Ro 11

Li rela'eb' laj Israel

1Ut ninpatz' wib': Ma xtz'eqtaana li xtenamit li Yos? Maajoq'e b'i'an! Laa'in ajwi' aj Israel, riyajilin laj Abrahán, sa' xteepal laj Benjamín! 2Li Yos ink'a' xtz'eqtaana li xtenamit li xsik'om chaq ru chi junxilaj.#11,2 Ex 19,5-6; Dt 4,20; 1 S 12,22; Sal 94,14. Malaj ink'a' nekenaw li naxye li Santil Hu chirix laj Elías, chanru naq nakoxraatina chaq li Yos re xjitb'aleb' laj Israel? 3“Qaawa', -chan- xlaje'xkamsi eb' laapropeet, xlaje'ruq' laa'artal. Xinkanaak injunes, ut te'raj inkamsinkil”.#11,3 1 R 19,10.14. 4Ut k'aru kisumeek wi' xb'aan li Yos? “Xinkanab' cho'q we wuqub' mil chi winq li ink'a' xe'xwiq'ib' rib' chiru laj Bahal”.#11,4 1 R 19,18. 5Jo'kan ajwi' anaqwan, sa'eb' li kutan a'in, wank jun “rela'” sik'b'il ru xb'aan rusilal li Yos. 6Wi ut sa' xk'ab'a' li rusilal, a'an maawa' chik sa' xk'ab'a'eb' xb'aanuhom; wi ta ink'a' jo'kan, li usilal maawa' raj chik usilal.

7K'a' put ru chi jo'kanan? Laj Israel ink'a' kixtaw li k'aru yo chaq chi xsik'b'al; ut a' chik li sik'b'ileb' ru ke'tawok re. Eb' li junch'ol chik ke'kawub'resiik li xch'ool, 8jo' tz'iib'anb'il sa' li Santil Hu: “Kik'ehe'k reheb' xb'aan li Yos jun musiq'ej aj aalob'resinel ch'oolej: ke'k'ehe'k xsa' ruheb' re naq ink'a' te'iloq, ut eb' li xxik re naq ink'a' te'ab'inq toj chalen anaqwan”.#11,8 Dt 29,3; Is 29,10. 9Laj David ajwi' kixye:

“Li xmeexeb' chikanaaq cho'q ra'al ut kanleb',

cho'q tichk'ob'aal pek ut tojb'amaak sa' xb'eeneb'.

10Che'moyq ta li xsa' ruheb' re naq ink'a' te'iloq,

ut chak'utzub'eb' ta li rix chi junajwa”.#11,9-10 Sal 69,23-24.

11Yaal ajwi', eb' laj Judiiy ke'tichk'ok; ab'anan laa'in ninpatz' wib': Ma te'kanaaq chi t'ant'o chi junajwa? Maajoq'e. Rik'in li xt'anikeb' laj Judiiy kik'ulunk li kolb'a ib' sa' xb'eeneb' li junch'ol chik, re naq eb' laj Israel te'chalq xkaqal xch'ooleb'. 12Ut wi li xt'anikeb' laj Judiiy kixb'ihomob'resi li ruuchich'och' ut rik'in naq ke'kub'siik xwankil ke'b'ihomo'k li maawa'eb' aj Judiiy, ma toja' ta chik naq chixjunileb' te'ok chi paab'ank?

13Ninye eere laa'ex li maawa'ex aj Judiiy: rik'in naq laa'in tz'aqal x'apóstol eb' li maawa'eb' aj Judiiy, ninnima ru link'anjel. 14Mare anchal te'chalq xkaqal xch'ooleb' li wech kik'elil ut te'kole'q junjunqaq sa' xyanqeb'. 15Xb'aan naq wi rik'in naq ke'tz'eqtaanaak eb' laj Judiiy, kik'ame'k wi' chik sa' usilal li ruuchich'och' xb'aan li Yos, ma toja' ta chik li rokikeb' sa' li paab'aal? A'an chanchanaq xwaklijikeb' wi' chik chi yo'yo eb' li kamenaq!

Li tz'aqal olivo ut li k'iche'il olivo

16Ut wi sant li xb'een ru li awimq, sant ajwi' chixjunil. Jo'wi' anchal wi sant li xxe' li che', santeb' ajwi' li ruq'. 17Wi wankeb' li ruq' ke'q'ete'k, ut laa'at li yal k'iche'il olivo kattz'ejwaliik sa' xyanqeb' li ruq' ut kat-ok chi tz'aqonk rik'in li xxe' ut li xya'al li tz'aqal olivo, 18matq'etq'eto'k chiruheb' li ruq'. Ut wi nakaq'etq'eti aawib', chanawaq naq moko laa'at ta nakatkuutunk li xe', a' b'an li xe' nakuutunk aawe.

