Sal 96
96
SAALM 96 (95)
Li Qaawa' a'an awab'ej ut aj raqol aatin
(1 Kr 16,23-33)
1B'ichahomaq junaq ak' b'ich cho'q re li Qaawa',
b'ichanqex cho'q re li Qaawa'
chejunilex li wankatqex sa' ruuchich'och'.
2B'ichanqex sa' xk'ab'a' li Qaawa',
chek'ehaq xloq'al li xk'ab'a',
chepuktesi resil li xkolom rajlal kutan.
3Jultikahomaq li xloq'al reheb' li poyanam,
yehomaq li xninqal ru b'aanuhom
reheb' chixjunil li tenamit.
4Jwal nim xwankil li Qaawa' ut xk'ulub' loq'oniik,
q'axal xiwajel ru chiru chixjunileb' li yos.
5Maak'a' neke'ok wi' li xyoseb' li jalanil tenamit,
ab'an li Qaawa' kixyiib' li choxach'och'.
6Loq'al ut wankilal wankeb' chi xsutam,
kawilal ut nimaak u neke'hilank sa' li xloq'laj ochoch.
7K'ehomaq xloq'al li Qaawa', ex k'iila tenamit;
k'ehomaq xloq'al ut xwankil li qaYos.
8Chenimaaq li xk'ab'a' li Qaawa';
k'amomaq chaq leemayej
ut okanqex sa'eb' li xmuheb'aal.
9Wiq'lanqex chiru li Qaawa' sa' li xloq'laj na'aj;#96,7-9 Sal 29,1-2.
chexiwa ru chejunilex li wankatqex sa' ruuchich'och'.
10Yehomaq reheb' li poyanam:
“Li Qaawa' na'awab'ejink!”.
Kixk'ojob' sa' xna'aj li ruuchich'och',
ut maajaruj taa'eek'anq.
A'an na'awab'ejink reheb' li tenamit sa' xyaalal.
11Chisaho'q taxaq sa' xch'ool li choxa,
chiwanq nimla sahilal sa' ruuchich'och',
chipumb'aq xyaab' li palaw ut chixjunil li wank chisa'.
12Che'ninq'ehiq chixjunileb' li tzuultaq'a,
jo'wi' jo'ch'inal jo'nimal neke'xk'uula.
Che'xajoq xb'aan xsahilaleb' xch'ool
chixjunileb' li che' sa' k'iche'b'aal,
13chiru li Qaawa' xb'aan naq chalk re:
chalk re chi raqok aatin sa' xb'een li ruuchich'och'!
Tixjolomi li choxach'och' sa' tiikilal
ut tixb'eresi chixjunileb' li tenamit
jo' chanru xchaab'ilal xch'ool.
Currently Selected:
Sal 96: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
