëntërinsoꞌ, catahuararincoi noya sacatarai. Quiyasoꞌ ina piyapinënpitacoi niꞌtoi, Quirosarin ninano anoyataantarai. Canpitaso nisharoꞌsanquëmaꞌ. Co yaꞌcopitamaso yaꞌhuërinhuëꞌ, itërahuë.
Currently Selected:
Nehemías 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
