Ro 12

Li teneb'anb'il sa' xb'eeneb' laj paab'anel

1Nintz'aama b'i' cheru, ex was wiitz'in, sa' xk'ab'a' li xnimal ruxtaan li Yos, naq cheq'axtesi leeyu'am jo' yo'yookil mayej, sant, jo' nawulak chiru li Yos. A'an a'in li tz'aqal mayejak q'axal xk'ulub'. 2Ut meek'am eere rik'in li ruuchich'och' a'in, chejal b'an leeyu'am, che'ak'ob'resi leena'leb' re naq teenaw xk'eeb'al reetal k'aru naraj li Yos: a' li b'arwan us, nawulak chiru ut tz'aqal re ru.

3Sa' xk'ab'a' li maatan k'eeb'il we ninye eere chejunilex ut chejunjunqal: meek'oxla eerib' naq numtajenaq eena'leb', chek'oxla b'an yal tz'aqalaj, a' yaal chanru li maatan k'eeb'il re li junjunq xb'aan li Yos sa' xk'ab'a' li xpaab'aal. 4Jo' chanru naq sa' jun chi tz'ejwalej wank naab'al qacha'al, ab'an chixjunil li cha'alej moko jun ajtawi' ru li xk'anjeleb', 5jo'kano ajwi' laa'o: naab'alo, ab'an juno ajwi' chi tz'ejwalej rik'in li Kriist, ut chiqajunilo qacha'al qib' chiqib'il qib'.

6Jalan jalanq li qamaatan, a' yaal chanru li rusilal li Yos k'eeb'il qe.#12,6 1 Ko 12,7-11.28-30; Ef 4,11. Jo'kan utan, wi wank qamaatan re aatinak jo' propeet, chiqak'e chi k'anjelak jo' chanru xnimal li qapaab'aal; 7wi wank qamaatan re k'anjelak, chook'anjelaq; wi wank qamaatan re xtzolb'aleb' li qas qiitz'in, qatzolaqeb'; 8wi wank qamaatan re k'ehok na'leb', chook'ehoq na'leb'. Li nasihink, chisihinq chi anchal xch'ool; li nawank chi xjolomil, chixch'oolani xb'aanunkil; li na'uxtaanank u, chixb'aanuuq chi sa sa' xch'ool.

9Mexrahok yal chi pak'b'il, chetz'eqtaana li ink'a' us, chapchooqex chi kaw rik'in li us. 10Jo' tz'aqal eeras eeriitz'in naq chera eerib' cherib'il eerib'; chek'oxla naq q'axal ka'loq' oxloq'eb' leekomon.

11Cheyalaq eeq'e chi k'anjelak chi maak'a' hilank, anchalaq b'an leemusiq' naq yooqex chi paab'ank; chexk'anjelaq chiru li Qaawa'. 12Chisaho'q sa' eech'ool sa' xk'ab'a' leeroyb'enihom; chekuyaq li raaxiik' ut junelikaqex chi tijok. 13Chexwotzoq rik'ineb' laj santil paab'anel li wankeb' sa' rajb'al ru, chexk'ehoq ochochnaal.

14Chetz'aama rusilal li Yos sa' xb'eeneb' li xik' neke'ilok eere; cherusilaheb' ut meemajewaheb'. 15Chisaho'q sa' eech'ool rik'ineb' li saheb' sa' xch'ool, chexyaab'aq rik'ineb' li yookeb' chi yaab'ak. 16Wanqex sa' aatin cherib'il eerib', mexq'etq'eto'k, cherahaq b'an li k'aru kub'enaq xwankil; meek'oxla eerib' chi numtajenaq eena'leb'.#12,16 Pr 3,7.

17Maa'ani chereeqajun wi' li raaxiik' rik'in raaxiik'; chek'ehaq eech'ool chi xb'aanunkil li us chiruheb' chixjunil.#12,17 Pr 3,4. 18Wi naru xb'aanunkil, chexwanq sa' usilal rik'ineb' chixjunil, jo'ch'inal jo'nimal naxk'e rib' cheru. 19Ex was wiitz'in raarookex inb'aan, mex'eeqajunk, kanab'omaq b'an naq li Yos taaraqoq aatin, xb'aan naq tz'iib'anb'il sa' li Santil Hu: “We li eeqajunk; laa'in tinq'ajkamunq, chan li Qaawa'”.#12,19 Dt 32,35. 20Jo'kan naq “wi taatz'okaaq li xik' na'ilok aawe, k'e chi wa'ak; wi taachaqiq re, k'e chi uk'ak. Rik'in xb'aanunkil a'in taachalq xxutaan aab'aan”.#12,20 Pr 25,21-22. 21Maak'e chi numtaak li ink'a' us sa' aab'een, chaq'ax b'an a'an rik'in li us.

Currently Selected:

Ro 12: QQC

Highlight

Compare

Copy