Amós 6
6
Israiroꞌsa anaꞌintacaso yaꞌhuërinsoꞌ
1Quirosarinquë yashi yashin yaꞌhuëpisopita,
¡maꞌhuantacha nisapi paya!
Samariaquëntaꞌ: “Noya yaꞌhuëarihuaꞌ. Co manta onpoarihuahuëꞌ,”
topisopita, ¡maꞌhuantacha nisapi paya!
“Quirosarin, Samaria, inapita ninanoroꞌsasoꞌ,
chini chiníquën nanantopi,” topi huaꞌanënpita.
Napoaton aꞌnapita israiroꞌsasoꞌ,
inapitari catahuacaiso marëꞌ paapapi.
2Paapahuachinara, huaꞌanoꞌsari:
“Carini ninanoquë paꞌsahuatomaꞌ,
onpopinsona yaꞌhuëhuanoꞌsa yaꞌhuëpisoꞌ, niꞌconcoꞌ.
Ina quëran Amato ninanoquë paantacoꞌ. Inasoꞌ, panca ninanoꞌ.
Amato quëran Cato ninanoquë paꞌmantacoꞌ.
Inasoꞌ, huiristinoꞌsa ninanonënaꞌ.
Inaquëpita paꞌsahuatomaꞌ, onpopinsona yaꞌhuëpisoꞌ, niꞌconcoꞌ.
¡Inapita ninanoroꞌsasoꞌ, co Israiro noꞌpaquë pochin yaꞌhuëpihuëꞌ!
¡Apinapichin noꞌpaquë yaꞌhuëpi!” itopi.
3-4Inapoatoma canpitasoꞌ,
Yosë ataꞌhuantiinquëmaso tahuëri, co yayonquiramahuëꞌ.
Nipirinhuëꞌ, co noyahuëꞌ nisápatoma ina tahuëri amanotaramaꞌ.
Noyápiachin pëꞌsararoꞌsa
Huiri pomon quëran nipinan yaꞌhuëtërinquëmaꞌ.
Pitaroꞌsa tahuëri nipachina, inaquë noyá niótënamaꞌ.
Toroaꞌhuaroꞌsa amoshin yaꞌhuëtërinquëmasoꞌ, carniroaꞌhuaroꞌsaꞌ,
inapita tëparahuatoma noya coshatáramaꞌ.
5Pirinan pihuipoma pochin manta tëranta cantaramaꞌ.
Tapi copirno pochin
co niꞌchinpisohuëꞌ piꞌnicaisoꞌ, pihuicaisoꞌ, inapita ocoipitëraramaꞌ.
6Huino oꞌotoma noꞌpiráramaꞌ.
Noya noya huaꞌsaiꞌ pashiramaꞌ.
Canpitaso taꞌhuantochináchin nisapiramahuëꞌ:
“Maꞌta pini,” toconamaꞌ.
7Naponama niꞌton,
canpitaꞌton Sinioro aꞌna noꞌpaꞌpaꞌ tëꞌyatarinquëmaꞌ.
Pita nicatoma noncaroyantëramasoꞌ, copi tapon huachi.
8Ina quëran Yosëso taantapon:
“Caso Yosëco yaꞌipi nanitaparahuë.
Caso Sinioroco niꞌto, noꞌtëquën shaꞌhuitaranquëmaꞌ:
‘Israiroꞌsasoꞌ, yanocantopi. Inapopiso co quëꞌyarahuëꞌ.
Noya pëiroꞌsa yaꞌhuëtopi niꞌton,
“co manta onpoaraihuëꞌ” topisontaꞌ, co quëꞌyarahuëꞌ.
Ca nohuanton inimiconënapitari
Samariaquë yaꞌhuëpisopita minsëaponaꞌ.
Inapotatonaꞌ, yaiꞌpi maꞌshanënapita mataponaꞌ,’ tënahuë,” tënin.
9Naporoꞌ aꞌna pëiquë shonca yaꞌpi quëparitohuachinaꞌ,
shonca chachin chiminaponaꞌ.
10Naporo tahuëriꞌsa nanpipisopitasoꞌ, paꞌpi tëꞌhuaponaꞌ.
Aꞌnasoꞌ, aꞌna pëiquë yaꞌconahuaton,
quëmopinën chimininsoꞌ, aꞌpëcaso marëꞌ yonisarin.
Patoanaroꞌsaquë yonisoꞌ, aꞌnara quënanahuaton:
“¿Yaꞌhuëarin aquëtë huarëꞌ piyapi acoana?” itapon.
“Capa, co yaꞌhuërinhuëꞌ,” itarin inarinta.
Napotahuaton, tëꞌhuanënquë napopitarapon:
“¡Taꞌtëquëꞌ! niꞌquëna aquëtë huarëꞌ nonaton, Sinioro chinototan.
Napohuatan, inaso natanatënquën canponta tëpahuachinpoꞌ,” itapon.
11Sinioro chachin panca pëiroꞌsa yaꞌhuërinsopita,
ataꞌhuantacaiso camaitapon niꞌton, inapoaponaꞌ.
Huaꞌhuishin pëiroꞌsantaꞌ, inapotacaiso camaitapon.
Napohuachina, yaꞌipi pëiroꞌsa taꞌhuantapon.
12¡Cahuarioroꞌsasoꞌ, co nanitopihuëꞌ natëtëroꞌsa paꞌtontacaisoꞌ!
¡Noꞌpaꞌ ohuërëpiquë ohuacaroꞌsasoꞌ, co marë ohuërëaponahuëꞌ!
“Coisëroꞌsa catahuainacoi,” taꞌtona aꞌnaquënso huëcapaipirinënquëmahuëꞌ,
canpitarisoꞌ noniatë pochin nitatomaꞌ, tëpatë pochin nitëramaꞌ.
Inapoatomaꞌ, co inapocasohuëꞌ nininso ninamaꞌ.
Catahuamaso marëꞌ ninarinëmasopita co catahuatomahuëꞌ,
naꞌcon naꞌcon anoꞌhuitëramaꞌ.
13Notiparo ninanosoꞌ, aꞌnapitari huaꞌanëntapirinhuëꞌ,
inapita canarahuatoma mataantaramaꞌ.
Ina marëꞌ canpitasoꞌ: “Ma noyacha ahuëtërai paya,” toconamaꞌ.
“Quiyaora chiniatoi, Carnain ninanontaꞌ, minsërai,”
tomantatoma topinan quëran capa cancantëramaꞌ.
14Naporamaso marëꞌ noya natanco israiroꞌsanquëmaꞌ.
Sinioro chachin shaꞌhuitarinquëmaꞌ. Inasoꞌ Yosë niꞌton, yaꞌipi nanitaparin:
“Naporamaso marëꞌ aꞌna nacion sontaroꞌsa
ahuëinënquëmaso marëꞌ aꞌpataranquëmaꞌ.
Inapitasoꞌ huëꞌpachina, pëtëtë parti Amato pëntoinan itopi quëran,
pëꞌnatë partinta Arapa iꞌsha itopiquë huarëꞌ aꞌparisitarinënquëmaꞌ,” tënin Sinioro.
Currently Selected:
Amós 6: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
