Sal 78
78
SAALM 78 (77)
Li qatzolb'al xb'aan li k'aru xk'ulumeb' laj Israel
1Xb'ich laj Asaf.
At intenamit, chawab'i link'utum,
chak'e reetal li aatin tinye.
2Ok we chi aatinak sa' jaljo ru,
ut tinch'olob' chawu li najteril tz'aptz'ookil na'leb'.#78,2 Mt 13,35.
3Li ak qab'ihom ut qanawom,
li ke'xseeraq'i qe li qana' qayuwa',
4moko tqamuq ta chiruheb' li qalal qak'ajol,
tqach'olob' b'an chiruheb' li te'yo'laaq moqon:
a' li xnimal xloq'al ut xwankil li Qaawa',
ut chixjunileb' li sachb'ach'oolej kilajxb'aanu.
5Li Yos kixk'ojob' jun sumwank rik'in laj Jakob,
kixk'e jun chaq'rab' re laj Israel
6ut kixye reheb' li qana' qayuwa'
naq te'xk'ut a'an reheb' li ralal xk'ajoleb',
re naq taanawmanq xb'aaneb' li tenamit toj chaalel,
a'eb' li maji' yo'lajenaqeb'.
Chi jo'kan te'xk'ut ajwi' reheb' li ralal xk'ajoleb',#78,5-6 Dt 6,7.
7re naq kawaqeb' xch'ool rik'in li Yos;
ink'a' chisachq sa' xch'ooleb' li xninqal ru xb'aanuhom li Yos
ut te'xpaab' chixjunil li xtaqlahom chi junelik.
8Re naq ink'a' te'xb'aanu kama'eb' li xna' xyuwa'eb':
eb' a'an tz'aqal aj q'etoleb' aatin chaq ut kaweb' xjolom,
a'aneb' jun tenamit li kok'aq xsa' nach'inank xch'ool
ut naxq'et li xchaq'rab' li Qaawa'.
9Eb' li ralal xk'ajol laj Efraín, a'aneb' tz'aqal aj simajeb',
ab'an ke'elelik sa' xq'ehil li yalok;
10ink'a' ke'xpaab' li xloq'laj sumwank li Yos,
ink'a' ke'raj xtaaqenkil li xchaq'rab'.
11Kilajsachk sa' xch'ooleb' li k'aru kixb'aanu li Qaawa',
eb' li xninqal ru b'aanuhom kixk'ut chiruheb',
12naq kixb'aanu sachb'ach'oolej chiruheb' li xna' xyuwa'eb',
sa' li tenamit Ejiipt, sa' xtaq'ahil Sohán.#78,12 Ex 7,8-12,32; Sab 16,19.
13Aran kixjach chirib'il li palaw ut kixnumsiheb' junpak'al;
kixram li ha', ut chanchan li tz'ak naq kixaqliik.#78,13 Ex 14,21-22.
14Kixk'ameb' xb'e rik'in li choql chi kutan,
ut rajlal q'oqyink a' chik li xam kib'eresink reheb'.#78,14 Ex 13,21-22.
15Kixjor li saqoonak sa' li chaqich'och' ut kixk'eheb' chi uk'ak:
k'ajo' li ha' ke'xtaw chaq!
16Kixk'e chi pujk'uk sa' li saqoonak,
ut chanchan jun li nima' naq kikub'e chaq.#78,15-16 Ex 17,1-7; Nm 20,2-13.
17A'ut eb' a'an ke'maakob'k wi' chik,
ke'xq'etq'eti rib' chiru li Nimajwal Yos sa' li chaqich'och';
18ke'xyal rix li Qaawa' sa' li xch'ooleb'
naq ke'xtz'aama xwaheb' chi q'axal yo'oon.
19Xik' ke'xye chirix li Qaawa':
“Ma truuq ta li Yos chi xk'eeb'al qatzekemq sa' chaqich'och'?
20Yaal ajwi', kixjor li saqoonak ut ki'elk li ha';
chanchan li roq nima' naq kipujk'uk chaq.
Ab'anan ma truuq ajwi' tixk'e qawa,
ma truuq tixk'e qatib' chiqajunilo?”, chankeb'.
21K'ajo' naq kijosq'o'k li Qaawa' naq kirab'i a'an,
chanchan jun xam kilochk sa' xb'een laj Jakob;
kimoqk chaq xjosq'il li Yos sa' xb'een laj Israel,
22xb'aan naq ink'a' ke'xpaab' li Qaawa'
chi moko k'ojk'o xch'ooleb' rik'in li xtenq'aal.
