Sal 105
105
SAALM 105 (104)
Li xninqal xb'aanuhom li Yos rik'ineb' laj Israel
(1 Kr 16,7-22)
1Chexyoxinq chiru li Qaawa', cheyaab'a li xk'ab'a';
chepuktesi resil li xninqal xb'aanuhom reheb' li tenamit.
2Chexb'ichanq, chexwajb'aq cho'q re a'an;
cheye resil chixjunileb' li sachb'ach'oolej kilajxb'aanu.
3Chenimaaq eeru rik'in li xk'ab'a',
che'saho'q sa' xch'ool jo'k'ihaleb' li neke'sik'ok re li Qaawa'.
4Sik'omaq li Qaawa' ut li xwankilal;
sik'omaq li xnaq' ru chi junelik.
5Jultikaq eere li sachb'ach'oolej kilajxb'aanu,
li xninqal eetalil ut li xloq'laj aatin,
6ex riyajil laj Abrahán aj k'anjel chiru,
ex ralal xk'ajol laj Jakob li sik'b'il ru xb'aan.
7Li Qaawa' a'an li qaYos
ut na'awab'ejink sa' xb'een chixjunil li ruuchich'och'.
8Junelik wank sa' xch'ool li xloq'laj Sumwank
ut li xyeechi'om kixb'aanu reheb' li k'iila teep chi riyajil li tenamit,
9naq kixk'e rib' sa' aatin rik'in laj Abrahán#105,9 Gn 12,7; 17,8.
ut ki'aatinak sa' jurament rik'in laj Isahak.#105,9 Gn 26,3.
10A'an ajwi' kik'ehe'k jo' chaq'rab' re laj Jakob,
kixaqab'aak jo' junelik Sumwank cho'q re laj Israel,
11naq kixye: “Tink'e aawe li tenamit Kanahán,
ut tinsi aawe cho'q aaweechanihom”,#105,10-11 Gn 28,13. chan.
12Us ta ink'a' k'iheb' chaq,
us ta ab'l aj tenamiteb' ut yal aj numeleb' sa' li na'ajej a'an,
13us ta yookeb' chi xb'eeninkil rib' yalaq b'ar
ut jalan jalanq li na'ajej kilaje'nume'k wi',
14ab'an li Yos maa'ani kixkanab' chi rahob'tesink reheb',
ut kixjultika reheb' li awab'ej:
15“Meech'e' li sik'b'ileb' ru inb'aan,
mik'a' eeb'aanu reheb' linpropeet”,#105,14-15 Gn 20,3-7. chan.
16Li Yos kixtaqla li we'ej sa' li tenamit a'an,
ut chixjunileb' ke'kanaak chi maak'a' chik xwaheb'.#105,16 Gn 41,53-57.
17Ab'an kixtaqla jun li winq aj k'amol b'e chiruheb',
a' laj José li kik'ayimank cho'q aj mun.#105,17 Gn 37,28; 45,5.
18Ke'xnat' li roq chi ch'iich'
ut ke'xb'ak' li xkux rik'in kareen,
19toj reetal koxtz'aqloq ru li xyehom.
Li raatin li Qaawa' kixk'ut naq tiik xch'ool laj José.#105,18-19 Gn 39,20-40,23.
20Toja' naq li awab'ej kixye naq chi'ach'ab'aaq,
li nim xwankil sa' xb'eeneb' li tenamit kirisi laj José sa' tz'alam.#105,20 Gn 41,14.
21Ut kixxaqab' cho'q aj jolominel re li rochoch,
kixk'e xwankil sa' xb'een chixjunil li xjunkab'lal,#105,21 Gn 41,39-41.
22re naq tixtijeb' li xninqaleb' ru winq
ut tixtzoleb' li xcheekelaleb' li xtenamit.
23Toja' naq laj Israel ki'ok Ejiipt,#105,23 Gn 46,6; 47,11.
laj Jakob kiwank sa' xch'och'el laj Kam.
