Sal 68
68
SAALM 68 (67)
Xnimankil ru li sachb'ach'oolej kixb'aanu li Yos
1Re li xjolomileb' laj b'ichanel. Xsaalm ut xb'ich laj David.
2Li Qaawa' naxaqliik
ut eb' li xik' neke'ilok re
neke'xcha'cha'i rib'eb';
eb' li neke'tz'eqtaanank re
neke'elelikje'k chiru.#68,2 Nm 10,35.
3Kama' naq na'oso'k li sib' sa' iq',
kama' naha'lenk li waakab' chiru xam,
jo'kan naq te'oso'q chiru li Yos
eb' li ink'a' useb' xna'leb'.
4A'ut eb' laj paab'anel neke'saho'k ut neke'b'ichank
chiru li Yos xb'aan xsahilaleb' xch'ool.
5Chexb'ichanq sa' xk'ab'a' li Qaawa' ut chexwajb'aq chiru,
chete li b'e chiru li nachalk sa' choql.
A'an Qaawa' naxk'ab'a'in;
sahoqex rik'in.
6Toj sa' chaq li xloq'laj muheb'aal
li Yos a'an xyuwa'eb' li neb'a'yox,
a'an laj ilol reheb' li xmalka'an.
7Li Yos naxk'e xna'ajeb' li toq'ob'eb' ru,
narisiheb' li wankeb' sa' tz'alam ut naxk'e xsahilaleb' xch'ool;
a'ut eb' laj q'etol aatin te'kanab'aaq sa' chaqich'och'.
8At qaYos, naq xak'am chaq xb'e laatenamit chi elk Ejiipt
ut xatnume'k chaq sa' li chaqich'och',
9k'ajo' naq xhetheti rib' li ruuchich'och',
xha'lenk li choxa chiru li Yos,#68,9 Ex 19,18.
li xYosil li Sinaí, li xYos laj Israel!#68,8-9 Jue 5,4-5.
10At Qaawa', naab'al li hab' xataqla chaq,
xak'e xkawub' xch'ooleb' laatenamit li tawajenaqeb'.
11Chi jo'kan eb' laawalal xe'xtaw xna'ajeb', at qaYos,
sa' li ch'och' kawresinb'il xb'aan laawusilal
cho'q reheb' li neb'a' ut li ra wankeb'.
12Li Qaawa' xyehom li raatin;
ut naab'aleb' li ixq xe'yehok resil:
13“Eb' li awab'ej rochb'eeneb' laj puub'
yookatqeb' chi elelik!”, chankeb'.
Eb' li ixq sa' rochocheb' xe'ok chi xjek'inkil
li k'aru xmaq'mank chiruheb' li xik' neke'ilik reheb'.
14Naq toj yookex chi hilank sa' xna'ajeb' laj ilol ketomq,
xe'ok chi lemtz'unk eb' li xxik' li mukuy kama' li plaat;
chanchan chik oor xkanaak li rismaleb'.
15Naq li Qaawa' xcha'cha'iheb' li awab'ej,
xkub'e chaq li ratz'amke sa' xb'een li tzuul Salmón.
16Li tzuul Basán a'an q'axal najt xteram,
li tzuul Basán k'ajo' xnimal xteram!
17Ex ninqi tzuul, k'a'ut naq nekexsowenak
chirix li tzuul sik'b'il ru xb'aan li Yos cho'q xna'aj?
Relik chi yaal naq li Qaawa' taawanq aran chi junelik!
18Eb' li xb'eleb'aal ch'iich' li Yos numtajenaq xk'ihaleb',
ink'a' naru rajlankileb'.
Li Qaawa' toj Sinaí x'elk chaq
naq xulokaq sa' li xloq'laj ochoch.
19Xattaqe'k toj sa' laamuheb'aal najt xteram,
xak'ameb' chawix jo'k'ihaleb' li xaweechani.
Xak'uleb' winq cho'q aamaatan;#68,19 Ef 4,8.
a'atqeb' ajwi' laj q'etol chaq'rab'
xe'xq'axtesi rib' chawu, at Qaawa'.
20Usilaatinanb'il taxaq li Qaawa' wulaj wulaj!
A'an na'ilok qe, a'an li Yos aj kolol qe.
21Li qaYos a'an jun Yos aj kolonel,
a'an na'isink qe sa' ruq' li kamk.
22Ab'an li Yos tixputz'i xjolomeb' li xik' neke'ilok re,
li xjolomeb' li sa wankeb' sa' xmaa'usilaleb'.
23Xyehom li Qaawa':
“Tatinsutq'isi chaq sa' li na'ajej Basán,
tatwisi chaq sa' xchamal li palaw,
24re naq tatruhanq chi xb'ulb'al laawoq sa' li kik'
ut eb' laatz'i' te'xreq' xkik'eleb' li xik' neke'ilok aawe”.
25At Qaawa', at inYos, at Eechal we,
sa' laaloq'laj ochoch naqil eb' li poyanam
yookeb' chi ok re xnimankil aawu.
26Chi uub'ej neke'xik laj b'ichanel,
chi ixb'ej wankeb' li neke'wajb'ak;
sa' yiib'ej neke'b'eek eb' li tuq'ixq,
chi wankeb' xtzojtzoj tun sa' ruq'eb'.
27Cheloq'oni ru li Yos sa' leekomonil,
chek'ehaq xloq'al li Qaawa', ex ralal xk'ajol laj Israel!
28Li yookeb' chi xik chi uub'ej, a'aneb' laj Benjamín,
li xteepal laj Israel jwal kach'in;
yookeb' ajwi' chi xik li xjolomileb' laj Judá rochb'eeneb' li xtenamit,
ut eb' laj jolominel re Sabulón ut Neftalí.
29At inYos, chak'ut taxaq chiqu li xnimal aawankil,
a' laawankil li xak'utb'esi sa' qak'ab'a'
30toj sa' chaq laaloq'laj ochoch,
sa' xnajtil xteram Jerusalén,
b'arwi' eb' li awab'ej neke'xyeechi'i chawu li xmayejeb'.
31Chaq'us li josq' aj xul li wank sa' li na'ajej kaxlan'aj ru,#68,31 Mare a'an li hipopótamo malaj li ahin: cf. Ez 29,2s.
chaq'us li jun tuub'eb' chi toor ut saaj wakax
li neke'xrahob'tesi chixjunileb' li tenamit.
Che'xk'ehaq taxaq rib' rub'el laawankil,
ut che'xq'axtesi aawe chixjunil li xplaateb'.
Cha'cha'iheb' li poyanam li neke'yoob'ank raaxiik'.
32Toj Ejiipt che'chalq ta li ninqeb' xwankil,
ut eb' laj Etiopía che'xtaqsi li ruq'eb' toj rik'in li Yos.
33Chexb'ichanq cho'q re li Yos
chejunilex li x'awab'ejihom li ruuchich'och';
chexwajb'aq cho'q re li Qaawa':
34A'an nak'amok b'e sa' choql, sa' li najteril choxa.
Ab'ihomaq chanru naxjap chaq re chi kaw xyaab' xkux.
35Chek'e reetal li xnimal xwankil li Qaawa':
nalemtz'unk li xloq'al sa' xb'eeneb' laj Israel,
ut li xnimal xwankil nawulak toj sa' li choql.
36Q'axal nim xwankil li Yos toj sa' chaq li xloq'laj na'aj!
A'an li xYos laj Israel,
a'an li nak'ehok xwankil ut xkawilal li xtenamit.
Usilaatinanb'il taxaq li Qaawa'!
Currently Selected:
Sal 68: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
