Amós 5
5
Yosë chachin tahuërëtaantacaiso marëꞌ pënëninsoꞌ
1Israiroꞌsanquëmaꞌ. Ipora shaꞌhuitaantaranquëmasoꞌ, noya natancoꞌ:
Canpita yonquiatënquëmaꞌ,
nichimiantohuatëra sëtatë osharëso pochin nisarahuë.
2Canpitaso israiroꞌsanquëma poꞌnamaꞌ:
Nanon co soꞌyayátëraponahuëꞌ aꞌnanaya yaꞌhuërinquë chiminaton,
co macari ananpitaantarinsohuë pochin niconamaꞌ.
3-4Siniorosoꞌ Yosë niꞌton, napotarinquëmaꞌ:
“Aꞌna Israiro ninano quëran ahuëtacaiso marëꞌ
huaranca sontaroꞌsa aꞌpahuatamara, pasaíchin huënantaponaꞌ.
Aꞌna ninano quëransoꞌ pasa aꞌpahuatamaꞌ,
shoncaíchin huënantaponaꞌ.
Napoaponahuëꞌ, noya nanpirápamaso nohuantohuatamaꞌ,
ca chinotoco catahuainquëmaꞌ,” tënin Sinioro.
5Naquëranchin Sinioro taantarin:
“Ama Pitiriquë moshatamaso marëꞌ pacosohuëꞌ.
Ina ninanosoꞌ, ataꞌhuantaponaꞌ.
Co Quiricaroquë tëranta moshatamaso marëꞌ pacamaso yaꞌhuërinhuëꞌ.
Inaquë yaꞌhuëpisopitasoꞌ, onpopionta
inimicoroꞌsari aꞌna noꞌpaꞌpaꞌ quëpaponaꞌ.
Co Piirsipa ninanoquë tëranta moshatamaso marëꞌ
paacamaso yaꞌhuërinhuëꞌ,” tënin.
6Noya nanpirápamasoꞌ nohuantohuatamaꞌ,
Sinioro chinotoco catahuainquëmaꞌ.
Coꞌsoꞌ ina chinotohuatamahuëꞌ,
inimiconëmapita aꞌpatiarinquëmaꞌ.
Yaꞌhuëramaso noꞌpaꞌ, ahuiquitapi.
Co inso tëranta Pitiriquë yaꞌhuërinsoꞌ, ina pën atácopitarinhuëꞌ.
7Aꞌnaquën noya nisapirinahuëꞌ,
co noyahuëꞌ nisapiso pochin maꞌsha onpotëramaꞌ.
Inapoatoma noya nicacasoꞌ, nocanatë pochin nitëramaꞌ.
Ina marëꞌ canpitasoꞌ, ¡maꞌhuantacha nisarama paya!
8Inápaquë tayora huëntonoꞌsa chitoro pochin yaꞌnopiso yaꞌhuërin.
Aꞌnasoꞌ, Priyatisë itopi. Aꞌnantaꞌ, Orion itopi.
Yaꞌipi inapita Siniorori acorin.
Ina nohuanton tashinta tahuëririn.
Tahuërintaꞌ, ina nohuanton tashirin.
Ina nohuanton marë tomontërin.
Ina quëran noꞌpaquë oꞌnanin.
Inasoꞌ, Sinioro. Ina pochin nohuitocoꞌ.
9Chiníquën nanantopisopita, chiníquënoꞌsaꞌ,
inapita inari ataꞌhuantarin.
Noyá niacorapipisoꞌ ninanontaꞌ, inari chachin ataꞌhuantarin.
10Aꞌnaquën coisëroꞌsa noꞌtëquën shaꞌhuipi.
Canpitariso napoaponahuëꞌ, co quëꞌyaramahuëꞌ.
Quënaninsoꞌ noꞌtëquën shaꞌhuinaꞌpiroꞌsantaꞌ, co quëꞌyaramahuëꞌ.
Ina marëꞌ canpitasoꞌ, ¡maꞌhuantacha nisarama paya!
11Popriyaroꞌsa ihuatomaꞌ, naꞌcon naꞌcon trico maꞌparamaꞌ.
Naporamaso marëꞌ paꞌpi noya pëiroꞌsa yaꞌhuëtapomarahuëꞌ,
co inaquë yaꞌhuëapomahuëꞌ.
Noyápiachin oparoroꞌsa yaꞌhuëtapomarahuëꞌ,
co inaquëran huino nicatoma oꞌopomahuëꞌ.
12Paꞌpi co noyahuëꞌ ninamasopita caso nitotërahuë.
Oshahuanamasontaꞌ, co pichinahuanhuëꞌ niconin.
Noya nipisopita ihuaramaꞌ.
Maꞌhuanoꞌsa pahuërëhuachinquëmara,
co huachi noꞌtëquën anaꞌintëramahuëꞌ.
Coisëroꞌsanta maꞌhuanoꞌsa catahuapi niꞌton,
popriyaroꞌsara anaꞌintopi.
13Ipora yaꞌhuëpisopita, paꞌpi co noyahuëꞌ nipi.
Napoaton yonquinahuanoꞌsasoꞌ, co manta topihuëꞌ.
14Canpitaso nonpatamara:
“Sinioro canpoasoꞌ catahuararinpoaꞌ,” tënamaꞌ.
