Ro 13

Chexpaab'anq chiruheb' li wankeb' sa' chaq'rab'

1Chexpaab'anq chejunilex chiruheb' li wankeb' xwankil sa' qab'een, xb'aan naq maa'ani wank xwankil chi ink'a' ta k'eeb'il re xb'aan li Yos, ut eb' li wankeb' xwankil, a' li Yos kixaqab'ank reheb'. 2Jo'kan naq li ani ink'a' napaab'ank chiruheb' li wankeb' xwankil naxq'et xtaqlahom li Yos, ut eb' li neke'q'etok aatin, tojb'amaak taachakq sa' xb'eeneb'. 3Eb' li xiw xiw neke'ril li neke'taqlank sa' xb'een li tenamit maawa' li neke'b'aanunk re li us, a'aneb' b'an li neke'b'aanunk re li ink'a' us. Wi ink'a' taawaj xxiwankileb' ru li wankeb' sa' chaq'rab', b'aanu li us ut taanimaaq aawu xb'aaneb' a'an, 4xb'aan naq aj k'anjeleb' chiru li Yos re aatenq'ankil chi xb'aanunkil li us. Ab'an wi nakab'aanu li ink'a' us, chatxiwaq xb'aan naq moko maak'a' ta rajb'al naq wankeb' xjutz' ch'iich': aj k'anjeleb' chiru li Yos, aj q'ajkamuneleb' re xrahob'tesinkil li nab'aanunk re li ink'a' us. 5Jo'kan utan, tento texpaab'anq chiruheb', moko ka'aj ta wi' re naq ink'a' texrahob'tesiiq, re aj b'an wi' naq k'ojk'ooq leech'ool. 6A'in aj e naq nekek'e leetoj, xb'aan naq eb' li wankeb' sa' chaq'rab' aj k'anjeleb' chiru li Yos, ut yalyookeb' xq'e chi xb'aanunkil li k'anjel a'in.

7Chetoj re li junjunq li k'aru tento xk'eeb'al re: wi kub'siil, kub'siilaq; wi tojleb', tojleb'aq; ani oxloq'iik naraj, cheroxloq'ihaq; ani nimaak naraj, chenimaaq ru.

Li rahok ut li Chaq'rab'

8Maak'a'aq eek'as rik'in anihaq, ka'ajaq wi' li xraab'al eerib' cherib'il eerib'. Xb'aan naq ani naxra li ras riitz'in naxb'aanu chi tz'aqal li naxye li Chaq'rab'. 9Tz'iib'anb'il sa' li Santil Hu: “Chara laawas aawiitz'in jo' naq nakara aawib' laa'at”.#13,9a Lv 19,18; Mt 22,37-40; Gal 5,14. Sa' li chaq'rab' a'in neke'tz'aqlok ru chixjunileb' li xkomon, qayehaq: “Matmuxuk sumlaak, matkamsink, mat-elq'ak, matrahink ab'i e”.#13,9b Ex 20,13-17; Dt 5,17-21; Mt 19,18. 10Li rahok ink'a' naxb'aanu raasa re li ras riitz'in. Jo'kan naq li rahok a'an li xtz'aqlojik ru li Chaq'rab'.

Choowanq sa' saqenk

11Chiqab'aanu chixjunil a'in xb'aan naq naqanaw chi us k'a' chi honalil wanko wi': ak xq'ehil naq tex'ajq sa' leewara xb'aan naq li qakolb'al anaqwan nach' chik wank chiru naq xoo'ok chi paab'ank. 12Li q'oqyink ak yo chi nume'k ut li kutan we' chaq. Qatz'eqaq b'i' xk'anjel li aak'ab' ut qatiqib'aq qib' rik'ineb' xk'anjelob'aal li kutan saqenk. 13Wanqo sa' xyaalal jo' sa' kutan saqenk, chi maak'a'aq numwa'ak ut kalaak, chi moko ko'b'eetak yumb'eetak ut yib' aj na'leb', chi maak'a'aq raaxiik' ut kaqalink. 14Tiqib'omaq eerib' rik'in li Qaawa' Jesukriist, ut mixik eech'ool chirix li maa'usilal re xb'aanunkil li nalajxrahi ru li qach'ool.

Currently Selected:

Ro 13: QQC

Highlight

Compare

Copy