23Toja' naq kixtaqla chaq li choql toj taqe'q
ut kixtehatq li rokeb'aal li choxa;
24kixhoy chaq li maná sa' xb'eeneb' re te'xwa'
ut kixk'e reheb' li choxahil triiw.#78,24-25 Sab 16,20-29; Jn 6,31.
25Xwaheb' li ánjel kixwa' li winq;
numtajenaq li wa kitaqlaak chaq
ut ke'k'ojlaak xch'ool chixjunileb'.
26Chirix chik a'an kixtaqla chaq li iq' na'elk sa' releb'l saq'e,
rik'in xnimal xwankil kixb'eela chaq li iq' nachalk sa' rokeb'l iq'.
27Kama' li pojtz' naq kixhoy chaq li tib' sa' xb'eeneb',
kama' li samahib' chire palaw
naq kixtaqlaheb' chaq li xik'anel xul.
28Eb' a'in ke't'ane'k sa' xyi li xna'ajeb'
ut kilaje'kub'eek chi xsutam li xmuheb'aaleb'.
29Ke'tzekank chi us toj reetal ke'nujak,
jo'kan naq kik'ojlaak xch'ooleb'.
30Ab'an toje'aq xe'raqe'k chi nujak
ut toj wank ajwi' li xtzekemq sa' reheb',
31naq k'ajo' kichalk xjosq'il li Yos sa' xb'eeneb':
kixkamsiheb' li q'axal kaweb' rib'
ut kixsacheb' ru li xsaajilaleb' laj Israel!#78,18-31 Ex 16,2-15; Nm 11,4-23.31-35.
32Ab'an ke'maakob'k wi' chik
ut ink'a' ke'xpaab' li sachb'ach'oolej kilajxb'aanu.
33Jo'kan naq li Yos kirisi li xyu'ameb' rik'in yal jun apusink,
kixraq li xkutaneb' rik'in raxkamk.
34Naq yook xkamsinkileb', ke'xsik' li Yos,
ke'sutq'iik wi' chik rik'in ut ke'xk'e xch'ooleb' chirix.
35Toj aran ke'jultiko'k reheb' naq li Yos a'an li saqoonak,
a'an li Nimajwal Yos, laj Kolol reheb'.
36Ab'an yal rik'in xtz'uumal reheb' ke'xnima xloq'al,
ut rik'in li ru'uj raq'eb' ke'tik'ti'ik chiru.
37Ink'a' tiikeb' xch'ool chirix li Qaawa',#78,37 Hch 8,21.
ink'a' ke'xk'e xloq'al li xSumwank.
38A'ut li Yos junelik naxtoq'ob'a ruheb':
kixkuyeb' xmaak ut ink'a' kixsacheb',
k'iila sut kixkuy rib' ut ink'a' kipo'k sa' xb'eeneb'.
39Xb'aan naq wank sa' xch'ool naq yal kaameleb',
kama'eb' li iq' li nanume'k ut ink'a' chik nasutq'iik chaq.
40K'ajo' naq ke'xq'etq'eti rib' sa' li chaqich'och',
q'axal ke'xpo' xch'ool sa' li junesal na'ajej a'an.
41Ke'ok wi' chik chi xyalb'al rix li Qaawa'
ut ke'xchiq' xjosq'il li xSant laj Israel.
42Ink'a' ke'jultiko'k reheb' li xnimal xwankil
jo'wi' li kutan ke'kole'k wi' sa' ruq'eb' li xik' neke'ilok reheb',
43naq kixb'aanu xninqal ru eetalil aran Ejiipt
ut naab'al li sachb'ach'oolej sa' xtaq'ahil Sohán.
44Kixsutq'isi chi kik'ul li xnima'eb',
ut eb' laj Ejiipt ink'a' chik ke'uk'ak.#78,44 Ex 7,17-21; Sab 11,6.
45Kixtaqla chaq eb' li kas re naq te'tiwe'q,#78,45 Ex 8,20-24.
jo'wi' eb' li amoch#78,45 Ex 8,1-6. re naq te'ch'i'ch'i'iiq xb'aaneb'.
46Kixq'axtesi li rawimqeb' reheb' laj saak,
ut li k'aru ke'xtawasi wi' rib'
ki'oso'k xb'aaneb' li raxq'een.#78,46 Ex 10,12-15; Sab 16,9.
47Kixsach ruheb' li x'uub' rik'in saqb'ach
ut rik'in li ke kixk'ateb' li x'iig.
48Kixk'eheb' chi kamk li xwakaxeb' xb'aan li saqb'ach,
ut eb' li karneer ke'kamk xb'aan li raq'kaaq.#78,47-48 Ex 9,22-25; Sab 16,16.
