Ro 4

Laj Abrahán kitiikob'resiik xch'ool xb'aan li xpaab'aal

1K'a' put ru tqaye chirix laj Abrahán li qaxe'toonil yuwa'? 2Wi laj Abrahán kixtaw xtiikilal xch'ool rik'in li xb'aanuhom, wank k'aru tixnima wi' rib', ab'anan moko chiru ta li Yos. 3K'aru naxye li Santil Hu? “Laj Abrahán kixpaab' li Yos ut a'an kik'ehe'k sa' ajl cho'q xtiikilal xch'ool”.#4,3 Gn 15,6. 4Wi ani yo chi k'anjelak ut naxk'ul xtojb'al, a'in ink'a' nak'ehe'k re yal jo' xmaatan, ak re aj b'an wi' naq naxk'ul. 5Ut wi ani maak'a' k'anjel xb'aanu, ab'an naxpaab' li Yos li natiikob'resink xch'ool laj maak, li xpaab'aal nak'ehe'k sa' ajl cho'q xtiikilal xch'ool. 6Jo' ajwi' naxye laj David naq us xaq re li naxmaatani xtiikilal xch'ool xb'aan li Yos chi ink'a' k'eeb'ileb' sa' ajl li xb'aanuhom:

7“Us xaq reheb' li kuyb'il sachb'il li xmaakeb',

ut muqb'il chik li xmaa'usilaleb'.

8Us xaq reheb' li ink'a' neke'k'oxlaak li xmaakeb' xb'aan li Yos”.#4,7-8 Sal 32,1-2.

9Li sahilal a'in ma ka'ajwi' cho'q reheb' li xk'ulumeb' li sirkunsisyon malaj reheb' ajwi' li ink'a' xk'ulumeb'? Xb'aan naq xqaye naq li xpaab'aal laj Abrahán kik'ehe'k sa' ajl cho'q xtiikilal xch'ool. 10Jo'q'e put kik'ehe'k sa' ajl? Rub'elaj xk'ulb'al li sirkunsisyon malaj toj moqon? Moko moqon ta, maji'aq b'an xk'ulum li sirkunsisyon: 11laj Abrahán kixk'ul li sirkunsisyon#4,11 Gn 17,11. jo' reetalil li xtiikilal xch'ool kixmaatani chaq xb'aan li xpaab'aal naq maji'aq xk'ulum li sirkunsisyon. Chi jo'kan a'an xyuwa' chixjunileb' laj paab'anel ink'a' uxb'ileb' wi' li sirkunsisyon, re naq eb' a'an ajwi' k'eeb'ilaqeb' sa' ajl sa' xyanqeb' li tiikeb' xch'ool. 12Laj Abrahán xyuwa'eb' ajwi' li xk'ulumeb' li sirkunsisyon, eb' li ink'a' k'ojk'o xch'ooleb' rik'in li sirkunsisyon, neke'xk'am b'an reheb' rik'in xpaab'aal li qayuwa' laj Abrahán naq maji'aq xk'ulum li sirkunsisyon.

Naqak'ul li xyeechi'om li Yos xb'aan li paab'aal

13Naq li Yos kixyeechi'i chaq re laj Abrahán jo'wi' reheb' li ralal xk'ajol naq te'reechani li ruuchich'och', relik chi yaal naq moko sa' xk'ab'a' ta li Chaq'rab' naq ki'uxk li yeechi'om a'in, sa' xk'ab'a' b'an li tiikil ch'oolej kixk'ul rik'in naq kixpaab'. 14Xb'aan naq wi eb' laj paab'anel xChaq'rab' laj Moisés te'eechaninq, maak'a' rajb'al li paab'aal ut li xyeechi'om li Yos najuk'e'k xwankil chi junajwa. 15Li Chaq'rab' nak'amok chaq xjosq'il li Yos, ab'anan b'ar maak'a' wi' li Chaq'rab', aran maak'a' ajwi' q'etb'a aatin.

16Jo'kan naq chixjunil na'uxk sa' xk'ab'a' li paab'aal re naq k'ulb'ilaq yal chi maatan, ut li xyeechi'om li Yos xaqxooq xwankil cho'q reheb' chixjunil li ralal xk'ajol laj Abrahán: moko ka'aj ta wi' cho'q reheb' laj paab'anel Chaq'rab', reheb' aj b'an wi' li wankeb' xpaab'aal jo' laj Abrahán li qayuwa' chiqajunilo, 17jo' naxye li Santil Hu: “Xatinxaqab' cho'q xyuwa' li k'iila tenamit”.#4,17 Gn 17,5. A'an qayuwa' chiru li Yos, xb'aan naq kixpaab' li Yos li nak'ehok xyu'ameb' li kamenaq ut naxyoob'tesiheb' li k'a'aq re ru toj maak'a'.

18Laj Abrahán kixpaab' li Yos ut kiroyb'eni li kiyeechi'iik chaq re, us ta maak'a' raj k'a' re ru xruuk royb'eninkil; ut kikanaak cho'q xyuwa'eb' li k'iila tenamit, jo' chanru yeeb'il chaq re: “Jo'kanaq xk'ihal eb' laawalal aak'ajol”.#4,18 Gn 15,5. 19Moko kich'inank ta li xpaab'aal rik'in xk'eeb'al reetal naq li xtz'ejwal chanchan naq kamenaq chik (kach'in chik maa o'k'aal chihab' wank re laj Abrahán); chi moko rik'in xk'eeb'al reetal naq lix Sara a'an jun li ixq ink'a' na'alank. 20Tik ink'a' kiwiib'ank xch'ool chiru li xyeechi'om li Yos, kawuuk b'an chik kixb'aanu sa' li xpaab'aal ut kixloq'oni ru li Yos, 21q'axal k'ojk'o xch'ool chirix naq li Yos wank xwankil chi xb'aanunkil li k'aru kixyeechi'i chaq. 22Jo'kan naq chixjunil a'an kik'ehe'k sa' ajl chiru cho'q xtiikilal xch'ool.

23Ut li Santil Hu moko ka'aj ta wi' cho'q re laj Abrahán naxye naq kik'ehe'k sa' ajl chiru li Yos, cho'q qe aj b'an wi' laa'o. 24Taak'ehe'q sa' ajl li qapaab'aal xb'aan naq naqapaab' Li kiwaklesink re chi yo'yo li Jesus, li Qaawa'. 25A'in kiq'axtesiik xb'aan li qamaak#4,25 Cf. Is 53,4-5.12. ut kiwaklesiik wi' chik chi yo'yo re xtiikob'resinkil li qach'ool.

Currently Selected:

Ro 4: QQC

Highlight

Compare

Copy