Sal 102
102
SAALM 102 (101)
Tijok sa' li rahilal
1Xtij jun li winq wank sa' rahilal, li k'ajo' nayaab'ak chiru li Qaawa' xb'aan xrahil xch'ool.
2At Qaawa', chawab'i taxaq lintij,
chiwulaq taxaq aawik'in li xyaab' inkux;
3maamuq laawilob'aal chiwu
sa' xkutankil linrahilal.
Chinaawab'i taxaq naq ninpatz' laak'ab'a',
ut chinaasume chaq chi junpaat.
4Xb'aan naq linyu'am yo chi oso'k kama' li sib',
ut linb'aqel naxamnak jo' li ru xam naq naweek'a.
5Li waanm teninb'il aj chik,
nachaqik kama' li pim;
ut nasachk ajwi' sa' inch'ool xwa'b'al linwa.
6Nintz'uyink ut nin'ayaynak chi junelik,
ut li xtz'uumal we naxletzi rib' chiru linb'aqel.
7Chanchanin aj chik li warom sa' li chaqich'och',
chanchanin li tanwuj sa' xyanq li po'lem.
8Ink'a' ninwark ut nintz'uynak,
chanchanin li junaatalil xul sa' xb'een li kab'l.
9Eb' li xik' neke'ilok we yookeb' chinhob'b'al chixjunil li kutan;
ut eb' li nikine'roxloq'i chaq junxil,
a' chik inmaa'usilankil yookeb' anaqwan.
10Cha ninwa' ruuchil linwa,
ut li wuk'a' naxyu' rib' rik'in li xya'al wu
11xb'aan laajosq'il ut li xmay laach'ool:
xinaawaklesi ut xinaat'an chiru ch'och'.
12Yo chi oso'k linyu'am
chanchan naq na'ewuuk chi junpaat li kutan;#102,12 Job 8,9; 14,2; Sal 39,6-7; 109,23.
yookin chi chaqik kama' li pim.
13A'ut laa'at, at Qaawa', nakat-awab'ejink chi junelik;
maajoq'e taakanab'aaq xpatz'b'al laak'ab'a'.
14Waklin, at Qaawa', ut chawuxtaana ru li tenamit Sión.
Ak xtaw xq'ehil xtoq'ob'ankil ru:
anaqwan tz'aqal li xhonalil!
15Eb' laj k'anjel chawu k'ajo' naq neke'xra eb' li pek kab'lanb'il wi',
ut neke'raho'k sa' xch'ool chi rilb'al li xpo'lemil laatenamit.
16Eb' li poyanam q'axal te'roxloq'i li xk'ab'a' li Qaawa';
te'siksotq xb'aan laaloq'al
chixjunileb' li awab'ej sa' ruuchich'och'.
17Naq li Qaawa' tixwaklesi wi' chik li tenamit Sión
ut tixk'ut rib' sa' xnimal xloq'al,
18tixsumeheb' li xtij li wankeb' sa' rahilal
ut ink'a' tixtz'ap xxik chi rab'inkil li xtz'aamahomeb'.
19Taatz'iib'amanq a'in cho'q reheb' li kutan chaalel,
ut jun tenamit ak'ob'resinb'il xyu'am
tixloq'oni ru li Qaawa'.
20Naq li Qaawa' x'ilok chaq toj sa' li xloq'laj tzuul,
toj sa' choxa xk'utzub' chaq rib' rilb'al li ruuchich'och',
21re rab'inkil xq'oqeb' li wankeb' chi preexil,
ut xkolb'aleb' li teneb'anb'il kamk sa' xb'eeneb'.
22Toja' naq taapuktesimanq resil li xchaab'ilal li Qaawa' arin Sión
ut taajultikamanq li xnimal xloq'al sa' li tenamit Jerusalén,
23naq te'xjunaji rib' chixjunileb' li tenamit
ut eb' li awab'ej te'k'anjelaq chiru li Yos.
24Li Qaawa' xrisi linmetz'ew,
xk'os roq linyu'am sa' xyiitoq linb'e.
25Jo'kan naq xinye: “At inYos,
maamaq' linyu'am naq toj maji' nintixk;
laa'at wankat chi junelik q'e kutan”.
26Chalen chaq junxil laa'at katk'ojob'ank re li ruuchich'och'
ut katyiib'ank re li choxa rik'in laawuq'.
27Eb' a'in te'oso'q, a'ut laa'at wankat chi junelik;
chanchaneb' junaq t'ikr naq te'oso'q:
laa'at tatjaloq reheb' jo' najale'k junaq aq'ej.
28A'ut laa'at a'anat ajwi' chi junelik:
relik chi yaal naq malaajel ma'oso'jel laayu'am.#102,26-28 Heb 1,10-12.
29Eb' li ralal xk'ajoleb' laj k'anjel chawu toxwanq rochocheb',
ut eb' li ri xmam te'wanq chawu chi junelik.
Currently Selected:
Sal 102: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
