Sal 103
103
SAALM 103 (102)
Li xrahom li Yos
1Xsaalm laj David.
Tinnima ru li Qaawa' chi anchal linch'ool,
toj sa' xchamal li waanm tinnima li xloq'laj k'ab'a'.
2Tinnima ru li Qaawa' chi anchal linch'ool,
ut ink'a' taasachq sa' li waanm chixjunil li rusilal.
3A'an nakuyuk re chixjunil linmaak
ut naxk'irtasi chixjunil linyajel;
4narisi linyu'am sa' ruq' li kamk
ut naxhoy sa' inb'een li rusilal ut ruxtaanal.
5Naxk'ojob' linch'ool rik'in chaab'il eechej
ut narak'ob'resi linsaajilal jo' junaq t'iw.
6Li Qaawa' naraqok aatin sa' tiikilal
ut naxtenq'aheb' chixjunil li rahob'tesinb'ileb'.#103,6 Sal 146,7.
7Kixk'ut li xb'e ut li xninqal ru xb'aanuhom
chiru laj Moisés ut chiruheb' li ralal xk'ajol laj Israel.
8Li Qaawa' a'an chaab'il ut aj uxtaan,
riil najosq'o'k ut numtajenaq xrahom.#103,8 Sal 145,8; Eklo 2,11; Stg 5,11.
9Ink'a' nokooxq'us chi junelik,
chi moko najosq'o'k chi junajwa.
10Ink'a' naxb'aanu qe jo' qak'ulub' xb'aan li qamaak,
chi moko nokooxq'ajkamu jo' chanru li qab'aanuhom.
11Kama' xteram li choxa taqenaq sa' xb'een li ruuchich'och',
jo'kan ajwi' li xnimal xrahom sa' xb'eeneb' li neke'paab'ank re.
12Jo' xnajtil li na'ajej na'elk wi' chaq li saq'e
rik'in li na'ajej na'ok wi',
jo'kan ajwi' li Qaawa' naxnajtob'resi qik'in li qamaak.
13Jo' junaq yuwa'b'ej naxraheb' li ralal xk'ajol,
jo'kan ajwi' li Qaawa' naxtoq'ob'a ruheb' li neke'paab'ank re.
14Xb'aan naq naxnaw k'aru okenaqo wi'
ut wank sa' xch'ool naq yal pojtz' okenaqo.
15Li xyu'am li winq kama' li pim;
na'atz'umak kama' junaq uutz'u'uj chiru li tzuultaq'a;
16ab'an nanume'k li iq' sa' xb'een, ut na'oso'k;
ink'a' chik nanawmank b'ar kiwank.
17A'ut li xrahom li Qaawa' wank chi junelik,
xaqxo sa' xb'eeneb' chixjunileb' li neke'paab'ank re.
Li xtiikilal xch'ool nahoye'k sa' xb'eeneb' li ralal xk'ajoleb',#103,15-17 Is 40,6-8.
18cho'q reheb' li neke'paab'ank re li xsumwank,
eb' li wank sa' xch'ooleb' xpaab'ankil li xchaq'rab'.
19Li Qaawa' kixk'ojob' li xk'ojarib'aal sa' choxa,
ut na'awab'ejink sa' xb'een chixjunil li choxach'och'.
20Chenima ru li Qaawa' chejunilex li x'ánjel,
laa'ex li kaw eerib' chi xpaab'ankil li rajom
ut yo'oon wankex chi xk'anjelankil li raatin.
21Chenima ru li Qaawa' chejunilex laj k'anjel chiru,
laa'ex li nekepaab' li xtaqlahom.
22Chenima ru li Qaawa' chejunilex li xb'aanuhom,
sa' chixjunil li na'ajej li wankeb' rub'el xwankil.#103,22 Sal 148.
Tinnima ru li Qaawa' chi anchal linch'ool!
Currently Selected:
Sal 103: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
