Ro 1

Xk'eeb'al sahil ch'oolej

1Laa'in laj Pablo, xmoosin li Kristo Jesus, b'oqb'ilin chi wank cho'q apóstol ut sik'b'il wu chi xpuktesinkil li xChaab'il Esil li Yos 2yeechi'inb'il chaq junxil chi xtz'uumal reheb' li xpropeet sa' li Santil Hu. 3A'an a'in resilal li Ralal, a' li Jesukriist li Qaawa', yo'lajenaq jo' winq sa' xyanq riyajil laj David 4ut xaqab'anb'il cho'q Ralal li Yos rik'in xnimal xwankil, jo' chanru rajom li Musiq'ej aj santob'resihom re chixjunil, sa' xk'ab'a' li xwaklijik chi yo'yo sa' xyanqeb' li kamenaq.

5Sa' xk'ab'a' A'an xqak'ul qamaatan re wank cho'q apóstol re xk'amb'aleb' chixjunil li tenamit chi xq'axtesinkil rib' chi paab'ank sa' xk'ab'a' li xnimal xloq'al. 6Sa' xyanqeb' a'an wankex ajwi' laa'ex li b'oqb'ilex xb'aan li Jesukriist. 7Eerik'in chejunilex laa'ex li raarookex xb'aan li Yos aran Roma ut b'oqb'ilex chi wank sa' santilal chiwanq taxaq li usilal ut li tuqtuukilal nachalk rik'in li Yos li qaYuwa' ut rik'in li Qaawa' Jesukriist.

Yoxink ut tz'aamank

8Xb'een xb'een ninyoxink chiru linYos sa' xk'ab'a' li Jesukriist cherix chejunilex xb'aan naq chaab'il resilal leepaab'aal sa' chixjunil li ruuchich'och'. 9Naxnaw li Yos, li ninloq'oni chi anchal li waanm rik'in xpuktesinkil li xChaab'il Esil li Ralal, naq ink'a' ninkanab' eepatz'b'al sa' lintij. 10Junelik nintz'aama sa' lintij naq sa' junaq kutan chixk'e taxaq rib' chiwu xik eerik'in, wi jo'kan naraj li Yos. 11K'ajo' naq nawaj eerilb'al re xq'axtesinkil eere junaq leemaatan li naxk'e li Musiq'ej, re naq kawub'resinb'ilaq leech'ool, 12naraj naxye re xwaklesinkil qach'ool chiqib'il qib' naq wanqin sa' eeyanq, rik'in li jun chi paab'aal, a' leere laa'ex ut li we laa'in.

13Nawaj teenaw, ex was wiitz'in, naq k'iila sut#1,13 Cf. Hch 19,21; 23,11. xink'oxla xik eerik'in re naq tink'ul raj junaq ru link'anjel sa' eeyanq, kama' xink'ul chaq sa' xyanqeb' li tenamit junch'ol. Ab'anan toj anaqwan ramro chiwu. 14Wankin sa' k'as rik'ineb' laj Griego ut rik'ineb' li junch'ol chik, rik'ineb' li wankeb' xna'leb' ut li maak'a'eb' xna'leb'. 15Jo'kan naq k'ajo' naq nawaj xpuktesinkil li Chaab'il Esilal eerik'in laa'ex li wankex Roma.

16Xb'aan naq ink'a' ninxutaanak chi xpuktesinkil li Chaab'il Esilal; a'an xnimal xwankil li Yos re xkolb'al chixjunileb' li te'paab'anq re: xb'enwa eb' laj Judiiy ut eb' ajwi' laj Griego. 17Xb'aan naq li Chaab'il Esilal naxk'ut naq li Yos natiikob'resink ch'oolej sa' xk'ab'a' li paab'ank ut cho'q re li paab'ank, jo' tz'iib'anb'il sa' li Santil Hu: “Li tiik xch'ool twanq xyu'am xb'aan li xpaab'aal”.#1,17 Hab 2,4.

