Éxodo 8

1Naporoꞌ Yosëri Moisësë itaantapon:

—Paaton copirno nontaantaquëꞌ: “Piyapinëhuëpita chinotinacoso marëꞌ inotëro parti aꞌpaquë paꞌinaꞌ. 2Coꞌsoꞌ aꞌpahuatanhuëꞌ, yaꞌipi yaꞌhuërama parti huarira huëcapaiarinquëmaꞌ. 3-4Niroiquë naꞌamiataponaꞌ. Pipirahuatonaꞌ, quëma pëinënquë yaꞌconapi. Catahuarinquënsopita huaꞌanoꞌsa pëinënaquënta yaꞌconapi. Yaꞌipi piyapinënpita pëinënaquë yaꞌconapi. Niitatënquëma apiponquëmaꞌ. Patoanaroꞌsaquë, huëꞌëramaquë, pan ninamaquë inaquëpita yaꞌconapi, tënin,” itëquëꞌ, itërin.

5Napotërinso chachin Moisësësoꞌ paaton copirno nontoonin. Nontopirinhuëꞌ, co yanatëtërinhuëꞌ. Napoaton Yosëri camairin: “Aaron shaꞌhuitëquë huaranën iiroꞌsaquë ihuëꞌin. Iꞌshanaroꞌsaꞌ, sonoroꞌsaquë, inaquëpita huarira pipicaso marëꞌ ihuëꞌin. Ina quëranpita pipitona yaꞌipi Iquipito parti yanquërapi,” itërin.

6Moisësëri shaꞌhuitohuachina, Aaronso yaꞌipi iiroꞌsa yaꞌhuërinquë huaranën ihuërin. Ina iiroꞌsa quëran huarira pipirahuatonaꞌ, yaꞌipi Iquipito roꞌtë yanquëëtërin. 7Napoaponahuëꞌ, Iquipito pënotonoꞌsanta pënotatonaꞌ, iꞌ quëran huarira ocoipi antaꞌ. Inapitanta yaꞌipi ina roꞌtë yanquëëtopi. 8Copirnoso nipirinhuëꞌ, Moisësë, Aaron, inapita amatahuaton itapon:

—Sinioro nontoco huariraroꞌsa inquichincoi, co huachi ahuantëraihuëꞌ. Inquitohuachincoi naporo huarëꞌ ina chinotacaso marëꞌ israiroꞌsa aꞌparahuë, itërin.

9Napotohuachina:

—Noyapaꞌ. Shaꞌhuitoco nipachin onporota nohuantëran canpita marëꞌ Yosë nontaꞌhuasoꞌ. Ina nontohuato, huariraroꞌsa quëran anaꞌintërinquënsoꞌ, copi tapon. Catahuarinquënsopita huaꞌanoꞌsaꞌ, piyapinënpita, inapitanta copi taꞌpapon. Iꞌquëráchin yaꞌhuaponaꞌ, itërin Moisësëri.

10-11—¡Tashiraya chachin copichin tënahuë taꞌa! tënin copirno.

—Naporanso chachin mini nisarin, tashiraya copi taꞌparinquëmaꞌ. Iꞌquëráchin yaꞌhuëhuachinaꞌ, co huachi apiponquëmahuëꞌ. Inapohuachin: “Tëhuënchachin israiroꞌsari chinotopisoꞌ, chini chiníquën nanantërin tosaran,” itërin Moisësëri.

12Moisësë, Aaron, inapita copirno pëinën quëran pipipi huachi. Ina quëran huariraroꞌsa aꞌparinso noquitacaiso marëꞌ Moisësë Yosë nontërin. 13Nontërinso chachin Yosëri aꞌpanirin. Yaꞌipi huariraroꞌsa pëiroꞌsaquë, aipiran, iminoꞌsaquë, inaquëpita yaꞌhuërinsoꞌ, taquipi huachi. 14Tëꞌyatacaiso marëꞌ yontonpirinahuëꞌ, co yaꞌipi inquiyátërasoihuëꞌ, chanatërin. Napoaton yaꞌipi Iquipito roꞌtëquë paꞌpi anahuanin. 15Napoaponahuëꞌ, Yosë naporinso chachin nani huarira inquitohuachina copirnosoꞌ, Moisësë, Aaron, inapita co natërinhuëꞌ. Co natantochináchinhuëꞌ cancantaton co israiroꞌsa yaaꞌparinhuëꞌ.

Cararo anaꞌintacaso marëꞌ ico anaꞌatërinsoꞌ

16Naquëranchin Yosëri, Moisësë itapon: “Aaron shaꞌhuitëquëꞌ: Huaranën quëran, noꞌpaquë amocan yaꞌhuërinso ahuëꞌin. Inapohuachin, yaꞌipi Iquipito roꞌtëquë ico naꞌapon huachi,” itërin.