19“Ke'q'ete'k li ruq' che' re naq laa'in chik tintz'ejwaliiq aran”, cha'qat laa'at. 20Yaal ajwi', ab'anan xmaak'a'il xpaab'aaleb' ke'q'ete'k wi'; a'ut laa'at kaw xaqxookat xb'aan laapaab'aal. Matq'etq'eto'k b'i', chiwanq b'an aaxiw. 21Wi li Yos ink'a' kixkuyeb' xmaak li tz'aqal ruq' li che', mare anchal ink'a' ajwi' tixkuy aamaak laa'at. 22K'e reetal naq chaab'il li Yos, ab'anan kaw ajwi' na'aatinak. Kaw na'aatinak rik'ineb' li ke't'ane'k, ab'an k'ajo' xchaab'ilal aawik'in wi junelik wanqat sa' li xchaab'ilal. Wi ink'a' jo'kan, tat-isiiq ajwi' laa'at. 23Ut eb' laj Judiiy wi ink'a' te'kanaaq sa' xmaak'a'il xpaab'aaleb', te'tz'ejwaliiq wi' chik, xb'aan naq li Yos nim xwankil chi xtz'ejwalinkileb' wi' chik sa' xtoonaleb'. 24Wi katyok'e'k chaq laa'at sa' li k'iche'il olivo li katk'iik wi' chaq, ut kattz'ejwaliik sa' li chaab'il olivo li ink'a' raj naruuk xb'aanunkil, ma toja'eb' ta chik eb' a'an li tz'aqal ruq' ink'a' te'tz'ejwaliiq wi' chik sa' li olivo li yo'lajenaqeb' wi'?

Eb' laj Israel te'xyot' xch'ool te'xjal xk'a'uxl

25Ex was wiitz'in, ink'a' nawaj naq ink'a' ta teenaw li tz'aptz'ookil na'leb' a'in, re naq ink'a' teek'oxla eerib' naq wank eena'leb': jun jachal li tenamit Israel ke'jipob'resiik xch'ool, ut te'wanq chi jo'kan toj reetal talaje'ok chixjunileb' li maawa'eb' aj Judiiy. 26Toja' naq taakole'q chixjunil laj Israel, jo' tz'iib'anb'il sa' li Santil Hu:

“Aran Sión taachalq chaq laj Kolonel

ut a'an taarisi li xmaa'usilal laj Jakob.

27A'anaq a'in linSumwank rik'ineb',

naq tinsach li xmaakeb'”.#11,26-27 Is 59,20-21; 27,9; Jr 31,33-34.

28Sa' xk'ab'a' li Chaab'il Esilal, eb' laj Judiiy wankeb' sa' raaxiik' rik'in li Yos (ut a'in usilal cho'q eere laa'ex); a'ut xb'aan li xb'oqom li Yos, q'axal raarookeb' sa' xk'ab'a'eb' li xna' xyuwa'eb'. 29Xb'aan naq li Yos ink'a' nach'inank xch'ool chirix li xsimaatan ut li xloq'laj b'oqom. 30Jo' naq laa'ex junxil ink'a' kepaab' chaq li Yos ut anaqwan wankex chik sa' li ruxtaan xb'aan li xq'etb'a aatineb' laj Judiiy, 31jo'kan ajwi' eb' a'an: anaqwan ink'a' xe'ok chi paab'ank sa' xk'ab'a' li ruxtaanankil eeru, ab'an yal re naq eb' a'an ajwi' toxe'xtaw uxtaanal. 32Xb'aan naq li Yos kixteneb' q'etb'a aatin sa' xb'eeneb' chixjunil, re naq taaruxtaana ru chixjunileb'.

Makach'in xchamal li xna'leb' li Yos

33Makach'in naxik wi' xchamal xb'ihomal li Yos! K'ajo' xnimal li xna'leb' ut li xk'a'uxl! Relik chi yaal naq maa'ani naru xtawb'al ru li rajom chi moko xyaalal li xk'a'uxl! 34Ani xnawok re li k'aru wank sa' xch'ool li Qaawa'? Ani xk'ehok xna'leb' 35malaj xk'ehok k'a'aq re ru re li Yos re naq tixk'ul wi' chik reeqaj?#11,35 Is 40,13; Job 15,8. 36Xb'aan naq chixjunil nachalk rik'in li Yos ut nawank sa' xk'ab'a' A'an ut cho'q re A'an. Rehaq taxaq li loq'al chi junelik q'e kutan! Jo'kan taxaq.

Currently Selected:

Ro 11: QQC

Highlight

Compare

Copy