Sal 71
71
SAALM 71 (70)
Xtij jun li winq sa' xtiixilal
1At Qaawa', aawik'in ninmuhenk,
maajaruj taxaq taasachb'esiiq inch'ool chawix!
2Sa' xk'ab'a' xtiikilal laach'ool chinaakol ut ach'ab'in;
k'e laaxik chi wab'inkil ut chinaakol!
3Laa'at taxaq linsaqoonak, linkawil ochoch b'arwi' tinkol wib',
xb'aan naq relik chi yaal naq laa'at linsaqoonak ut linkawil ochoch.
4At inYos, chinaakol sa' ruq' li ink'a' us xna'leb';
chinaakol taxaq chiru li nab'aanunk maa'usilal ut nayoob'ank raaxiik'.
5Xb'aan naq laa'at li woyb'enihom, at Qaawa';
chalen chaq sa' insaajilal kaw linch'ool aawik'in, at inYos.
6Naq toj maji' nin'ilok kutan,
ak ninkuutu wib' aawik'in;
chalen chaq sa' linsiyajik rik'in linna',
laa'at nakat-ilok chaq we:
laa'in tink'e aaloq'al chi junelik.
7Naab'aleb' neke'sachk xch'ool chi wilb'al,
ab'anan laa'at linkawil saqoonak.
8Junelik ninye: “K'ajo' laaloq'al!”, chankin;
ninterq'usi laak'ab'a' chixjunil li kutan.
9Minaatz'eqtaana taxaq sa' lintiixilal,
minaakanab' injunes naq yooq chi lajk linmetz'ew.
10Xb'aan naq k'ajo' neke'aatinak chiwix eb' li xik' neke'ilok we;
eb' li neke'ajok inkamsinkil neke'k'uub'ank ut neke'xye:
11“Taaqehomaq ut chapomaq:
xkanab'aak xjunes xb'aan li Yos
ut maajun chik taakoloq re”.
12At inYos, matkanaak chi najt wik'in;
at inNa' at inYuwa', chaseeb'a chaq aawib' chintenq'ankil!
13Ink'a' us che'elq ut che'sache'q xwankil eb' li neke'ajok inkamsinkil;
xutaanal che'kanaaq ut sachsooq xch'ooleb'
li neke'yoob'ank raaxiik' chiwix laa'in.
14A'ut laa'in k'ojk'ooq inch'ool aawik'in
ut q'axal chik tinnima aaloq'al.
15Tinpuktesi resil li xtiikilal laach'ool
ut tinch'olob' laakolom chixjunil li kutan.
16Tin'ok xyeeb'al li sachb'ach'oolej xab'aanu, at Qaawa';
tinjultika junelik naq ka'jat wi' laa'at tiik aach'ool.
17At inYos, chalen chaq sa' linsaajilal xinaatzol ut xinaatij,
ut toj chalen anaqwan ninye resil eb' laasachb'ach'oolej.
18Ut anaqwan naq xin'ok chi tixk ut saqeb' chik li wismal,
minaakanab' injunes, at inNa' at inYuwa',
re naq toj tinpuktesi resil li xnimal aawankil
reheb' li tenamit toj chaalel.
19At inYos, li xtiikilal laach'ool nawulak toj sa' choxa;
k'ajo' xnimal li sachb'ach'oolej xab'aanu.
Ani ta chik junaq kama' laa'at?
20Us ta xinaak'e chi rilb'aleb' li k'iila ch'a'ajkilal ut rahilal,
ab'an taak'e wi' chik inyu'am;
tulinaawisi sa' xchamal li jul wankin wi',
21taanimob'resi linloq'al ut taak'ojob' wi' chik li waanm.
22Ut laa'in tinyoxinq chawu rik'in aarp;
at inYos, tinb'icha xnimal laatiikilal,
tinwajb'aq cho'q aawe, at xYos laj Israel.
23K'ajo' xsahil li waanm naq tinyaab'a laak'ab'a'!
Chi anchal linch'ool tinb'ichanq sa' xk'ab'a' laakolom.
24Li ru'uj waq' tixseeraq'i laatiikilal chi junelik,
xb'aan naq xe'sache'k xwankil ut xutaanal xe'kanaak
chixjunileb' li xe'ajok raj inkamsinkil.
Currently Selected:
Sal 71: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