17Yosëri camairinso chachin, Moisësë, Aaron, inapita nipi. Aaroni noꞌpaquë amocan yaꞌhuërinsoꞌ, ahuërin. Inapohuachina, yaꞌipi Iquipitoquë amocan yaꞌhuërinsoꞌ, ico taranin. Naꞌasahuatonaꞌ, piyapiꞌsaꞌ, maꞌsharoꞌsaꞌ, inapita shiꞌshirapi huachi. 18Iquipito pënotonoꞌsantaꞌ, pënotatona ico yaanaꞌatopirinahuëꞌ, co nanitopihuëꞌ. Icori, piyapiꞌsaꞌ, maꞌsharoꞌsaꞌ, inapita aparisitapi. 19Napoaton pënotonoꞌsasoꞌ copirno nontapona paꞌpi: “¡Yosë nohuanton poꞌsarëhuaꞌ!” itopi.

Napotopirinahuëꞌ, Yosë naporinso chachin, Iquipito copirnoso co natëtërinhuëꞌ.

Catapiniro anaꞌintacaso marëꞌ tonca anaꞌatërinsoꞌ

20Naquëranchin Yosëri, Moisësë itapon:

—Tashiraya anoachin capayatahuaton, iꞌquë paꞌmaquëꞌ. Inaquë copirno paꞌmahuachin, nacapiquëꞌ. Nacapirahuaton shaꞌhuitaantaquëꞌ: “Naporin Yosë: ‘Piyapinëhuëpita chinotinacoso marëꞌ aꞌpaquë paꞌinaꞌ. 21Co yaaꞌpahuatanhuëꞌ, paꞌpi notohuaroꞌ tonca aꞌpataranquën. Yaꞌipi catahuarinquënsopita huaꞌanoꞌsaꞌ, piyapinënpita, inapitarëꞌquën chachin shiꞌshiinquëmaso marëꞌ aꞌpataranquëmaꞌ. Pëianaquë huarëꞌ tonca naꞌapon. Noꞌpaquëntaꞌ, tomon tomoncharápon. 22-23Cosin partiso nipirinhuëꞌ, co tonca aꞌparahuëꞌ. Inaquëso piyapinëhuëpita yaꞌhuëpi niꞌton, co aꞌparahuëꞌ. Canpitaráchin aparisitaponquëmaꞌ. Israiroꞌsasoꞌ, co aparisitapihuëꞌ,’ tënin. Tashiraya chachin napoarin. Inapohuachin: ‘Tëhuënchachin Siniorosoꞌ, chiníquën nanantaton anaꞌintarincoi,’ tapon,” itërin.

24Shaꞌhuitërinso chachin, Yosë ninin. Paꞌpi notohuaroꞌ tonca anaꞌatahuaton, aꞌparin. Copirno, ina catahuapisopita huaꞌanoꞌsaꞌ, piyapinënpita, inapita pëinënaquë yaꞌconpi. Yaꞌconatonaꞌ, aparisitapi. Yaꞌipi Iquipito parti yanquëatona tapipi huachi.

25Ina niꞌsahuaton copirnosoꞌ, Moisësë, Aaron, inapita amataantarin. Huëꞌpachinara itapon:

—Paco nipachin Yosënëma chinotocoꞌ. Ama napoaponahuëꞌ, áquë pacosohuëꞌ, itërin.

26—Co naporinhuëꞌ. Coꞌsoꞌ áquë paꞌpatoihuëꞌ, iquipitoroꞌsa Yosë chinotatoi maꞌsha tëparaisoꞌ niꞌsapi. Ina maꞌsharoꞌsaso canpitari mosharama niꞌton, naꞌpiquëtahuatonacoi tëpaponacoi. 27Napoaton, inotëro parti pacaꞌhuaiso yaꞌhuërin. Cara tahuëri iratëraiꞌpaꞌ maꞌsha tëparahuatoi, Yosë chinotarai. Ina pochin camairincoi niꞌtoi napoarai, itërin.

28—Inta nipachin. Inotëro parti pacoꞌ, inaquë Yosënëma chinotocoꞌ. Napoaponahuëꞌ, ama coꞌchachin áquë pacosohuëꞌ. Nisahuaton ca marëꞌ Yosë nontocoꞌ, tënin.

29Copirno napohuachina, Moisësëso tapon:

—Apira pipihuato Yosë nontarahuë. Tashiraya chachin toncaroꞌsa patarinquën. Catahuarinquënsopita, piyapinënpita, inapitanta patacaiso marëꞌ ina nontarahuë. Ama napoaponahuëꞌ, nonpintocoisohuë huachi. Onpopionta aꞌpacoi paꞌi Yosë chinochi, itërin.

30-31Moisësëso copirno pëinën quëran pipirahuaton, Yosë nontërin. Toncaroꞌsa aꞌpacaso marëꞌ nontërin. Naporo chachin toncaroꞌsa copirno patërin. Ina catahuapisopita, piyapinënpita, inapitanta patohuachina capa ninin huachi. 32Napoaponahuëꞌ, co naporo tëranta natëtërinhuëꞌ. Co natantochináchinhuëꞌ cancantaton, co israiroꞌsa aꞌparinhuëꞌ.

Currently Selected:

Éxodo 8: cbt

Highlight

Copy

Compare