Ro 2

Eb' laj Judiiy ajwi' yo xjosq'il li Yos sa' xb'eeneb'

1Jo'kan utan, maak'a' k'aru taakol wi' aawib', at winq li nakatraqok aatin sa' xb'een laawas aawiitz'in, a' yaal anihat. Naq nakatraqok aatin chirix anihaq, rahilal nakab'oq chaq sa' aab'een, xb'aan naq nakatraqok aatin ut toj yookat ajwi' chi xb'aanunkil li maak a'an. 2Ch'olch'o chiqu naq li Yos taaraqoq aatin sa' tiikilal sa' xb'eeneb' li neke'b'aanunk re li k'a'aq re ru a'an. 3K'aru nakak'oxla laa'at li nakatraqok aatin sa' xb'eeneb' li neke'b'aanunk re a'an ut yookat ajwi' chi xb'aanunkil aawe? Ma nakak'oxla naq tatkole'q chiru li xraqb'a aatin li Yos?

4Malaj ut nakatz'eqtaana li xchamal xsasal li rusilal li Yos, li xnimal xkuyum ut li xq'unal xch'ool? Ma ink'a' nakanaw naq li rusilal li Yos a'in natoch'ok aawe chi xyot'b'al laach'ool ut chi xjalb'al laak'a'uxl? 5Laa'at kaw laajolom ut ink'a' nakawaj xjalb'al laak'a'uxl; jo'kan naq yookat chi xtamresinkil xjosq'il li Yos sa' aab'een cho'q re xkutankil li Josq'il naq taak'utb'esiiq li raqb'a aatin tixb'aanu li Yos sa' tiikilal. 6Aran taak'eemanq xq'ajkamunkil li junjunq jo' chanru li xyehom xb'aanuhom: 7li Yos tixk'e junelik yu'am reheb' li ninqeb' xkuyum chi xb'aanunkil li us, jo'k'ihaleb' li neke'xsik' li loq'al, li chaab'ilal ut li yu'am ink'a' nalajk na'oso'k. 8Ab'anan eb' laj q'etol aatin, eb' li ink'a' neke'xk'anjela li yaal ut a' chik li ink'a' us neke'xk'anjela, li Yos tixtaqla xjosq'il ut raaxiik' sa' xb'eeneb'. 9Nimla rahilal ut yot'ik ch'oolej taachalq sa' xb'eeneb' chixjunil li neke'b'aanunk re li ink'a' us: xb'enwa sa' xb'eeneb' laj Judiiy, ab'an sa' xb'eeneb' ajwi' laj Griego. 10A'ut chixjunileb' li neke'b'aanunk re li us: loq'al, nimaak u ut tuqtuukilal li taak'eemanq reheb'; xb'enwa eb' laj Judiiy, ut eb' ajwi' laj Griego. 11Xb'aan naq li Yos juntaq'eet narileb' chixjunil.

12Chixjunileb' li ke'maakob'k chi ink'a' ke'xnaw li xChaq'rab' laj Moisés, maak'a' Chaq'rab' sa' xb'eeneb' naq te'oso'q; ut chixjunileb' li ke'maakob'k rub'el xwankil li Chaq'rab', a' li Chaq'rab' taaraqmanq wi' aatin sa' xb'eeneb'. 13Chiru li Yos moko tiikeb' ta xch'ool li neke'ab'ink re li Chaq'rab', a'aneb' b'an li neke'k'anjelank re: a'aneb' a'in li te'tiikob'resiiq xch'ool. 14Naraj naxye: naq eb' li maawa'eb' aj Judiiy li maak'a'eb' xChaq'rab' neke'xb'aanu li naxye li Chaq'rab' xb'aan naq neke'reek'a sa' xch'ooleb', eb' a'an, us ta maak'a'eb' xChaq'rab', xchaq'rab'eb' rib' xjuneseb'. 15Neke'xk'ut naq li k'aru yeeb'il xb'aan li Chaq'rab', a'an tz'iib'anb'il sa' xch'ooleb'. A' ajwi' li reek'ob'aal xch'ooleb' jo'wi' li xk'a'uxeb' nach'olob'ank re: wan naq a'an najitok reheb', wan naq a'an nakolok reheb'. 16Chixjunil a'in taak'utunq chi us sa' li kutan taaraqoq wi' aatin li Yos sa' xk'ab'a' li Jesukriist chirix li k'aru muqmu sa' xch'ooleb' chixjunileb'. A'an a'in li Chaab'il Esilal ink'ulum laa'in.

