Sal 74
74
SAALM 74 (73)
Xpo'lemil li rochoch li Yos
1Xb'ich laj Asaf.
At Qaawa', k'a'ut naq xoohaatz'eqtaana chi junajwa?
K'a'ut naq yo laajosq'il sa' qab'een laa'o
li karneer k'aak'alenb'ilo aab'aan?
2Chijultiko'q aawe li komonil kaweechani najter q'e kutan,
a' li molam kakol laa'at re tkanaaq cho'q aawe;
chijultiko'q aawe li tzuul Sión
b'arwi' kayiib' laamuheb'aal.
3Chalqat chi junpaat chi rilb'al li ninqi po'lem a'in:
chixjunil laaloq'laj ochoch xjuk'e'k xb'aan laj xik'il uuchinel.
4Sa' xyi laatenamit k'ajo' naq xe'xjap reheb' li xik' neke'ilok aawe,
ut xlaje'xxaqab' li reetalileb'.
5Jo'keb' laj pahol b'e sa' k'iche' rik'in maal,
xe'xjuk' chixjunil.
6Xe'ok chi xwech'inkil chixjunqalil li re kab'l;
rik'in maal ut t'ojleb' xe'xjori chixjunil.
7Xe'xloch xxamlel laaloq'laj ochoch,
xe'xjuk'i ut xe'xmux laamuheb'aal.
8Xe'xye sa' xch'ooleb':
“Junxikikaqeb' naq te'qasach!”.
Sa' chixjunil li tenamit xlaje'xk'at
chixjunileb' li tijob'aal.
9Ink'a' chik naqil li qeetalil
ut maak'a'eb' chik li propeet,
chi moko wank junaq ta qe
li naxnaw toj jo'q'e qu.
10At qaYos, toj jo' najtil chik tooxhob' laj xik'il uuchinel?
Ma chi junajwa tixmajewa laak'ab'a' li xik' na'ilok qe?
11K'a'ut naq ink'a' nakak'ut laawankil?
Chaye' laanim uq' ut chasach ruheb'!
12Chalen chaq sa' xtiklajik laa'at laj Eechal qe, at Qaawa',
ut k'iila sut xoohaak'e chi q'axok u.
13Laa'at katjachok re li palaw rik'in laawankil,#74,13 Ex 14,21.
kajori xjolomeb' li josq' aj xul sa' li palaw.
14Laa'at katputz'ink re xjolom li Lebiatán#74,14 Sa' xch'ooleb' laj Israel naq sa' xchamal li palaw wank jun mama' xul. Cf. Job 3,8; 41,1; Sal 89,11; 104,26; Is 27,1.
ut kak'e chi xtiweb' li ninqi xul sa' palaw.
15Laa'at kattehok xyo'leb'aal li ha' sa' pek,
ut kachaqihob'resi li yu'amha' chi junajwa.
16Aawe li kutan, aawe ajwi' li q'oqyink,
laa'at katxaqab'ank re sa' xna'aj li po ut li saq'e;#74,16-17 Gn 1,3-18.
17laa'at katraqok re chixjunil xnub'ajlil li ruuchich'och'
ut nakataqla chaq li saq'ehil ut li hab'alq'e.
18Chinaq sa' laach'ool, at Qaawa':
laj xik'il uuchinel nakatxmajewa;
jun jip aj tenamit neke'xtz'eqtaana laak'ab'a'.
19Maaq'axtesi sa' ruq' li josq' aj xul li xyu'am laach'ina mukuy,
misachk sa' aach'ool chi junajwa li xyu'am
eb' li q'axal toq'ob'aal ruheb'.
20Chijultiko'q aawe li sumwank kak'ojob',
xb'aan naq nujenaqeb' chi raaxiik'
chixjunileb' li na'ajej sa' tenamit.
21Ink'a' taxaq xutaanal chi'elq li rahob'tesinb'il;
che'xk'e taxaq xloq'al laak'ab'a' eb' li neb'a' ut li toq'ob'aal ruheb'.
22Waklin chaq, at Qaawa',
kol rix laawankil;
jultikaq aawe naq li jip yo chahob'b'al chi junelik.
23Misachk sa' aach'ool naq japjookeb' re
eb' li xik' neke'ilok aawe;
yo chi numtaak li mululij ib' neke'xb'aanu
eb' laj xik'il uuchinel aawe!
Currently Selected:
Sal 74: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
