Ro 6

Li kub'iha'

1K'aru tqaye? Ma toj yooqo chi maakob'k re naq taak'ihanq li rusilal li Yos? Maajoq'e b'i'an! 2Wi xookamk chiru li maak, chanru naq toj wanqo chisa' chi jo'kanan? 3Malaj ink'a' nekenaw naq li jo'k'ihal kub'enaq qaha' sa' xk'ab'a' li Kristo Jesus, qechkamik A'an naq xkub'eek qaha'?#6,3 Sa' xtiklajik li Santiklees, sa' li kub'iha', li winq malaj li ixq na'ok sa' li ha' chi xjunxaqalil ut namuqunk chisa': a'an reetalil li kixk'ul chaq li Jesus naq kikamk ut ki'ok sa' li muqleb'aal. Ut li elk sa' li ha' a'an reetalil li xwaklijik chi yo'yo li Qaawa' Jesus. 4Sa' xk'ab'a' li kub'iha' qechmuqik li Kriist sa' li xkamik, re naq kama' li Kriist kiwaklesiik wi' chik chi yo'yo sa' xyanqeb' li kamenaq xb'aan xnimal xwankil li Yuwa'b'ej, jo'kan ajwi' laa'o choowanq sa' ak' yu'am.

5Wi nokoosumwank rik'in li Kriist sa' xk'ab'a' jun kamk jo' li kixk'ul A'an, sumwanqo ajwi' rik'in A'an sa' li xwaklijik chi yo'yo. 6Naqanaw naq li qanajteril yu'am kik'ehe'k chiru krus rochb'een li Kriist, re naq chisache'q xwankil li qakamenaqil na'leb' ut ink'a' chik took'anjelaq chiru li maak. 7Xb'aan naq li ak xkamk, maak'a' chik xwankil li maak sa' xb'een.

8Wi xookamk qochb'een li Kriist, naqapaab' naq yo'yooqo ajwi' qochb'een A'an. 9Naqanaw naq li Kriist waklijenaq chi yo'yo sa' xyanqeb' li kamenaq: maajoq'e chik taakamq ut li kamk maak'a' chik xwankil sa' xb'een. 10Naq kikamk, kikamk chiru li maak chi junwaakaj; a'ut anaqwan yo'yo, ut re li Yos naq yo'yo. 11Jo'kan ajwi' laa'ex, chereek'ahaq naq kamenaqex chiru li maak ut yo'yookex cho'q re li Yos sa' xk'ab'a' li Kristo Jesus.

12Jo'kan utan miwank chik xwankil li maak sa' leech'och'el sululel, meeb'aanu chik li k'aru naxrahi li tz'ejwalej. 13Chi moko chek'e leeroq leeruq' re xb'aanunkil li maak, cho'q xk'anjelob'aal li ink'a' us; cheq'axtesi b'an eerib' re li Yos jo'kex li kamenaq yo'lajenaqeb' wi' chik, ut chek'e leeroq eeruq' cho'q xk'anjelob'aal li tiikil ch'oolej, cho'q re li Yos. 14Li maak maak'a'aq chik xwankil sa' eeb'een, xb'aan naq moko rub'el ta chik xwankil li Chaq'rab' wankex, rub'el b'an xwankil li rusilal li Yos.

Kolb'ilo chiru li maak

15Yehomaq we: ma toomaakob'q xb'aan naq moko rub'el ta xwankil li Chaq'rab' wanko, rub'el b'an xwankil li rusilal li Yos? Maajoq'e b'i'an. 16Ma ink'a' nekenaw naq wi nekek'e eerib' cho'q moos re xpaab'ankil anihaq, a'an chik taataqlanq sa' eeb'een ut laa'ex tento texpaab'anq chiru? Jo'ka'in nekek'ul laa'ex, us ta nekexk'anjelak chiru li maak li nak'amok sa' li kamk, us ta nekexk'anjelak chiru li Yos li nak'amok sa' li tiikil ch'oolej.

17Ab'anan, b'anyox re li Yos, laa'ex li xexwank chaq cho'q moos re li maak, xepaab' chi anchal eech'ool leechaab'il tzolb'al li xexq'axtesiik wi'; 18xex'ach'ab'aak chaq chiru li maak ut xeq'axtesi eerib' cho'q moos re li tiikil ch'oolej. 19(Yookin chi aatinak kama' nokoo'aatinak arin sa' ruuchich'och', xb'aan xmajelal leena'leb'). Kama' naq xek'e chaq leeroq leeruq' cho'q moos re li muxuk ib' ut li q'etb'a aatin re naq te'numtaaq sa' eeb'een, jo'kan naq cheq'axtesi anaqwan leeroq leeruq' chi k'anjelak chiru li tiikil ch'oolej ut re li santilal.

Li k'aru naruuchin li maak ut li tiikil ch'oolej

20Naq wankex chaq cho'q moos re li maak, maak'a' chaq xwankil li tiikilal sa' eeb'een. 21Ab'an k'aru xera chaq rik'in a k'a'aq re ru a'in li nekexxutaanak wi' anaqwan? Xb'aan naq a' li kamk nakoxraqe'q wi'. 22A'ut anaqwan ach'ab'anb'ilex chik chiru li maak ut oksinb'ilex cho'q aj k'anjel chiru li Yos, yookex chi uuchink cho'q re li santilal; ut li xraqik a'an, a' chik li junelik yu'am. 23Xb'aan naq li xtojb'al li maak a'an li kamk; ab'an li maatan li nachalk rik'in li Yos a'an li junelik yu'am sa' xk'ab'a' li Kristo Jesus, li Qaawa'.

Currently Selected:

Ro 6: QQC

Highlight

Compare

Copy