Sal 89
89
SAALM 89 (88)
Li xsumwank li Yos rik'in laj David
1Xb'ich laj Etán laj ralch'och'.
2Twaj tinb'icha li xrahom li Qaawa' chi junelik,
tinpuktesi resil li xtiikilal laach'ool junq'e junq'e kutan.
3Tinye naq k'ojk'o laawuxtaan chi junelik,
li xtiikilal laach'ool xaqxo xwankil sa' choxa.
4Xak'ojob' jun sumwank rik'in laj David sik'b'il ru aab'aan,
xab'aanu jun jurament rik'in laj k'anjel chawu:
5“Tink'eheb' laawalal aak'ajol chi awab'ejink chi junelik
ut tinxaqab' xwankil laajunkab'al chi junajwa”.#89,5 2 S 7,12-16; 1 Kr 17,11-14; Sal 132,11; Hch 2,30.
6At Qaawa', li choxa naxnima aawu xb'aan laasachb'ach'oolej,
ut li xch'utameb' li ánjel naxye resil li xtiikilal laach'ool.
7Aran taqe'q, ani taajuntaq'eetaaq wi' li Qaawa'?
Ma wank tab'i' junaq jo' li Qaawa' sa' xyanqeb' li yos?
8Xiwajel ru li Yos sa' xch'utameb' li ánjel,
jwal nim xwankil chiruheb' li jo'k'ihal wankeb' chi xk'atq.
9At Qaawa', at Nimajwal Yos, ani ta chik kama' laa'at?
Q'axal nim laawankil, at Qaawa',
li xtiikilal laach'ool na'ochb'eenink aawe.
10Laa'at nakattuulanob'resink re li xjosq'il li palaw;
naq neke'waklije'k li xkaw oq,
laa'at nakattuqub'ank reheb'.
11Xaputz'i ut xamuch'i li Mama' Xul,#89,11 Sa' xch'ooleb' laj Israel naq sa' xchamal li palaw wank jun mama' xul. Cf. Sal 74,13.
rik'in xkawilal laawuq' xacha'cha'iheb' li xik' neke'ilok aawe.
12Aawe li choxach'och';
jo'ch'inal jo'nimal wank chisa'
laa'at xatk'ojob'ank sa' xna'aj.#89,12-13 Sal 24,1-2; 95,4-5; 1 Ko 10,26.
13Laa'at xatk'uub'ank re li releb'l iq' ut li rokeb'l;
li tzuul Tabor ut Hermón neke'saho'k xch'ool aawik'in.
14Q'axal nim laametz'ew ut kaw aawib',
kaw laanim uq' chi q'axok u.
15Li tiikilal ut li yaal a'aneb' li xkuut laa'awab'ejihom,
li usilal ut li chaab'ilal aj k'amol b'eheb' chawu.
16Us xaq re li tenamit li neke'xnaw xloq'oninkil aawu
ut neke'b'eek sa' xsaqenkil xnaq' aawu, at Qaawa'.
17Neke'saho'k xch'ool sa' laak'ab'a' rajlal kutan
ut neke'xnimob'resi rib' rik'in laatiikilal.
18Xb'aan naq laa'at li xloq'al ut li xkawilaleb';
sa' xk'ab'a' laawusilal naqataqsi li qilob'aal.
19Tz'aqal yaal naq li Qaawa' a'an laj Tenq'ahom qe,
li xSant laj Israel a'an li qaRey.
20Najter q'e kutan xat-aatinak sa' moy u
ut xaye reheb' laj paab'anel:
“Xinsik' ru jun li winq q'axal kaw rib'
ut xinterq'usi xk'ab'a' sa' xyanq lintenamit.
21Xintaw laj David aj k'anjel chiwu#89,21 1 S 13,14; Hch 13,22.
ut xinyul rik'in linloq'laj aseeyt.#89,21 1 S 16,12.
22Junelik wanq li wuq' chi xtenq'ankil,
ut li xnimal inwankil tixk'e xkawub' li xch'ool.
23Li xik' na'ilok re ink'a' taanumtaaq sa' xb'een,
chi moko taarahob'tesiiq xb'aan li ink'a' us xna'leb'.
24Chiru a'an tinputz'i eb' li xik' neke'ilok re
ut tintiq'eb' li neke'tz'eqtaanank re.
25Lintiikilal ut li wusilal te'ochb'eeninq re;
sa' ink'ab'a' laa'in taanimanq xwankil.
