Sal 69
69
SAALM 69 (68)
Tz'aamank sa' li rahilal
1Re li xjolomileb' laj b'ichanel. Taab'ichamanq jo' chanru li xyaab': “Eb' li liryo”. Xsaalm laj David.
2Chinaakol taxaq, at inYos,
yo chi wulak li ha' toj chinkux.
3Yookin chi sub'e'k sa' saab' ru li k'ajo' xchamal,
ink'a' nintaw xna'aj li woq re naq tinxaqliiq;
xinwulak toj sa' xchamal li ha'
ut li xkawil oq li nima' yo chinjukunkil.#69,3 Jon 2,7.
4Xinlub'k chi xjapb'al we;
taaxamo'q xsa' linkux,
taa'oso'q xsa' li wu xb'aan royb'eninkil linYos.
5Naab'aleb' li xik' neke'ilok we chi maak'a' inmaak,#69,5 Sal 35,19; Jn 15,25.
numtajenaqeb' chik chiru xk'ihal li wismal.
Xe'k'ihank li neke'rahob'tesink we chi maak'a' xyaalal,
eb' li neke'sachok we
ut neke'xtitz' we li k'aru ink'a' welq'ahom.
6At inYos, laa'at nakanaw linjipil,
moko muqmu ta chawu li ink'a' us xinb'aanu.
7At Nimajwal Yos, ink'a' taxaq te'xutaanaq inb'aan
eb' li wankeb' royb'enihom aawik'in!
Ink'a' taxaq te'luktaaq xch'ool inb'aan
eb' li neke'sik'ok aawe, at xYos laj Israel!
8Sa' aak'ab'a' laa'at xink'ul hob'e'k, ut xutaanal xinkanaak.
9Ink'a' chik neke'xnaw wu eb' li was wiitz'in;
ab'lin aj chik chiruheb' li ralal xk'ajol linna'.#69,9 Job 19,13.
10Xb'aan xraab'al laawochoch k'ajo' naq naxamnak linch'ool,#69,10 Jn 2,17.
ut sa' inb'een nanaqk li xmajewahomeb' li neke'hob'ok aawe.#69,10 Ro 15,3.
11Naq ninyot' linch'ool rik'in ayuun,
inhob'b'al chik neke'xb'aanu;
12naq nink'e saak chiwix xb'aan rahil ch'oolej,
eetz'ub'aal chik ninkanaak wi' chiruheb'.
13Chixjunileb' li poyanam neke'xyoob' aatin chiwix,
ut eb' laj kalajenaq neke'b'ichank re inhob'b'al.
14Ab'an, at Qaawa', laa'in nintijok chawu:
anaqwan li chaab'il honal.
Sa' xk'ab'a' xnimal laarahom chinaasume;
rik'in laawuxtaan laatenq'aal chinaakol, at inYos.
15Chinaawisi sa' li saab', minsub'ek anchal;
chinkole'q taxaq chiruheb' li xik' neke'ilok we,
jo' ajwi' chiru li ha' li k'ajo' xchamal.
16Ink'a' taxaq tinxjuku li xkawil oq li nima',
ink'a' taxaq tinxnuq' li chamal jul;
mitz'aponk taxaq sa' inb'een li xhomtaq'a.
17Chinaasume chaq, at Qaawa':
chaab'ilat ut jwal nim laarahom.
Xb'aan xnimal laawuxtaan b'alq'us chaq laawilob'aal wik'in.
18Maamuq li xnaq' aawu chiru laj k'anjel chawu:
chinaasume chaq chi junpaat,
xb'aan naq q'axal ra wankin.
19Jilon chaq wik'in ut chinaakol,
chinaawisi taxaq sa' ruq'eb' li xik' neke'ilok we!
20Ch'olch'o chawu chanru nikine'xse'e ut nikine'xhob';
makach'in nikine'reetz'u!
Chawu laa'at wankeb' li neke'rahob'tesink we.
21Q'axal nayot'e'k li waanm xb'aan naq nikine'xhob':
kach'in aj chik maa ninkamk.
Nawoyb'eni uxtaanaak,
ab'an ink'a' nintaw;
nawoyb'eni junaq aj k'ojob'anel ch'ool,
ab'an maajun junaq nintaw.
22Sa' lintzekemq xe'xk'e li b'an nakamsink,
ut naq xchaqik we, a' li k'ahil ha' xe'xyeechi'i chi wuk'.#69,22 Mt 27,34,48; Mk 15,23,36; Lk 23,36; Jn 19,28-29.
23Li xninq'eheb' chisutq'iiq ta chi kanleb'aal,
ut li xchamal xsasal li wank reheb'
chisutq'iiq ta chi ra'al.
24Chimoyonq xsa' ruheb' ut ink'a' ta chik te'iloq,
chak'e chi lajk xmetz'eweb' chi junelik.#69,23-24 Ro 11,9-10.
25Chak'ut taxaq laajosq'il sa' xb'eeneb',
ut toxe'tawe'q taxaq xb'aan laak'a.
26Li xna'ajeb' chikanaaq ta chi nakirnak,
ut maajun ta chik chihilanq sa' li xmuheb'aaleb',#69,26 Hch 1,20.
27xb'aan naq neke'xrahob'tesi li wank xrahilal aab'aan
ut neke'xyu' xtiq'ilal li tiq'b'il aab'aan.
28Chatiq xkomon li xmaa'usilaleb' rik'in maa'usilal;
ink'a' ta chik che'tz'aqonq sa' laakuyum.
29Che'sache'q ta reetalileb' sa' xhuhil li yu'am,#69,29 Ex 32,32; Ap 3,5; 13,8; 17,8.
ink'a' ta chik che'tz'iib'aaq xk'ab'a'eb' rochb'eeneb' li tiikeb' xch'ool.
30A'ut laa'in, at inYos,
q'axal xtoq'ob'aal wu ut rahob'tesinb'ilin;
chinaawaklesi taxaq ut chinaakol!
31Tinnima xk'ab'a' li Qaawa' rik'in b'ichank,
tinterq'usi xloq'al ut tinyoxinq chiru.
32A'an q'axal tixk'ulub'an wi' chik ru li Qaawa' chiru junaq wakax,
malaj chiru junaq ral wakax li wanq xxukub' ut rixi'ij.
33Naq te'ril a'an eb' li neb'a',
q'axal te'saho'q xch'ool,
ut taawanq xkawub' xch'ooleb' li neke'sik'ok re li Yos!
34Xb'aan naq li Qaawa' narab'iheb' li neb'a',
ut ink'a' naxtz'eqtaana li xtenamit tz'aptz'ookeb' sa' tz'alam.
35Chinimaaq ru li Qaawa' xb'aan li choxach'och';
chinimaaq ru xb'aan li palaw ut chixjunil li nab'ulb'utk chisa'.
36Xb'aan naq li Yos tixkol Jerusalén
ut tixwaklesi wi' chik eb' li tenamit re Judá.
Eb' li ralal xk'ajoleb' laj k'anjel chiru te'wanq wi' chik aran;
37te'xk'ul li na'ajej ut te'reechani wi' chik a'an.
Eb' li neke'rahok re xk'ab'a' li Yos, te'wanq chisa'.
Currently Selected:
Sal 69: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
