Sal 73
73
SAALM 73 (72)
K'aru toxe'kanaaq wi' laj maak ut li chaab'il xch'ool
1Xsaalm laj Asaf.
K'ajo' xchaab'ilal xch'ool li Yos rik'ineb' laj Israel,
jwal nim li rusilal li Qaawa'
sa' xb'eeneb' li saqeb' ru xch'ool.
2Kach'in chik maa xintichk'ok,
b'a'b'ay aj chik maa xint'ane'k,
3xb'aan xkaqalinkileb' li q'etq'eteb'
ut xb'aan rilb'al naq wankeb' sa' sahilal
li ink'a' useb' xna'leb'.#73,3-14 Job 21; Jr 12,1-4; Hab 1.
4Eb' a'an maak'a' k'a'ux wi' li xch'ooleb',
q'axal kaweb' ut ninq xtib'eleb';
5ink'a' neke'reek'a li rahilal neke'xk'ul chixjunileb',
maajun ch'a'ajkilal neke'xk'ul jo'eb' li junch'ol.
6Jo'kan naq li q'etq'etil a'an xq'oleb',
li raaxiik' a'an li aq'ej li natz'apok reheb'.
7Nujenaqeb' chi lab'al ut maa'usilal,
numtajenaq sa' raanmeb' li yib' aj na'leb'.
8Neke'se'ek sa' xch'ooleb' ut yib'ru neke'aatinak;
q'axal neke'xq'etq'eti rib' naq neke'raj xyoob'ankil raaxiik'.
9A'aneb' li neke'ajok taqlank sa' xb'een li choxa,
ut eb' li ru'uj raq' neke'xk'e xwankileb' sa' ruuchich'och'.
10Jo'kan naq lintenamit naxik chirixeb'
ut neke'xpaab' jo'ch'inal jo'nimal yeeb'il xb'aaneb'.
11Neke'xye sa' xch'ooleb':
“Chan ta naq tixnaw li Qaawa'?
Ma tixk'e tab'i' reetal li Nimajwal Yos?”.#73,11 Sal 10,4.11; 14,1; 53,2; Job 22,13-14; Is 29,15.
12K'ehomaqeb' reetal:
eb' li yib'ru xna'leb' junelik sa wankeb'
ut k'ajo' naq neke'xtamresi xb'ihomaleb'.
13Maak'a' aj e naq xinwank chi saq ru linch'ool;
maak'a' aj e naq xinch'aj li wuq',
jo' reetalil naq maak'a' linmaak.
14Xb'aan naq rajlal kutan yookeb' chinteninkil,
ut eq'la junelik nink'ul inrahob'tesinkil.
15Wi ta xinye: “Tin'aatinaq kama'eb' a'an”,
xinb'alaq'iheb' raj li xtenamit li Yos.
16Xintikib' xk'oxlankil rix re xtawb'al ru,
ab'anan q'axal ch'a'aj cho'q we xnawb'al a'an.
17Toj xin'ok sa' laaloq'laj ochoch, at Qaawa',
naq xintaw ru k'aru te'xk'ul.
18Ch'olch'o naq xak'eheb' sa' xiik'ilal,
xatikisiheb' chi oso'k.
19Sa' junpaat te'kanaaq chi xiwajel rilb'aleb'
ut te'ok chi oso'k xb'aaneb' xxiw.
20Kama' wi' li ajk sa' matk', at Qaawa',
jo'kan naq taatz'eqtaanaheb' naq tatwakliiq.
21Naq xraho'k sa' inch'ool
ut xmayok sa' li waanm chi k'oxlak chiwix,
22laa'in chaq jun jip ut maak'a' inna'leb';
kama'in chaq junaq xul chawu, at Qaawa'.
23Ab'anan xinwank aawik'in chi junelik:
xinaachap chiru linnim uq',
24xinaab'eres rik'in xnimal laak'a'uxl,
ut sa' roso'jik tinaak'ul aawik'in sa' laaloq'al.
25Ani ta chik wank we sa' choxa?
Naq wankin aawik'in,
maak'a' chik ninrahi sa' ruuchich'och'.
26Us ta lintib'el ut linna'leb' yo chi oso'k,
ab'an li Yos nak'ehok xkawub' linch'ool:
a'an linsahilal ut linb'ihomal chi junelik!
27Eb' li neke'najto'k aawik'in, te'oso'q;
laa'at tatsachoq ruheb' li neke'xmux laarahom.
28A'ut li wank chi xk'atq li Yos a'an li us cho'q we:
laa'in xinq'axtesi wib' rub'el roq rub'el ruq' li Qaawa',
ut nawaj xpuktesinkil resil chixjunil li xb'aanuhom.
Currently Selected:
Sal 73: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
