Sal 104
104
SAALM 104 (103)
Li xnimal xloq'al li xyoob'tesihom li Yos
1Tinnima ru li Qaawa' chi anchal linch'ool!
At inYos, at inNa' at inYuwa',
numtajenaq laawankil!
Tiqib'anb'ilat rik'in laaloq'al
2ut sutsuukat xb'aan li kutan saqenk.#104,2 1 Ti 6,16.
Kahel li choxa kama' nahelmank junaq t'ikr,
3ut kayiib' laamuheb'aal sa' xb'eeneb' li ha'.
Kak'eheb' li choql cho'q aab'eleb'aal ch'iich',
ut nakatb'eek sa' xb'een xxik'eb' li iq'.#104,2-3 Gn 1,3; 2 S 22,11-12; Sal 18,11-12; 68,34.
4Nakak'eheb' li iq' cho'q aataql laa'at
ut li raq'xam cho'q aj k'anjel chawu.#104,4 Heb 1,7.
5Kak'ojob' li ruuchich'och' sa' xb'een li rub'elankil,
re naq ink'a' taa'eek'anq chi junajwa.
6Kab'at li ruuchich'och' rik'in li palaw
chi toj wankeb' chaq li ha' sa' xb'eeneb' li tzuul.
7Ab'an kaq'useb' li ha', ut ke'ok chi elelik;
jun xikikeb' naq ke'rab'i xyaab' laakaaq.
8Ke'taqenkub'en sa'eb' li tzuultaq'a
toj reetal ke'wulak sa' li na'ajej kawresinb'il aab'aan.
9Aran karaq reetalil b'arwi' naru te'wanq,
re naq ink'a' chik taab'ut'irq li ruuchich'och'.#104,6-9 Gn 1,9; Job 38,8-11; Pr 8,29; Jr 5,22.
10Sa' aak'ab'a' laa'at neke'b'ululnak li yu'amha' sa'eb' li taq'a,
ut neke'numje'k sa' xyanqeb' li ninqi tzuul!#104,10-16 Sal 65,10-14.
11Aran neke'uk'ak chixjunileb' li xul re li k'iche';
neke'xk'ojob' xch'ool eb' li b'uur naq nachaqik reheb'.
12Chi xk'atqeb' neke'sukub'k li kok' xul li neke'rupupik chiru choxa,
ut sa' xyanqeb' li ruq' che' na'ab'imank xyaab' xkuxeb' naq neke'b'ichank.
13Chalen toj taqe'q sa' laamuheb'aal nakat'aqresiheb' li tzuul,
ut rik'in li naruuchin laak'anjel nanujak li ruuchich'och'.
14Nakak'e chi moqk li pach'aya' cho'q xwaheb' li ketomq,
ut neke'yo'laak li che' li neke'k'anjelak re li winq,
re naq tixtaw sa' li ch'och' li xwa ruk'a':
15li b'iin li nasaho'k wi' xch'ool,
li aseeyt re naq taalemtz'unq li xnaq' ru
ut li wa li nak'ehok kawilal.
16Neke'lanb'ak li xche'k'aam li Qaawa',
jo'wi' eb' li yaw awb'ileb' xb'aan, aran Líbano.
17Aran neke'sukub'k eb' li xik'anel xul;
toj sa' ruq'eb' li chaj nakab'lak li nimla jotz.
18Eb' li yuk neke'wank sa' xyanqeb' li ninqi tzuul
ut eb' li imul neke'xtaw xsokeb' sa'eb' li pek.
19Kayiib' li po re xb'eresinkileb' li honal,
ut li saq'e li ak naxnaw jo'q'e taa'ok.#104,19 Gn 1,14-18.
20Nakataqla chaq li aak'ab', ut naq'oqyino'k:
neke'elk chi b'eek chixjunileb' li xul sa' li k'iche'.
21Eb' li kok' kaqkoj neke'xjap re chi xsik'b'al li xtzak,
ut neke'xtz'aama xtzekemqeb' chiru li Yos.
22Naq na'elk chaq li saq'e, neke'sutq'iik chi wark
ut neke'xtunub' rib' sa' li xsokeb'.
23Toja' naq naxik li winq sa' li xk'anjel
ut naxtawasi rib' toj na'ewuuk.
24K'ajo' xk'ihal laab'aanuhom, at Qaawa'!
Xab'aanu chixjunil rik'in xnimal aana'leb';
nujenaq li ruuchich'och' rik'in chixjunil laayoob'tesihom!
25Aran wank li palaw q'axal nim ru ut helho;
chisa' neke'b'ululnak eb' li k'iila xul:
k'ajo' xk'ihaleb' li kok' jo'wi' eb' li ninq:
26Chiru a'an neke'b'eek li jukub',
jo'wi' li Mama' Xul li xayiib' re taab'atz'unq chisa'.#104,26 Sa' xch'ooleb' laj Israel naq sa' xchamal li palaw wank jun mama' xul. Cf. Job 3,8; 41,1; Sal 74,14; 89,11; Is 27,1.
27Chixjunileb' wankeb' royb'enihom aawik'in:
neke'royb'eni naq taak'e xtzekemqeb' sa' xq'ehil.
28Laa'at nakak'e reheb', ut eb' a'an neke'xk'ul;
nakate laawuq', ut neke'k'ojlaak xch'ool.
29Wi taamuq laawilob'aal chiruheb',
q'axal te'xiwaq;
wi taamaq' xmusiq'eb',
te'kamq ut te'sutq'iiq wi' chik chi pojtz'il.
30Ab'an naq nakataqla chaq laamusiq',
nakayoob'tesiheb',
ut naka'ak'ob'resi xb'een li ruuchich'och'.#104,29-30 Gn 2,7; Job 34,14-15.
31Junelik taxaq loq'oninb'ilaq xk'ab'a' li Qaawa'!
Chisaho'q xch'ool li Qaawa' rik'in li xb'aanuhom!
32Naq naril li ruuchich'och',
k'ajo' naq nahich'len!
Ka'ajwi' naxtoch'eb' li tzuul,
ut nab'utz'utz'nak xsib'el.
33Tinb'icha xloq'al li Qaawa' chiru linyu'am,
tinnima xk'ab'a' linYos jo' najtil tinwanq sa' ruuchich'och'.#104,33 Sal 146,2.
34Chiwulaq taxaq chiru li waatin,
xb'aan naq li xsahil linch'ool nachalk rik'in li Qaawa'!
35Che'oso'q ta eb' laj maak sa' ruuchich'och',
ut ink'a' chik che'wanq li ink'a' useb' xna'leb'.
Tinnima ru li Qaawa' chi anchal linch'ool!
Currently Selected:
Sal 104: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