Li xjosq'il li Yos sa' xb'eeneb' li maawa'eb' aj Judiiy

18Li xjosq'il li Yos yo chaq chi k'utunk toj sa' choxa sa' xb'eeneb' chixjunil li maak ut sa' xb'een chixjunil li xmaa'usilaleb' li tenamit li neke'ramok re li yaal rik'in xmaak'a'il li tiikilal. 19Xb'aan naq li k'aru naru xnawb'al chirix li Yos, k'utk'u chiruheb': a' ajwi' li Yos xk'utuk chiruheb'. 20Chalen chaq sa' xk'ojlajik li ruuchich'och' li k'a'aq re ru ink'a' ilb'il ru re li Yos, a' li xjunelik wankil ut li xYosilal, nak'utunk chiruheb' li neke'k'oxlak chirixeb' li xb'aanuhom.#1,20 Sab 13,1-15.

Jo'kan naq maak'a' k'aru te'xkol wi' rib', 21xb'aan naq ke'xnaw ru li Yos, ab'an ink'a' ke'xnima xloq'al jo' tz'aqal Yos chi moko ke'yoxink chiru, po'k chik kixb'aanu li xk'a'uxeb', ut eb' li xjip aj ch'ool kiq'oqyino'k ru. 22Ke'xye rib' naq wankeb' xna'leb', ab'anan ke'kanaak chi maak'a'eb' xna'leb', 23ut ke'xjal li xnimal xloq'al li Yos ink'a' nalajk na'oso'k rik'in xjalam u winq na'oso'k, rik'in xjalam uheb' li xik'anel xul, eb' li xul kaahib'eb' roq ut eb' li neke'xjukuki rib' chiru ch'och'.

24Jo'kan naq li Yos kixk'eheb' chi xb'aanunkil li narataw xch'ooleb', kixq'axtesiheb' sa' xyib'al ru xmaa'usilaleb' toj ke'xmux li xtz'ejwaleb' chirib'ileb' rib': 25eb' a'an ke'jalok re li tz'aqal Yos rik'in li tik'ti', ut a' chik li k'a'aq re ru yoob'tesinb'il ke'xnima ru ut ke'xloq'oni cho'q reeqaj laj Yoob'tesinel, li usilaatinanb'il chi junelik q'e kutan. Jo'kan taxaq.

26Rik'in a'an li Yos kixq'axtesiheb' sa' li xutaanalil na'leb' xb'aan naq li rixaqileb' ink'a' chik ke'raj wank rik'ineb', rik'in b'an chik li rech ixqilal ke'xb'aanu li moko uxk naraj. 27Jo'kaneb' ajwi' li winq: ke'xkanab' wank rik'ineb' li rixaqil jo' teneb'anb'il sa' xb'eeneb', ut ke'tiqwo'k chik chirib'ileb' rib'; ke'xb'aanu li maa'usilal rik'ineb' li rech winqilal ut ke'xk'ul xq'ajkamunkil li xsachikeb' jo' tz'aqal xk'ulub'eb'.

28Ink'a' ke'raj xk'uulankil sa' xch'ooleb' li yaal chirix li Yos, jo'kan naq ke'q'axtesiik xb'aan li Yos sa' li xmaa'us aj k'a'uxeb' re te'xb'aanu li moko uxk naraj. 29Numtajenaq xyib'al ru li xmaa'usilaleb', lab' xch'ooleb', aj raholeb' ru b'ihomal, k'ajo' xmaa'usilaleb'; numtajenaqeb' chi aj kaqal, aj kamsineleb' ras riitz'in, aj wech'oneleb', aj b'alaq'eb', ink'a' us xna'leb'eb', aj mololeb' aatin, 30aj q'ab'aneleb', xik' neke'ril li Yos, aj hob'oneleb', q'etq'eteb', xninqaleb' ru naq neke'xb'aanu rib'eb', aj yoob'aneleb' maa'usilal, aj q'etoleb' raatin xna' xyuwa', 31maak'a'eb' xna'leb', eet aj winqeb', maak'a' xchaab'ilaleb', maak'a' uxtaanank rik'ineb'. 32Us ta ch'olch'o chiruheb' li xchaq'rab' li Yos, li naxye naq eb' li neke'b'aanunk re a'in teneb'anb'il li kamk sa' xb'eeneb', ab'an moko ka'aj ta wi' neke'xb'aanu li maak, neke'saho'k aj b'an wi' sa' xch'ool rik'ineb' li neke'b'aanunk a'in.

Currently Selected:

Ro 1: QQC

Highlight

Compare

Copy