Co noyahuëꞌ ninamasopita aꞌporahuatomaꞌ,
nanpicamaso marëꞌ noya nicacamasoꞌ cancantocoꞌ.
Napohuatama tëhuënchinsoꞌ, naporamaso noꞌtëquën nisarin.
15Co noyahuëꞌ ninamasopita noꞌhuicoꞌ.
Noya nicacamasoso nipirinhuëꞌ, paꞌyatocoꞌ.
Nanan anoyatahuatamaꞌ, noꞌtëquënáchin shaꞌhuicamasoꞌ cancantocoꞌ.
Tapona naporamaso marëꞌ carayanquëma chaꞌëramasoꞌ,
Yosë nosoroápirinquëmahuëꞌ.
Inasoꞌ Sinioro. Yaꞌipi nanitaparin.
16-17Isonta Sinioro shaꞌhuitaantarinquëmaꞌ:
“Ca nohuanton nani prasaquë naꞌnëpomaꞌ.
Nani cachiquë co napion ancantatomaꞌ, noncaropomaꞌ.
Notohuaroꞌ chimipiroꞌsa yaꞌhuëapon niꞌton,
canacaiso marëꞌ naꞌnëroꞌsa nipisopita,
imin camayoroꞌsaꞌ, inapita naꞌnëcaiso marëꞌ amatapomaꞌ.
Yaiꞌpi oparoroꞌsaquë naꞌnëpomaꞌ.
Anaꞌintaꞌhuanquëmaso marëꞌ oꞌmahuato, napoaramaꞌ.
Ca Sinioroco napotaranquëmaꞌ.
Caso Yosëco yaipi nanitaparahuë, tënahuë,” tënin.
18Ina quëran Sinioro taantarin:
“Aꞌnaquëma anaꞌintaꞌhuaso tahuëri nanicasoꞌ, naꞌcon nohuantëramaꞌ.
Naporamasopitasoꞌ, ¡maꞌhuantacha nisarama paya!
Ina tahuëri maꞌsona onpocamasoꞌ ¡co canpita nitotëramahuëꞌ!
Ina tahuëri nanihuachin paꞌpi tashinantápon.
19Paꞌpiniꞌ taꞌananpiapomarahuëꞌ,
tocaniꞌ yaꞌhuërëꞌ nacapiantarinso pochin cancantapomaꞌ.
Aꞌnaquëonta pëinënquë yaꞌconahuaton, pairaquë pisanaso chachin
yaꞌhuanarinso pochin cancantapomaꞌ.
20Tëhuënchachin anaꞌintaꞌhuaso tahuëri nanihuachin, tashinantápon.
Paꞌpi tashinantápon niꞌton, co manta yaꞌnoarinhuëꞌ,” tënin.
21Naquëranchin Sinioro taantarin:
“Chinotamacoso marëꞌ pita ninamasopita, co quëꞌyarahuëꞌ.
Niyontonpatamara paꞌyápiro nipiramahuëꞌ, co costarincohuëꞌ.
22Noya nicatomaco maꞌsha tëpatoma yaꞌipi ahuiquitopiramahuëꞌ,
carisoꞌ co niꞌcaꞌhuaso tërantaꞌ, nohuantërahuëꞌ.
Trico, sipata, inapitanta quëshihuatamacora co nohuantërahuëꞌ.
Toroaꞌhuaroꞌsa amoshin nipisopita
nanan anoyatërëhuaso marëꞌ tëparamasontaꞌ, co nohuantarahuëꞌ.
23Chinotatomaco cantahuatamara, nonca noncatoconamaꞌ.
Naporamaso amirahuë niꞌton, ¡taꞌtoco huachi!
Chinotatomaco arparoꞌsanta piꞌniramasoꞌ, ¡co huachi yanatanahuëꞌ!
24Pancaiꞌ paꞌirinso pochin noya ninicatomaꞌ,
noꞌtëquënáchin niyonquirapico tëhuënchinsoꞌ.
Huinan co yanirinsohuë pochin noya piyapi nicoꞌ,” tënin.
25Naquëranchin Sinioro taantarin:
“Israiroꞌsanquëma canpitasoꞌ, iráca catapini shonca piꞌipi
inotëro parti paꞌnamaꞌ.
Inaëchin pacasëmaꞌ,
co onporonta maꞌsha chinotamacoso marëꞌ tëparamahuëꞌ.
Naporahuaton co maꞌsha tëranta quëshiramacohuëꞌ.
26Sicoto itopisoꞌ mamanshi,
copirnonëma pochin nicatoma quëparamaꞌ.
Tayora nonanamasoꞌ Quiono itopisontaꞌ, quëparamaꞌ.
Inapita mamanshiroꞌsasoꞌ, canpitaora chachin ninamaꞌ.
‘Yosëroꞌsa nonanhuaꞌ,’ taꞌtoma naporamaꞌ.
27Naporamaso marëꞌ aꞌna parti quëpaponënquëmaꞌ.
Tamasco ninano aquëtëran tëꞌyataponënquëmaꞌ.
Ca Sinioroco napotaranquëmaꞌ.
Caso Yosëco yaꞌipi nanitaparahuë.
Ina pochin nohuitamacoso yaꞌhuërin,” tënin.
Currently Selected:
Amós 5: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