Eb' laj Judiiy ut li Chaq'rab'

17Ab'anan k'aru tqaye chawix laa'at li nakak'ab'a'in aj judiiy? Nakakuutu aawib' rik'in li xChaq'rab' laj Moisés ut nakanima aawib' sa' xk'ab'a' laaYos. 18Nakanaw li rajom li Yos ut naxk'ul aawu li k'aru q'axal chaab'il xb'aan naq tzolb'ilat rik'in li Chaq'rab'. 19Kaw aach'ool chi xk'oxlankil naq laa'at aj k'utul xb'eheb' li mutz', xkutaneb' li wankeb' sa' aak'ab', 20aj tijol reheb' li maak'a'eb' xna'leb' ut aj tzolol reheb' li q'uneb' xch'ool, xb'aan naq sa' li Chaq'rab' nakataw laana'leb' ut li yaal chi tz'aqal re ru. 21Chakuy inmaak, k'a'ut naq nakatzoleb' li jalan chik ut ink'a' nakatzol aawib' laa'at? Nakach'olob' xyaalal naq ink'a' us li elq'ak, ab'anan nakat-elq'ak ajwi' laa'at. 22Nakaye naq ink'a' us li muxuk sumlaak, ut laa'at nakatmuxuk sumlaak. Xik' nakawileb' li yal k'oxlanb'il yos, ut nakat-elq'ak sa' rochocheb'. 23Nakanima aawib' sa' xk'ab'a' li Chaq'rab', ab'anan nakaq'et li Chaq'rab'; ut chi jo'kan ink'a' nakawoxloq'i li Yos. 24Relik chi yaal, jo' naxye li Santil Hu, “eemaak laa'ex majewanb'il xk'ab'a' li Yos sa' xyanqeb' li junch'ol chik”.#2,24 Is 52,5; Ex 36,20; Ez 36,20-23.

25Relik chi yaal naq li sirkunsisyon wank xyaalal wi nakapaab' li xChaq'rab' laj Moisés; ab'anan wi nakaq'et li Chaq'rab', laa'at nakatkanaak jo' ink'a' aak'ulum li sirkunsisyon. 26Wi li ink'a' xk'ulum li sirkunsisyon naxpaab' li naxye li Chaq'rab', ma ink'a' tab'i' taak'ehe'q sa' ajl sa' xyanqeb' li xk'ulumeb' li sirkunsisyon, us ta li jun ink'a' xk'ulum? 27Ut li ink'a' uxb'il li sirkunsisyon sa' li xtz'ejwal, wi naxpaab' li Chaq'rab', taaraqoq aatin sa' aab'een, xb'aan naq wank aawik'in li Chaq'rab' chi tz'iib'anb'il ut aak'ulum li sirkunsisyon, ab'anan aj q'etolat Chaq'rab'. 28Li wank cho'q aj judiiy maawa' ka'ajwi' re xk'utb'al rib'; jo'kan ajwi' li tz'aqal sirkunsisyon maawa' li nak'utunk sa' li tz'ejwalej. 29Li tz'aqal aj judiiy ak a'an ajwi' chaq sa' li xch'ool, ut li tz'aqal sirkunsisyon a'an li na'uxk sa' li ch'oolej, a' li uxb'il xb'aan li Musiq'ej ut ink'a' yal xb'aan xpaab'ankil junaq chaq'rab'. Li tz'aqal aj judiiy a'an li nanimaak ru xb'aan li Yos ut ink'a' xb'aaneb' li tenamit.

Currently Selected:

Ro 2: QQC

Highlight

Compare

Copy