Sal 66
66
SAALM 66 (65)
Xnimal b'anyoxink chiru li Yos
1Re li xjolomileb' laj b'ichanel. Saalm ut b'ich.
Cheyaab'a xk'ab'a' li Qaawa'
jo'k'ihalex li wankex sa' ruuchich'och';
2cheb'icha xloq'al li xk'ab'a',
chenimaaq ru rik'in sahil ch'oolej.
3Yehomaq re li Yos:
“Sachb'ach'oolej laab'aanuhom!
Sa' xk'ab'a' xnimal aawankil,
tule'wiq'laaq eb' li xik' neke'ilok aawe.
4Te'xloq'oni aawu chixjunil li ruuchich'och';
te'b'ichanq re xnimankil aawu,
te'b'ichanq chixjunileb' sa' laak'ab'a'”.
5Kimqex chi rilb'al li xb'aanuhom li Yos,
kimqex chi rilb'al li sachb'ach'oolej kixb'aanu cho'q qe.
6A'an kisutq'isink re li palaw chi kawil ch'och',#66,6 Ex 14,21; Sal 114,3.5.
ut ki'uxk nume'k chi oqej junpak'al li nima'.#66,6 Jos 3,14-17.
Chisaho'q sa' qach'ool sa' xk'ab'a' a'an!
7Na'awab'ejink chi junelik rik'in xnimal xwankil;
li rilob'aal wank sa' xb'eeneb' li tenamit
re naq eb' laj q'etol aatin ink'a' te'xq'etq'eti rib' chiwach.
8Chejunilex li tenamit, cheloq'oni ru li qaYos,
chenimaaq xloq'al chi yo'oon.
9A'an xk'ehok wi' chik qayu'am
ut ink'a' xkanab'eb' li qoq chi tichk'ok.
10At qaYos, laa'at xatyalok rix li qapaab'aal
ut xatz'il qix kama' naq nayale'k li plaat.
11Xoohaak'e chi t'ane'k sa' li ra'al,
k'ajo' raalal li iiq xak'e sa' xb'een qatel.
12Yalaq ani xakanab' chi numtaak sa' qab'een,
xoonumje'k sa' xam jo'wi' sa' ha';
ab'anan junpaat xoohaak'e sa' helhookil na'ajej.
13Tin'ok sa' laawochoch re mayejak,
tinpaab' chixjunil linyeechi'om aawe,
14jo'ch'inal jo'nimal li x'elk sa' xtz'uumal we,
a' li xinyeechi'i aawe naq wankin chaq sa' rahilal.
15Tinyeechi'i aawe naab'al li kames ch'oolaninb'ileb' chi us,
rochb'een xb'ook li k'atb'il karneer;
tinmayeja chawu eb' li b'ooyx ut li teelom chib'aat.
16Chejunilex laa'ex li nekexpaab'ank re li Yos,
kimqex chi ab'ink ut tinseeraq'i eere
jo'nimal kixb'aanu we li Qaawa'.
17Xinyaab'a xk'ab'a' ut xinnima xloq'al
rik'in xtz'uumal we ut ru'uj waq'.
18Wi ta wank li maa'usilal sa' li waanm,
ink'a' raj xinrab'i li Qaawa'.
19Ab'an li Yos xinrab'i ut xsume chaq lintij.
20Usilaatinanb'il taxaq li Yos,
xb'aan naq ink'a' xtz'eqtaana lintij
chi moko xkanab' xk'utb'al chiwu li xrahom.
Currently Selected:
Sal 66: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