26Tinnimob'resi xwankil toj sa' xb'een li Palaw,
ut li xnim uq' taawulaq toj sa' xb'eeneb' li Nima'.
27A'an tixpatz' link'ab'a' chi jo'ka'in:
«At inNa', at inYuwa',
at inYos, at insaqoonak li ninkol wi' wib'!».
28Ut laa'in tinxaqab' cho'q xb'een li walal,
nimaq xwankil sa' xyanqeb' li x'awab'ej li ruuchich'och'.#89,28 Ap 1,5.
29Tinhoy li wuxtaan sa' xb'een chi junelik
ut maajoq'e taasachq sa' inch'ool linsumwank rik'in.
30Tinxaqab'eb' xwankil li ralal xk'ajol chi junelik,
tink'ojob' sa' xna'aj li xk'ojarib'aal
li malaajel ut ma'oso'jel jo' li choxa.
31“Wi eb' li ralal xk'ajol te'xq'et linchaq'rab'
ut ink'a' te'xb'aanu jo' li waatin,
32wi te'xmux xyaalal lintaqlahom
ut ink'a' te'xpaab' li chaq'rab'inb'ileb' wi',
33tink'eheb' chi xtojb'al li xmaakeb' rik'in che'
ut tink'ajtesiheb' ru chi tz'uum
xb'aan naq ke'xq'et li waatin.#89,33 Dt 8,5; 2 S 7,14; Sal 94,12; Pr 3,11-12; Heb 12,5-11.
34Ab'anan junelik tinra laj David ut tintenq'a,
junelik tinb'aanu li xinyeechi'i re.
35Ink'a' tinsach xwankil linsumwank rik'in
chi moko tinjal xyaalal li waatin.
36Sa' xk'ab'a' linsantilal xinye sa' jurament
naq ink'a' tintik'ti'i laj David!
37Eb' li ralal xk'ajol te'wanq xwankil chi junelik,
ut li xk'ojarib'aal kama'aq li saq'e chiwu laa'in,
38kama'aq li po chi junelik,
li nakanaak chi paab'ajel eetalil sa' choxa”.
39Ab'anan, at Qaawa', laa'at xatjosq'o'k rik'in li sik'b'il ru aab'aan,
xatz'eqtaana ut xakanab' xjunes li awab'ej sik'b'il ru aab'aan;
40xasach xwankil laasumwank rik'in laj k'anjel chawu,
ut xamux sa' ch'och' xloq'al li xkoroon.
41Xajuk'i chixjunil li tz'ak sutsu wi' li xtenamit,
ut xakanab' chi po'lemil eb' li kab'l neke'xkol wi' rib'.
42Chixjunileb' li neke'nume'k aran neke'relq'a li k'aru wank re,
ut se'enb'il aj chik xb'aaneb' li tenamit li nach' wankeb'.
43Xak'e wi' chik xmetz'ew eb' li xik' neke'ilok re
rik'in xk'ojob'ankil xch'ooleb' ut xtenq'ankileb'.
44Xawisi xq'esnal li xch'iich' laj David
ut ink'a' xatenq'a sa' li yalok.
45Xak'e chi raqe'k li xnimal xloq'al
ut xakut chi ch'och'el li xk'ojarib'aal.
46Xak'os roq li xyu'am sa' xsaajilal
ut xakanab' sa' xutaan chi junajwa.
47Toj jo' najtil chik yooqat chi xmuqb'al aawib', at Qaawa'?
Ma junelik taak'atoq laajosq'il kama' li xam?
48Jultikaq aawe, at Qaawa', k'aru linyu'am.
Ma maak'a' aj e naq xayoob'tesiheb' li poyanam?
49Ani yo'yooq chi ink'a' ta toxkamq,
chanru taaqakol qib' chiru li kamk?
50B'ar wank, at Qaawa', laarahom li xak'ut najter,
a' li xayeechi'i sa' jurament sa' xk'ab'a' laatiikilal?
51At Qaawa', jultikaq aawe chanru neke'hob'e'k laj k'anjel chawu.
Makach'in li yookin xkuyb'al xb'aaneb' li tenamit!
52Jo'ka'in neke'hob'ok eb' li xik' neke'ilok aawe,
jo'ka'in neke'xhob' li sik'b'il ru aab'aan yalaq b'ar.
53Usilaatinanb'il taxaq li Qaawa' junq'e junq'e kutan!
Jo'kan taxaq, jo'kan taxaq!
Currently Selected:
Sal 89: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