24Li Yos q'axal kixk'e chi k'ihank li xtenamit
chi numtajenaq kaweb' rib' chiruheb' li xik' neke'ilok reheb'.
25Kixpo' xch'ooleb' laj Ejiipt re naq xik' chik te'ril li xtenamit
ut te'xra'aleheb' li sik'b'ileb' ru xb'aan.#105,24-25 Ex 1,7-14.
26Chirix chik a'an kixtaqla laj Moisés, laj k'anjel chiru,
jo'wi' laj Aharón, li sik'b'il ru xb'aan.#105,26 Ex 3,1-4,17.
27Eb' a'in naab'al sachb'ach'oolej ke'xb'aanu sa' xyanqeb' laj Ejiipt,
naab'al xninqal eetalil ke'wank aran sa' xch'och'el laj Kam.
28Kixtaqla li aak'ab', ut kiwank li aak'ab';#105,28 Ex 10,21-23.
a'ut eb' a'an ke'xq'etq'eti rib' chiru li raatin.
29Kixsutq'isi chixjunil li ha' cho'q kik'
ut kixk'e chi kamk chixjunileb' li kar.#105,29 Ex 7,17-21.
30Kinujak chi amoch li xtenamiteb',
toj sa'atqeb' li xwarib'aal li awab'ej.#105,30 Ex 8,1-6.
31Ki'aatinak, ut ke'chalje'k li raxyaat;
kinujak chi suq chixjunil li na'ajej.#105,31 Ex 8,16-24.
32Kixk'e li saqb'ach cho'q reeqaj li hab',
ut kixtaqla raq'xam sa' li xtenamiteb'.
33Kixsach li uub' ut li iig,
ut kixtoqi chixjunileb' li che' sa' li na'ajej a'an.#105,32-33 Ex 9,22-25.
34Ki'aatinak, ut ke'chalje'k laj saak' ut eb' laj raxq'een
chi ink'a' naru rajlankileb':
35kilaje'xwa' li raxpim sa' li xtenamiteb'
ut ke'xchoy chixjunil li awimq sa' li xna'ajeb'.#105,34-35 Ex 10,12-15.
36Ut kixk'e chi kamk chixjunileb' li xb'een alalb'ej,
eb' li q'axal kaweb' rib' sa' xyanqeb' laj Ejiipt.#105,36 Ex 12,29.
37A'ut li xtenamit li Yos ki'isiik chi naab'al x'oor ut xplaateb',
chi maajun kikanaak chi ixb'ej.
38Q'axal ke'saho'k xch'ool laj Ejiipt sa' relikeb',
xb'aan naq numtajenaq nim li xxiweb'.#105,37-38 Ex 12,33-36.
39Li Qaawa' kixhel jun li choql chi xmuheleb',
ut rik'in jun li xam kixkutanob'resiheb' chiru q'oqyink.#105,39 Ex 13,21-22.
40Ke'xtz'aama xtzekemqeb',
ut kixtaqla chaq eb' laj tonq';
kixk'ojob'eb' xch'ool rik'in choxahil wa.#105,40 Ex 16,2-15.
41Kixjor li saqoonak, ut ki'elk chaq ha':
kama' jun nima' kib'eek roq sa' li chaqich'och'.#105,41 Ex 17,1-7; Nm 20,2-13.
42Li Yos junelik wank sa' xch'ool li xloq'laj aatin
li kixye re laj Abrahán, laj k'anjel chiru.
43Jo'ka'in kirisi li xtenamit chi saheb' sa' xch'ool;
k'ajo'eb' chi b'ichank li sik'b'ileb' ru xb'aan.
44Ut kixk'e reheb' li xch'och'eb' li poyanam:#105,44 Jos 11,16-23.
ke'reechani li ru xk'anjeleb' li jalaneb' xtenamit,
45re naq wanq sa' xch'ooleb' li xtaqlahom li Qaawa'
ut junelik te'xpaab' li xloq'laj chaq'rab'.
Aleluya!
Currently Selected:
Sal 105: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
