Éxodo 7
7
1Napotopirinhuëꞌ, Yosëri itaantapon:
—Niꞌquëꞌ. Copirno niꞌtonënquë ca yaꞌhuërënamëhuë maꞌsha nicacaso marëꞌ nani acoranquën. Iya masho Aaronso nipirinhuëꞌ, quëma yaꞌhuërënamën nonsarin. 2Yaꞌipi camaitërahuësoꞌ, quëmari Aaron shaꞌhuitaran. Yaꞌhuërëꞌ inantaꞌ, inachachin Iquipito copirno shaꞌhuitarin. Noꞌpanën quëran israiroꞌsa aꞌpacaso marëꞌ shaꞌhuitarin. 3-5Inaso nipirinhuëꞌ, co natëponquëmahuëꞌ. Ca nohuanto co natëponquëmahuëꞌ. Co natëpirinquëmahuëꞌ, iquipitoroꞌsa cari anaꞌintarahuë. Ina marëꞌ chiníquën nanantato paꞌpi huëhuëpiro nininsopita maꞌsha aꞌnoarahuë. Naporo huarëꞌ aꞌpaponquëmaꞌ. Piyapinëhuëpita naꞌcon aparisitopi niꞌton, ina pochin iꞌhuërëtarahuë. Naporo huarëꞌ iquipitoroꞌsa nohuitarinaco: “Tëhuënchachin mini israiroꞌsasoꞌ, Sinioro chinotopi,” taponaꞌ. Ina pochin israiroꞌsaꞌ, Iquipito quëran ocoiarahuë. Sontaroꞌsa pochin pipiapi, itërin.
6Moisësë, Aaron, inapitasoꞌ Yosëri shaꞌhuitërinso chachin yaꞌipi nipi huachi. 7Moisësë posa shonca piꞌipitapasoꞌ, Aaronta posa shonca cara piꞌipitarin. Naporoꞌ Iquipito copirno nontopi.
Moisësë, Aaron, inapita copirno nontapona paantapisoꞌ
8-9Yosëri Moisësë, Aaron inapita itaantapon:
—Iquipito copirno nontapoma paꞌpatamaꞌ: “Maꞌsha nipachin sacai nininso aꞌnoco niꞌi,” itarinquëmaꞌ. Napotohuachinquëmaꞌ, quëmari Moisësë, Aaron shaꞌhuitëquë huaranën noꞌpaquë tëꞌyachin. Copirno niꞌtonënquë tëꞌyatohuachin yaꞌhuan taraanin huachi, itërin.
10Cato chachin paꞌsahuatonaꞌ, copirno niꞌconpi. Nontohuachinara inari itapon: “Chiníquën nanantëramaso nipachin, aꞌnotoco niꞌi,” itërin. Napotohuachina Yosëri camairinso chachin nipi. Copirno, ina catahuapisopita huaꞌanoꞌsaꞌ, inapita niꞌtonënquë Aaronsoꞌ, huaranën tëꞌyatërin. Anotaso chachin yaꞌhuan taranin huachi.
11Copirnoso nipirinhuëꞌ, nitotonoꞌsaꞌ, pënotonoꞌsaꞌ, inapita amatërin. Inapitanta pënotatonaꞌ, inachachin nicacaiso marëꞌ amatërin. 12Inapitanta huaranëna tëꞌyatohuachinara, aꞌnaroáchin yaꞌhuan taranpi antaꞌ. Napoaponahuëꞌ, Aaron yaꞌhuanëni aꞌnapita pëꞌyarin. 13Yosë naporinso chachin, Iquipito copirnoso ina nicaponahuëꞌ, co natantochinachinhuë cancantërin. Napoaton Moisësë, Aaron inapita co natërinhuëꞌ.
Shoncaro anaꞌintërinsoꞌ
Yaꞌnan anaꞌintacaso marëꞌ Niroiꞌ huënaiꞌ atarantërinsoꞌ
14Ina quëran Yosëri, Moisësë nontaton itaantapon: “Iquipito copirno co piꞌpisha tëranta nohuantërinhuëꞌ, piyapinëhuëpita aꞌpacasoꞌ. 15Napoaton tashiraya tashiramiachin copirno Niroiꞌ yonsanquë ninaquëꞌ. Inaquë paꞌpachin, niꞌsaran. Huaranën yaꞌhuan taraninsonta quëpaquëꞌ. 16-17Inaquë quënanahuaton shaꞌhuitaran: ‘Sinioro chinotëraisoꞌ, aꞌparinco napotaꞌhuanquënsoꞌ: “Piyapinëhuëpita chinotinacoso marëꞌ inotëro parti aꞌpaquë paꞌinaꞌ. Iꞌhua chachionta nani shaꞌhuitëranquën. Co yanatëtëranhuë niꞌton, aꞌna quëran yaꞌhuërëꞌ tëniantaranquën. Caso Sinioroco niꞌton, natëancoso yaꞌhuërin,” tënin. Ina marëꞌ huaranëhuë quëran Niroiꞌ ahuëirarahuë. Inapotohuato, yaꞌipi iꞌ chachin huënaiꞌ taraanin huachi. 18Samiroꞌsa taquiaponaꞌ. Naporahuaton anaiarin niꞌton, iquipitoroꞌsa amirotapona oꞌocaisoꞌ,’ itëquëꞌ.
19Nani copirno shaꞌhuitohuatan, Aaron camaiquë huaranën quëran iiroꞌsa ihuëchin. Iꞌshanaroꞌsaꞌ, sonoroꞌsaꞌ, iꞌsha tapapisopita, inaquëpitanta ihuëchin. Ihuëtohuachin, yaꞌipi ina iꞌsha huënaiꞌ taranarin huachi. Orinanoꞌsaquënta iꞌsha tapapisoꞌ, huënaiꞌ taranapon. Naꞌpi quëran, nontë quëran ina quëranpita nicatona iꞌsha tapapisoꞌ, napoapon,” itërin.
20Moisësë, Aaron, inapita Yosëri camairinso chachin yaꞌipi nipi. Copirno, ina catahuapisopita huaꞌanoꞌsaꞌ, inapita niꞌtonënquë Aaronsoꞌ, huaranën ihuëto ihuëtotarin quëran, Niroiꞌ ahuëirin. Naporo chachin yaꞌipi iꞌ huënaiꞌ taranin huachi. 21Samiroꞌsa, taquipi. Naporahuaton anairin niꞌton, iquipitoroꞌsa amirotatonaꞌ, co nanitopihuë oꞌocaisoꞌ. Yaꞌipi Iquipito parti isharoꞌsa huënaisáchin ninin.
22-23Napoaponahuëꞌ, Iquipito pënotonoꞌsanta pënotatonaꞌ, ina chachin niantapi. Napoaton copirnosoꞌ, Yosë naporinso chachin, co yanatëtërinhuëꞌ. Co natëtatonhuëꞌ, yaꞌhuërinquë paantarin. 24Iquipitoroꞌsasoꞌ, co tëquëin oꞌocaisoꞌ nanitatonaraihuëꞌ, oꞌocaiso marëꞌ yonsanquë posoroꞌsa ihuapi.
Catoro anaꞌintacaso marëꞌ huarira anaꞌatërinsoꞌ
25Yosë nohuanton iiroꞌsa huënaiꞌ taranin quëran huarëꞌ canchisë tahuëritarin.
Currently Selected:
Éxodo 7: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
