Ro 3

Tiik xch'ool li Yos chi junelik

1B'ar put wank li rusilal li wank cho'q aj judiiy? B'ar put wank li rusilal li sirkunsisyon? 2Jwal nim li rusil, chi yalaq chan re ru. Xb'enwa xb'aan naq reheb' laj Judiiy kiq'axtesiik chixjunil li xyehom li Yos. 3Ut wi wank sa' xyanqeb' li ink'a' ke'paab'ank, k'a' tqaj wi'? Rik'in naq ink'a' ke'xnaw paab'ank ma tixkanab' li Yos xk'eeb'al li k'aru kixyeechi'i chaq? 4Maajoq'e b'i'an! Li Yos paab'ajel chi junelik, us ta eb' li poyanam aj tik'ti'eb' chixjunileb', jo' tz'iib'anb'il sa' li Santil Hu:

“Re naq chik'utunq naq tiik laach'ool rik'in li k'aru nakaye,

ut us chat-elq naq taaraqmanq aatin sa' aab'een”.#3,4 Sal 116,11; 51,6.

5Ab'anan wi li qamaa'usilal naterq'usink re xtiikilal xch'ool li Yos, k'aru tqaye? Ma tqaye naq ink'a' tiik xch'ool li Yos xb'aan naq nak'ehok chi tojok maak? (Yookin chi aatinak jo' neke'aatinak eb' li winq). 6Maajoq'e b'i'an! Wi ta jo'kan, chan raj ru taaraqoq aatin li Yos sa' xb'een li ruuchich'och'?

7Ab'an wi rik'in lintik'ti' taanumtaaq xwankil xtiikilal xch'ool li Yos cho'q re xnimal xloq'al, k'a'ut naq toj naraqmank ajwi' aatin sa' inb'een jo' aj maak? 8K'a' naq ink'a' tqaye: “Qab'aanuuq li maa'usilal re naq taachalq li usilal”? Wank neke'jitok qe rik'in xyeeb'al naq a'an tz'aqal li yooko chi xk'utb'al chiruheb' li tenamit. Ab'anan relik chi yaal naq eb' li neke'yehok a'an xk'ulub'eb' li tojb'amaak.

Maa'ani tiik xch'ool

9K'a' put ru chi jo'kanan? Ma naqaq'axeb' ru li maawa'eb' aj Judiiy? Maajoq'e b'i'an! Xb'aan naq ak xqach'olob' xyaalal naq eb' laj Judiiy jo'wi' eb' laj Griego, chixjunileb' wankeb' rub'el xwankil li maak, 10jo' tz'iib'anb'il sa' li Santil Hu:

“Maa'ani tiik xch'ool, yal jun taxaq.

11Maa'ani wank xna'leb',

junaq taxaq li nasik'ok re li Yos.

12Chixjunileb' xe'xkanab' li chaab'il b'e,

junxikikeb' sa' li maa'usilal.

Maak'a' junaq nab'aanunk li us,

yal jun taxaq.

13Li xxololeb' chanchan teetookil muqleb'aal;

rik'in ru'ujeb' raq' neke'ok chi b'alaq'ik.

Xmay k'anti' li wank chi xtz'uumal reheb'.

14Li xsa' reheb' nujenaq chi majewal ut xik' aj aatin.

15Li roqeb' neke'seeb'o'k chi xik chi kamsink;

16rahilal ut raaxiik' wank sa' xb'eheb'.

17Ink'a' xnawomeb' ru xb'ehil li tuqtuukil usilal;

18tik ink'a' neke'xxiwa ru li Yos”.#3,10-18 Sal 14,1-3; 5,10; 140,4; 10,7; Is 59,7-8; Sal 36,2.

19Us b'i', naqanaw naq chixjunil li naxye li Chaq'rab', a'an yeeb'il cho'q reheb' li wankeb' rub'el xwankil li Chaq'rab', re naq chixjunileb' te'memo'q, ut chixjunil li ruuchich'och' chireek'ahaq rib' naq wank xmaak chiru li Yos. 20Xb'aan naq maa'ani taatiikob'resiiq xch'ool chiru li Yos#3,20 Sal 143,2. yal sa' xk'ab'a' xpaab'ankil li Chaq'rab'; a'in b'an li naxb'aanu li Chaq'rab': naxk'e chi nawe'k naq laa'o aj maak.

Li tiikil ch'oolej nawank xb'aan li paab'aal

21Anaqwan xk'utb'esiik naq li Yos a'an aj tiikob'resinel ch'oolej, jo' chanru yeeb'il chaq resil xb'aan li xChaq'rab' laj Moisés jo'wi' xb'aaneb' li propeet. 22Sa' xk'ab'a' xpaab'ankil li Jesukriist, li Yos naxtiikob'resi xch'ooleb' chixjunileb' li neke'paab'ank re, xb'aan naq juntaq'eet narileb' chixjunil: 23chixjunileb' xe'maakob'k ut maak'a' xloq'al li Yos rik'ineb'. 24Ab'anan neke'xmaatani xtiikob'resinkil xch'ooleb' xb'aan rusilal li Yos, rik'in li kolb'a ib' wank sa' xk'ab'a' li Kristo Jesus. 25A'in kixaqab'aak xb'aan li Yos cho'q aj k'ehol uxtaan#3,25 Chirix chixjunil a'in: cf. Ex 25,17-22. Sa' xnimal xkutankil li kuyuk sachok maak, eb' laj Israel neke'xkirkisi li kik' sa' xb'een li xtz'apb'al xb'een li Loq'laj Kaax (cf. Lv 16,2-19). Ab'an ka'ajwi' rik'in xkik'el li Jesus nokooruuk xtojb'al rix li qamaak. sa' xk'ab'a' li xkik'el, cho'q reheb' li wankeb' xpaab'aal. Chi jo'kan li Yos naxk'ut li xtiikilal xch'ool. Sa'eb' li kutan ke'numje'k, sa' xq'ehil li xnimal xkuyum, li Yos ink'a' kixk'e sa' ajl li xmaakeb' li tenamit, 26yal re xk'utb'al sa'eb' li kutan a'in li xtiikilal; naraj naxye, a'an tiik xch'ool ut aj tiikob'resihom re li napaab'ank re li Jesus.

27B'ar put wank anaqwan li xnimankil qib'? Isinb'il chik chi junajwa. K'a' chi chaq'rab'il x'isink re? Ma rik'in qab'aanuhom? Ink'a'; rik'in b'an xchaq'rab'il li paab'aal. 28Xb'aan naq ch'olch'o chiqu naq li winq natiikob'resiik xch'ool xb'aan li paab'aal, chi maak'a' xb'aanuhom li xChaq'rab' laj Moisés.

29Ma ka'aj ta wi' cho'q reheb' laj Judiiy li Yos? Ma ink'a' tab'i' cho'q reheb' ajwi' li junch'ol chik? Ch'olch'o naq li Yos xYoseb' ajwi' li maawa'eb' aj Judiiy. 30Xb'aan naq li Yos jun ajwi' chirib'il: a'an taatiikob'resinq re xch'ooleb' li xk'ulumeb' li sirkunsisyon, sa' xk'ab'a' li paab'aal; ut tixtiikob'resi xch'ooleb' li ink'a' xk'ulumeb' li sirkunsisyon, sa' xk'ab'a' ajwi' li paab'aal. 31Ma yooko tab'i' chi xjuk'b'al xwankil li Chaq'rab' rik'in li paab'aal? Maajoq'e b'i'an! Yooko b'an chi xxaqab'ankil xwankil.

Currently Selected:

Ro 3: QQC

Highlight

Compare

Copy