Sal 72
72
SAALM 72 (71)
Li awab'ej tz'aqal re ru
1Xsaalm laj Salomón.
At inYos, chak'e taxaq xna'leb' li awab'ej ut tiikaq ru xch'ool
jo' naq laa'at tiik ru laach'ool.
2Chixjolomi taxaq laatenamit sa' tiikilal,
ut eb' li neb'a' chixb'eresiheb' sa' xyaalalil.
3Eb' li tzuul ut eb' li b'ool te'xk'am ta chaq
li tuqtuukilal ut tiikilal re li tenamit.
4Chixkol taxaq eb' li neb'a',
chixtenq'aheb' li toq'ob'eb' ru
ut chixsachaq xwankil li narahob'tesink reheb'.
5Wanqaq chi junelik kama' li saq'e,
jo'kaq li po junq'e junq'e kutan.
6Kama'aq li hab' li nat'ane'k sa' xb'een li pim,
kama'aq li xchu'ke li nat'aqresink re li ch'och'.
7Chi'atz'umaq li tiikil ch'oolej
naq wanq chi awab'ejil;
k'ajo'aq li tuqtuukilal jo' najtil twanq li po sa' xb'een li ruuchich'och'.
8Chiwanq xwankil chalen sa' li palaw toj sa' li palaw jun chik,
chalen sa' li nima' Éwfrates toj sa' xmaril li ruuchich'och'.#72,8 1 R 4,21; Zak 9,10; Eklo 44,21.
9Chiru a'an chixk'utzub' rib' li Mama' Xul,#72,9 Chirix liMama' Xul: cf. Is 27,1; Job 3,8; 26,13; 40,25. Wan neke'xtz'iib'a arin: eb' li poyanam li wankeb' sa' li chaqich'och'.
ut eb' li xik' neke'ilok re che'xlow li pojtz'.
10Eb' li awab'ej re Tarsis ut li wankeb' sa' xyi li palaw
che'xk'ameb' chaq xsimaatan.
Eb' li awab'ej re Sabá ut Sebá che'xk'e xtojeb'.
11Chixjunileb' li awab'ej che'xwiq'ib' rib' chiru a'an,
ut chixjunileb' li tenamit che'k'anjelaq chiru.
12Xb'aan naq a'an taakoloq re li neb'a' li yo chi tz'aamank,
a' li toq'ob' ru li ink'a' natenq'aak xb'aan anihaq.
13Taaruxtaana ruheb' li neb'a' ut li wankeb' sa' rajb'al ru;
tixkoleb' xyu'am li q'axal ra wankeb'.
14A'an taa'isinq reheb' sa' li raasa ut li rahob'tesiik,
xb'aan naq k'ajo' xloq'al li xyu'ameb' chiru a'an.
15Jo' najtil yo'yooq li awab'ej, chik'ehe'q re li oor nachalk Sabá;
ink'a' chich'anab'aaq tijok chirix,
ut usilaatinanb'ilaq li xk'ab'a' chixjunil li kutan.
16Numtajenaqaq li awimq sa' ruuchich'och',
heetanqeb' sa' xb'eeneb' li loq'laj tzuul;
chi'uuchinq ut chituxmeq li ch'och' kama' li tzuul Líbano,
chiwanq triiw kama' li pim sa' li tzuultaq'a.
17Usilaatinanb'il taxaq xk'ab'a' chi junajwa
ut wanqaq chi junelik kama' li saq'e!
Osob'tesinb'ileb' taxaq chixjunileb' li tenamit sa' xk'ab'a' a'an.
“Us xaq re”, cha'qeb' taxaq chixjunil li ruuchich'och'.
18Usilaatinanb'il taxaq li Qaawa', xYos laj Israel:
ka'ajwi' A'an nab'aanunk re sachb'ach'oolej!
19Usilaatinanb'il taxaq li xloq'laj k'ab'a' chi junelik;
chinujaq taxaq chixjunil li ruuchich'och' rik'in xloq'al!
Jo'kan taxaq, jo'kan taxaq!
20Arin neke'raqe'k eb' li xtij laj David, ralal laj Jesé.
Currently Selected:
Sal 72: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
