Sal 65
65
SAALM 65 (64)
Loq'laj tij re b'anyoxink
1Re li xjolomileb' laj b'ichanel. Xsaalm ut xb'ich laj David.
2At qaYos, aak'ulub' li loq'oniik arin Sión,
tento xk'eeb'al aawe li k'aru xqayeechi'i,
3xb'aan naq laa'at nakawab'i li qatij.
Chak'atq laa'at neke'jilok
chixjunileb' li xe'tawak sa' li maak.
4Us ta nanumtaak li maa'usilal sa' qab'een,
ab'an laa'at nakakuy, nakasach chixjunil.
5Us xaq re li sik'b'il ru aab'aan,
a' li nakak'am aawik'in re taawanq sa' laamuheb'aal.
Chisaho'q sa' qach'ool rik'in li saa'us wank sa' laajunkab'al,
rik'in li loq'laj eechej wank sa' laawochoch.
6At qaYos, aj Kololat qe,
laa'at nakasume li qatij rik'in sachb'ach'oolej.
Aawik'in k'ojk'ookeb' xch'ool li wankeb' sa' xmaril li ruuchich'och'
jo' ajwi' li wankeb' chire li palaw, toj chi najt.
7Laa'at nakatxaqab'ank reheb' li tzuul sa' xna'ajeb'
rik'in laametz'ew ut li xnimal laawankil;
8laa'at nakatch'anab'ank re xyaab' li palaw,
li xyaab' li xkawil oq li palaw
jo' ajwi' li poqoqij ib' neke'xb'aanu li tenamit.
9Eb' li wankeb' sa' xmaril li ruuchich'och'
k'ajo'eb' xxiw xb'aaneb' laasachb'ach'oolej;
neke'b'ichank rik'in sahil ch'oolej
jo'k'ihaleb' li wankeb' sa' releb'l ut rokeb'l li saq'e.
10Laa'at nokolaawil li ch'och' ut nakat'aqres:
k'ajo' naq nakak'e chi chaab'ilo'k!#65,10-14 Sal 104,10-16.
Li roq xnima' li Yos nujenaq chi ha' naq naxik,
laa'at nakakawresi li awimq.
Jo'ka'in naq nakakawresi:
11nakat'aqres li xna'aj li awimq,
nakamuri li t'ort'ookil ch'och',
nakaq'unob'resi rik'in li hab'
ut nakawosob'tesi chixjunil li natuxmek.
12Nakasahob'resi li chihab' rik'in laasimaatan;
laanums naxhoy li saa'us ut li chaab'il eechej.
13Naraxo' ru li pim sa' li chaqich'och',
neke'b'ichank li tzuul xb'aan sahil ch'oolej;
14eb' li na'ajej pach'aya' ru neke'xtiqib' rib' rik'ineb' li ketomq,
chiru li roq taq'a xiikil li awimq:
k'ajo' li sahil ch'oolej ut li b'ichank!
Currently Selected:
Sal 65: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
