Sal 63
63
SAALM 63 (62)
Xrahinkil wank rik'in li Yos
1Xsaalm laj David, naq wan chaq sa' li chaqich'och' re Judá.
2At Qaawa', laa'at linYos.
Chi anchal linch'ool nakatinsik';
taachaqiq we chasik'b'al.#63,2 Sal 42,2-3; 143,6.
K'ajo' naq nawaj wank aawik'in;
chanchanin li ch'och' li xchaqik ut naraj ru li ha'.
3K'ajo' naq xatinka'ya sa' laamuheb'aal
naq xwil laawankil ut laaloq'al!
4Laarahom, a'an q'axal loq' cho'q we chiru li yu'amej,
ut ninnima aawu rik'in xtz'uumal we.
5Chiru chixjunil linyu'am tatinloq'on
ut tinterq'usi li wuq' re xk'eeb'al aaloq'al.
6Taak'ojlaaq li waanm jo' junaq li xtzekank chi chaab'il.
Chi sa sa' inch'ool
tinterq'usi laak'ab'a' rik'in xtz'uumal we.
7Chiru li q'oqyink sa' linwarib'
nakatjultiko'k we ut ninyo'lek chak'oxlankil:
8laa'at laj tenq'ahom we.
K'ajo' naq ninsaho'k chi wank rub'el laakupuhom;#63,8 Sal 17,8; 91,4.
9li waanm naxjunaji rib' aawik'in
ut laanim uq' nakuutunk we.
10A'ut eb' li te'ajoq inkamsinkil,
che'nuq'e'q ta xb'aan xchamal li ch'och';
11che'kamsiiq ta rik'in ch'iich'
re naq te'kanaaq cho'q xtib'eb' laj xojb'!
12Ab'an li awab'ej taasaho'q xch'ool rik'in li Yos;
k'ajo'aq xsahilaleb' xch'ool li neke'b'aanunk jurament sa' xk'ab'a' A'an.
A'ut taatz'ape'q xsa' reheb' li neke'yehok tik'ti'.
Currently Selected:
Sal 63: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