49Kixkut sa' xb'eeneb' xxamlel li xjosq'il:
k'ajo' naq kik'ahiik!
Kipo'k ut kimayok sa' xch'ool:
a'an reetalil li rahilal chaalel.
50Kixk'ut chi tz'aqal li xjosq'il chiruheb',
ink'a' kixkol li xyu'ameb' chiru li kamk,
kixk'e b'an rub'el xwankil li raxkamk.
51Kixkamsiheb' li xb'een ralaleb' laj Ejiipt,
eb' li q'axal kaweb' rib' sa' xmuheb'aaleb' laj Kam.#78,51 Ex 12,29; Sab 18,6-19.
52Kama'eb' li karneer naq kirisi chaq li xtenamit,#78,52 Ex 13,17-22; Sal 77,21; Is 63,11-14.
jo'keb' ketomq naq kixb'eresiheb' sa' li chaqich'och'.
53Maak'a' ke'xk'ul naq kixk'ameb' xb'e,
a'ut eb' li xik' neke'ilok reheb' ke'nuq'e'k xb'aan li palaw.#78,53 Ex 14,26-28; Sab 10,18-19.
54Kixk'ameb' li xtenamit toj sa' li loq'laj na'ajej,#78,54 Ex 15,17; Jos 3,14-17.
toj sa' li tzuul li ki'eechaniik xb'aan li xnim uq'.
55Chiruheb' a'an kixticheb' chi najt eb' li poyanam,
kixk'ojob' li xteepaleb' laj Israel sa' li xmuheb'aaleb' laj Kanahán#78,55 Jos 11,16-23.
ut kixjek'i li na'ajej cho'q reechanihomeb'.
56Ab'an eb' laj Israel ke'xyal rix li Nimajwal Yos,
ke'xq'etq'eti rib' chiru#78,56 Jue 2,11-15.
ut ink'a' ke'raj xpaab'ankil li xchaq'rab'.
57Ke'xq'et li raatin, tik ke'sachk,
ke'xb'aanu wi' chik jo' ke'xb'aanu li xna' xyuwa'eb' junxil,
chanchaneb' li xna' simaj li ink'a' tiik najayalink.
58Ke'xchiq' xjosq'il rik'ineb' li xtijob'aal
ut ke'xpo' xch'ool rik'ineb' li yiib'anb'il yos.
59Naq li Yos kirab'i a'an,
k'ajo' naq kijosq'o'k,
ut kixtz'eqtaana laj Israel chi junajwa;
60kixkanab' li xmuheb'aal wank aran Siló,
a' li rochoch kixk'ojob' sa' xyanqeb' li winq.#78,60 Jos 18,1; Jr 7,12-14; 26,6.
61Kixkanab' li loq'laj Kaax sa' ruq'eb' li xik' neke'ilok reheb',
a' li reetalil li xloq'al ut xwankilal.#78,61 1 S 44,22.
62Kichalk xjosq'il sa' xb'een li tenamit sik'b'il ru xb'aan,
ut kixk'eheb' chi kamsiik xb'aaneb' laj xik'il uuchineleb'.
63Li xam kichoyok reheb' li saaj al
ut ink'a' chik kiwank sahil ch'oolejil chirixeb' li tuq'ixq.
64Chixjunileb' laj tij ke'kamsiik chi ch'iich'
ut eb' li xmalka'aneb' ink'a' ke'yaab'ak chirixeb'.
65Toja' naq ki'ajk ru li Qaawa' kama' wi' sa' xwara,
kama' naq ajaamil ru li kaw rib' chirix li xkalajik.
66Li Yos kixtiq'eb' li xik' neke'ilok reheb',
ut xutaanal ke'kanaak chi junajwa.
67Kixtz'eqtaana li xjunkab'al laj José
ut ink'a' kixsik' ru li xteepal laj Efraín.
68Ab'an kixsik' ru li xteepal laj Judá
jo'wi' li tzuul Sión li q'axal raaro xb'aan.
69Aran kixyiib' li rochoch najt xteram kama' li choxa,
ut ub'elanb'il chi us chanchan li ch'och' kawteninb'il.
70Kixsik' ru laj David, laj k'anjel chiru,
ut kirisi chaq sa' xna'ajeb' li karneer
71re naq tixkanab' li k'anjel a'an
ut a' chik li xtenamit tixb'eresiheb',
a'eb' laj Israel, li reechanihom.#78,70-71 1 S 16,11-12; 2 S 7,8; 1 Kr 17,7.
72Ut laj David kixb'eresiheb' rik'in xchaab'ilal xch'ool
ut kixk'ameb' xb'e sa' tiikilal.
Currently Selected:
Sal 78: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
