Sal 107
107
SAALM 107 (106)
Xyoxinkil li xnimal xrahom li Yos
1Chexyoxinq chiru li Qaawa' xb'aan naq chaab'il,
li xrahom wank chi junelik!#107,1 1 Kr 16,34; 2 Kr 5,13; 7,3; Esd 3,11; Sal 100,5; 106,1; 118,1; 136,1-26; Jr 33,11.
2Xyehaqeb' a'in li kolb'ileb' xb'aan li Qaawa',
eb' li ke'isiik sa' ruq' li xik' neke'ilok reheb',
3eb' li ke'ch'utub'aak sa' xyanqeb' li tenamit,
chalen sa' releb'l ut toj sa' rokeb'l li saq'e,
chalen sa' releb'l ut toj sa' rokeb'l li iq'.
4Ke'xb'eeni rib' sa' li chaqich'och', sa' junesal na'ajej,
chi ink'a' neke'xtaw xb'ehil junaq tenamit te'wanq wi'.
5Te'tz'okaje'q ut te'chaqiqatq reheb',
ka'aj chik maa neke'kamk.
6Ab'an sa' xyot'ikeb' xch'ool ke'xpatz' xk'ab'a' li Qaawa',
ut ke'kole'k chiru li xch'a'ajkilaleb'.
7Kixb'eresiheb' sa' li tiikil b'e
toj reetal ke'wulak sa' li tenamit te'wanq wi'.
8Chexyoxinq chiru li Qaawa' xb'aan naq aj rahonel,
rik'inatq li sachb'ach'oolej kixb'aanu cho'q reheb' chixjunil!
9Xb'aan naq kixk'ojob' xch'ool li taachaqiq re,
ut li jwal taatz'okaaq kixk'e xtzekemq chi yo'oon.
10Ke'wank chaq sa' li aak'ab' ut sa' li q'oqyink,
chapchookeb' rik'in kareen ut rik'in ch'iich',
11xb'aan naq ke'xq'et raatin li Qaawa'
ut ke'xtz'eqtaana li xk'uub'ahom li Nimajwal Yos.
12Jo'kan naq kixk'eheb' chi lub'tasiik xch'ooleb' rik'in kawil k'anjel,
ut ke'oso'je'k chi maajun naruhank chi xtenq'ankileb'.
13Ab'an sa' xyot'ikeb' xch'ool ke'xpatz' xk'ab'a' li Qaawa',
ut ke'kole'k chiru li xch'a'ajkilaleb':
14kirisiheb' sa' li aak'ab' ut sa' li q'oqyink,
ut kixt'upi li kareen b'ak'b'ookeb' wi'.
15Chexyoxinq chiru li Qaawa' xb'aan naq aj rahonel,
rik'inatq li sachb'ach'oolej kixb'aanu cho'q reheb' chixjunil!
16Kixtoqi li q'anch'iich' chapchookeb' wi' li okeb'aal,
ut kixmuri chixjunil li tz'aptz'o wi' li tz'alam.
17Q'axal ke'yajerk xb'aan xmaa'usilaleb',
numtajenaq xtoq'ob'aal ruheb' xb'aan li xmaakeb'.
18Neke'yib'o'k xch'ool xb'aan li tzekemq,
kach'in chik maa ke'kanaak rub'el xwankil li kamk.
19Ab'an sa' xyot'ikeb' xch'ool ke'xpatz' xk'ab'a' li Qaawa',
ut ke'kole'k chiru li xch'a'ajkilaleb'.
20Kixtaqla chaq li raatin ut kixk'irtasiheb',
kirisiheb' sa' xjulel li kamk.
21Chexyoxinq chiru li Qaawa' xb'aan naq aj rahonel,
rik'inatq li sachb'ach'oolej kixb'aanu cho'q reheb' chixjunil!
22Chexmayejaq ut chexyoxinq,
yehomaq resil li xninqal xb'aanuhom chi sa sa' eech'ool!
23Ke'ok sa' li jukub' ut ke'xchap xb'e sa' li palaw,
ut ke'xk'am xk'ay re yakok sa'atqeb' li k'iila ha'.
24Ke'ril li xninqal xb'aanuhom li Qaawa',
chixjunileb' li sachb'ach'oolej kixb'aanu sa' xb'een li palaw.
25Ki'aatinak, ut kichalk jun kawil iq'
li kixwaklesi li xkaw oq li palaw.
26Neke'taqen toj sa' choxa,
neke'kub'en toj sa' xchamal li ha';
k'ajo'eb' xxiw, ka'aj chik maa neke'oso'k!
27Neke'xb'alq'usihatq rib',
neke'taktotk kama' wi' te'kalaaq,
ut maak'a' na'ok wi' li xseeb'al xch'ooleb'.
28Ab'an sa' xyot'ikeb' xch'ool ke'xpatz' xk'ab'a' li Qaawa',
ut ke'kole'k chiru li xch'a'ajkilaleb'.
29Ch'anch'o kixkanab' li kaqsut-iq',
ch'anaamil ajwi' li xkaw oq li palaw.
30Naq ke'ril a'an, q'axal ke'saho'k sa' xch'ool,
ut li Yos kixk'ameb' sa' li hilob'aal jukub' sik'b'il xb'aaneb'.
31Chexyoxinq chiru li Qaawa' xb'aan naq aj rahonel,
rik'inatq li sachb'ach'oolej kixb'aanu cho'q reheb' chixjunil.
32Chenima xk'ab'a' naq ch'utch'uuqeb' li tenamit,
chek'ehaq xloq'al naq te'xch'utub' rib'eb' li cheekel winq.
33A'an nasutq'isink reheb' li nima' cho'q chaqich'och'
ut naxk'e chi chaqik eb' li yu'amha'.
34Naxkanab' li chaab'il ch'och' cho'q pek atz'am,
xb'aan li xmaa'usilaleb' xch'ool li winq wankeb' aran.
35Naxsutq'isi li chaqich'och' cho'q kaq'nab',
ut li joxk' nakanaak chi yu'amha'.#107,33-35 Dt 29,23; Is 43,19; 40,3; Eklo 39,22-23.
36Aran naxk'eheb' chi wank li te'tz'okaaq,
ut eb' a'in ke'xwaklesi xninqal tenamit.
37Ke'awk sa'atqeb' li k'aleb'aal, ke'raw li uub';
ut naab'al li ru li awimq ke'xxok chaq.
38Li Qaawa' kirosob'tesiheb' ut q'axal ke'k'ihank;
ink'a' kixk'e chi lajk eb' li xketomq.
39Chirix chik a'an ink'a' chik k'i ke'kanaak ut lub'luukeb' aj chik;
naab'al li rahilal ut ch'a'ajkilal ke'xk'ul chaq.
40Ab'an li Yos kik'ehok majewank sa' xb'eeneb' li xninqal ru winq
ut kixyoolesiheb' chi xb'eeninkileb' rib'
sa' chaqich'och' b'arwi' maak'a' li b'e.#107,40 Job 12,24.
41Li Qaawa' narisiheb' li neb'a' sa' xrahilaleb'
ut naxk'ihob'resi li xjunkab'aleb'
jo' neke'k'ihank li ketomq.
42K'ajo' naq neke'saho'k li tiikeb' xch'ool chi rilb'al a'an;
a'ut li ink'a' useb' xna'leb' maak'a' chik neke'xye.
43Wi wank junaq li wank xna'leb',
chixk'uulahaq sa' xch'ool chixjunil a'in
ut chixtawaq ru li xnimal xrahom li Qaawa'!
Currently Selected:
Sal 107: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
