Sal 81
81
SAALM 81 (80)
Us rajan lintenamit tinxpaab'
1Re li xjolomileb' laj b'ichanel. Rik'in li sítara re Gat. Xb'ich laj Asaf.
2Kaw chexb'ichanq sa' xk'ab'a' li Qaawa', li qakawilal,
japomaq eere chi xloq'oninkil ru li xYos laj Jakob!
3Chexb'ichanq, chetoch' leekok' tun,
ch'e'omaq li loq'laj aarp ut li kitaar!
4Yaab'asihomaq leetronpeet sa' xtiklajik li po,
sa' xxoronik li po, sa' xkutankil li qaninq'e!#81,4 Nm 10,10.
5Xb'aan naq a'an jun chaq'rab' cho'q reheb' laj Israel,
a'an jun xtaqlahom li xYos laj Jakob;
6a'an kik'ehe'k chi xpaab' laj José
naq ki'elk chaq sa' li tenamit Ejiipt.
Nawab'i jun xyaab' kuxej maajun sut wab'ihom:
7“Laa'in xin'isink li iiq sa' aab'een
ut eb' laawuq' xe'xkanab' chaq li kawil k'anjel.
8Xinaapatz' sa' xq'ehil li rahilal, ut xatinkol;
xatinsume toj sa' xyi li kaaq,
xinyal rix laach'ool aran Meribá, sa' releb'aal li ha'.#81,8 Ex 17,7; Nm 20,13.
9“Ex intenamit, chineerab'i;
ok we cheq'usb'al.
Ex aj Israel, us raj teerab'i li k'aru tinye!
10Miwank jalanil yos sa' eeyanqil,
meewiq'ib' eerib' chiruheb' li jalanil yos.#81,10 Ex 20,2-3; Dt 5,6-7.
11Laa'in li Qaawa', laaYos,
laa'in kin'isink chaq aawe sa' li tenamit Ejiipt.#81,11 Ex 20,2.
Chate laawe, ut laa'in tinnujob'resi.
12“A'ut lintenamit ink'a' xrab'i xyaab' linkux,
eb' laj Israel ink'a' xe'raj ab'ink chiwu.
13Jo'kan naq xeb'inkanab' sa' xkawilal li xjolomeb'
re naq te'xb'aanu li x'alaak sa' xch'ooleb'.
14Us rajan lintenamit tinxpaab',
us rajan eb' laj Israel te'xtaaqe linb'e!
15Tikto raj tinsacheb' ru li xik' neke'ilok reheb',
tintaqsi raj li wuq' chi xsak'b'al eb' laj xik'il uuchinel reheb'.
16“Eb' li xik' neke'ilok we te'xkub'si raj rib' chiwu,
ak xaqxo raj sa' xna'aj li xtojb'al rix li xmaakeb'.
17Tinch'oolani raj lintenamit rik'in chaab'il tzekemq,
ut tink'ojob' raj xch'ooleb' rik'in xya'al saqk'aw”.
Currently Selected:
Sal 81: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
