Ro 14

Xraab'al li q'uneb' sa' li paab'ank

1Chek'ulaqeb' sa' xyaalal li toj q'uneb' xch'ool sa' li paab'ank ut meewech' rix li xk'a'uxeb'. 2Wank neke'k'oxlank re naq chixjunil naru te'xtzeka; wankeb' ajwi' li toj q'uneb' xch'ool sa' li xpaab'aaleb' ut junes ichaj neke'xtiw. 3Li natzekank, mixtz'eqtaana li ink'a' natzekank; ut li ink'a' natzekank, mixwech' rix li natzekank xb'aan naq a' li Yos xk'uluk re. 4Anihat laa'at chi xwech'b'al rix li xmoos laawas aawiitz'in? A' laj eechal re taayehoq re ma us malaj ink'a' us yo chi xb'aanunkil. Ab'anan, nim li Qaawa' sa' xb'een, tixb'aanu li xk'anjel chi chaab'il.

5Wank neke'k'oxlank re naq q'axal loq' junaq kutan chiruheb' li xkomon; ut wank ajwi' neke'k'oxlank re naq juntaq'eet xloq'al chixjunileb' li kutan. Ab'anan li junjunq chixk'uub' rib' chi chaab'il sa' li xk'a'uxl. 6Li naxk'e xloq'al junaq kutan, re li Qaawa' naq naxb'aanu a'an; li natzekank, re li Qaawa' naq natzekank, ut nayoxink ajwi' chiru li Yos; ut li ink'a' natzekank, re li Qaawa' naq naxb'aanu a'an, ut nayoxink chiru li Yos.

7Xb'aan naq maajun qe laa'o yo'yo cho'q re xjunes rib', chi moko taakamq cho'q re xjunes rib'. 8Wi yo'yooko, re li Qaawa' naq yo'yooko; ut wi tookamq, re li Qaawa' naq tookamq. Jo'kan naq sa' qayu'am sa' qakamik reho li Qaawa'. 9A'in aj e naq kikamk li Kriist ut kixtaw wi' chik xyu'am, re naq taa'awab'ejinq sa' xb'eeneb' li kamenaqeb' ut li yo'yookeb'.

10Ab'anan laa'at li q'un aach'ool sa' laapaab'aal k'a' naq nakaraq aatin sa' xb'een laawas aawiitz'in? Ut laa'at li kawat sa' li paab'ank k'a' naq nakatz'eqtaana li junch'oleb' chik? Chiqajunilo tento toxooxaqab'aaq chiru li Yos sa' xraqleb'aal aatin, 11xb'aan naq tz'iib'anb'il sa' li Santil Hu:

“Relik chi yaal ninye eere -chan li Qaawa'-

naq chixjunileb' te'xwiq'ib' rib' chiwu

ut rik'in xtz'uumaleb' re

te'xnima ru li Yos chixjunileb'”.#14,11 Is 49,18; 45,23.

12Jo'kan utan, li junjunq sa' qayanq tento toxch'olob' li xyehom xb'aanuhom chiru li Yos.

13Jo'kan naq miqawech'i chik qib' chiqib'il qib'; a'in b'an chek'oxla: naq meek'e xtichk'ob'aaleb' malaj xt'anleb'aaleb' leeras eeriitz'in. 14Ninnaw chi us ut ch'olch'o chiwu sa' xk'ab'a' li Qaawa' Jesus naq maak'a' k'aru tz'aj yal ta xjunes rib'; ab'an wi ani nak'oxlank re naq tz'aj junaq k'a' re ru, tz'aj ka'ajwi' cho'q re a'an. 15Wi sa' xk'ab'a' laatzekemq naraho'k xch'ool laawas aawiitz'in, ink'a' chik yookat chi xb'aanunkil jo' naraj li rahok. Xb'aan li k'aru nakatzeka maak'e chi sachk, maak'e chi t'ane'k li ani kikamk wi' li Kriist. 16Maak'e chi hob'e'k li us eek'ulum chaq laa'ex. 17Li xnimajwal awab'ejihom li Yos moko wa uk'a' ta, tiikilal b'an, tuqtuukil usilal ut sahil ch'oolej xb'aan li Santil Musiq'ej. 18Ka'ajwi' li napaab'ank chi jo'ka'in chiru li Kriist, k'ulub'anb'il xb'aan li Yos ut nak'ehe'k xloq'al xb'aaneb' li tenamit.

19Chiqak'e b'i' qach'ool chirix li k'aru nak'uub'ank re li tuqtuukilal ut li sumwaklesij ib'. 20Maajuk' xb'aanuhom li Yos xb'aan junaq tzekemq. Relik chi yaal naq chixjunil maak'a' xtz'ajnil; ab'anan wi rik'in li k'aru natzekamank nawank luktesink ch'oolej, a'an moko us ta. 21Li us xb'aanunkil a'an a'in: ink'a' xtiwb'al li tib', ink'a' ruk'b'al li b'iin, chi moko xb'aanunkil k'a'aq re ru taaluktaaq wi' xch'ool laawas aawiitz'in, malaj ut taatichk'oq ut taach'inanq xch'ool.

22Li k'aru nakapaab' chirix li na'leb' a'in, chak'uula sa' laawaanm chiru li Yos. Us xaq re li nareek'a sa' xch'ool naq maak'a' xq'usb'al rik'in li x'alaak sa' li raanm xb'aanunkil! 23Ab'anan li naxka'b'rixink xch'ool naq yo chi tzekank, a'an naxb'oq tojb'amaak sa' xb'een, xb'aan naq ink'a' k'ojk'o xch'ool naq naxb'aanu a'an. Chixjunil li na'uxmank chi ink'a' k'ojk'o qach'ool chi xb'aanunkil, a'an maak.

Currently Selected:

Ro 14: QQC

Highlight

Compare

Copy