Ro 5

Chanru natawmank li tiikil ch'oolej

1Jo'kan utan, tiikob'resinb'il chik li qach'ool xb'aan li paab'aal, ut wanko sa' tuqtuukil usilal rik'in li Yos sa' xk'ab'a' li Qaawa' Jesukriist. 2Xb'aan A'an, rik'in li paab'aal, xqataw qokik sa' li usilal a'in li wanko wi', ut naqanima qib' rik'in royb'eninkil li xnimal xloq'al li Yos.

3Ut moko ka'aj ta wi' rik'in a'in, naqanima aj b'an wi' qib' toj sa'atqeb' li qarahilal, xb'aan naq naqanaw naq li rahilal naxyoob' xnimal kuyum; 4li xnimal kuyum naxyoob' li tz'aqal chaab'ilal; li tz'aqal chaab'ilal naxyoob' li oyb'enink, 5ut li oyb'enink ink'a' nab'alaq'ik xb'aan naq ak hoyb'il sa' li qach'ool li xrahom li Yos xb'aan li Santil Musiq'ej k'eeb'il chaq qe.

6Naq toj maak'a' chaq qametz'ew, li Kriist kikamk sa' xk'ab'a'eb' laj maak, tz'aqal sa' xq'ehil. 7Relik chi yaal naq ra chi sa naq tixk'e raj rib' chi kamk anihaq sa' xk'ab'a' junaq tiik xch'ool; mare sa' xk'ab'a' junaq chaab'il xch'ool tixq'axtesi raj rib' chi kamk. 8A'ut li Yos naxk'ut qaraab'al rik'in naq li Kriist kikamk sa' qak'ab'a' naq toj wanko chaq sa' li qamaak. 9Anaqwan tiikob'resinb'il qach'ool xb'aan xkik'el li Kriist: ma toja' ta chik ink'a' tooxkol li Yos chiru li tojb'amaak sa' xk'ab'a' A'an? 10Naq toj xik' naqil chaq li Yos, xook'ame'k wi' chik sa' usilal rik'in sa' xk'ab'a' xkamik li Ralal; ma ink'a' tab'i' q'axal tooxkol chik anaqwan sa' xk'ab'a' li xyu'am naq k'amb'ilo chik sa' usilal rik'in li Yos? 11Ut moko ka'aj ta wi' rik'in a'an, naqanima aj b'an wi' qib' rik'in li Yos sa' xk'ab'a' li Qaawa' Jesukriist li xqataw wi' li usilal anaqwan.

Laj Adán ut li Kriist

12Relik chi yaal naq xb'aan jun chi winq ki'ok chaq li maak sa' ruuchich'och', ut xb'aan li maak kichalk li kamk. Jo'kan naq li kamk kichalk sa' xb'eeneb' chixjunil li poyanam xb'aan naq chixjunileb' ke'maakob'k. 13Naq toj maak'a' chaq li xChaq'rab' laj Moisés, ak wan chaq li maak sa' ruuchich'och', us ta maa'ani nak'ehe'k xmaak naq toj maak'a' li Chaq'rab'. 14Ab'an chalen naq kiwank chaq laj Adán toj rik'in laj Moisés, li kamk kiwank xwankil sa' xb'eeneb' li ke'maakob'k, us ta ink'a' ke'maakob'k rik'in xq'etb'al xchaq'rab' li Yos jo' kixb'aanu laj Adán. Laj Adán a'an xjalam u Li toj tol'elq.

15Ab'an li usilal moko juntaq'eet ta rik'in li q'etb'a aatin. Sa' xk'ab'a' li xmaak jun chi winq ke'kamk chixjunileb'; ab'an k'ajo' chik xnimal li rusilal li Yos jo'wi' li qamaatan k'eeb'il sa' xk'ab'a' li rusilal jun chi winq, a' li Jesukriist! K'ajo' naq kinumtaak li rusilal li Yos sa' xb'een naab'aleb'! 16Moko naru ta xjuntaq'eetankil li xsimaatan li Yos rik'in li k'aru nachalk xb'aan li xmaak jun chi winq. Xb'aan naq li raqb'a aatin li kichalk xb'aan jun chi maak koxraqe'q rik'in li tojb'amaak; a'ut li simaatan li kichalk xb'aan li k'iila maak koxraqe'q rik'in li tiikil ch'oolej. 17Wi sa' xk'ab'a' li xmaak jun chi winq kiwank xwankil li kamk, jo'kan ajwi' sa' xk'ab'a' li jun chirib'il, a' li Jesukriist, k'ajo' chik naq te'awab'ejinq sa' li ak' yu'am eb' li neke'xmaatani chi yo'oon li tiikil ch'oolej, sa' xk'ab'a' xnimal rusilal li Yos!

18Jo'kan utan, kama' li xmaak li jun chirib'il kixb'oq chaq li tojb'amaak sa' xb'eeneb' chixjunil, jo'kan ajwi' li xtiikilal xch'ool li jun chi winq naxk'am chaq li tiikil ch'oolej ut li yu'am reheb' chixjunileb'. 19Xb'aan li xq'etb'a aatin jun chi winq ke'kanaak cho'q aj maak chixjunileb'; jo'kan ajwi', rik'in naq kipaab'ank li jun chi winq, naab'aleb' te'kanaaq cho'q tiikeb' xch'ool.

20Li Chaq'rab' ki'ok re naq chinumtaaq li maak. Ab'an b'arwi' kinumtaak li maak, k'ajo' chik naq kinumtaak li rusilal li Yos. 21Chi jo'kan, kama' li maak kiwank xwankil rik'in li kamk, jo'kan ajwi' chi'awab'ejinq li rusilal li Yos rik'in li tiikil ch'oolej ut cho'q re li junelik yu'am, sa' xk'ab'a' li Jesukriist, li Qaawa'!

Currently Selected:

Ro 5: QQC

Highlight

Compare

Copy