Nm 3
3
Li xk'anjeleb' laj Leví
1A'aneb' a'in li ralal xk'ajol laj Aharón ut laj Moisés, sa'eb' li kutan naq li Qaawa' kiraatina laj Moisés sa' li tzuul Sinaí. 2A'aneb' a'in li xk'ab'a'eb' li ralal xk'ajol laj Aharón: laj Nadab, li xb'een al; laj Abihú, laj Elehasar ut laj Itamar.#3,2 Nm 26,60. 3A'an a'in li xk'ab'a'eb' li ralal xk'ajol laj Aharón li sik'b'ileb' ru ut xaqab'anb'ileb' chi k'anjelak cho'q aj tij. 4Laj Nadab ut laj Abihú ke'kamk chiru li Qaawa' naq ke'xmayeja li xam#3,4 Lv 10,1-2; Nm 26,61. li ink'a' xk'ulub' li Qaawa', sa' li chaqich'och'. Eb' a'an maak'a' ralaleb'; jo'kan naq laj Elehasar ut laj Itamar ke'kanaak cho'q aj tij chiru li xyu'am laj Aharón, li xyuwa'eb'.
5Li Qaawa' kiraatina laj Moisés ut kixye re:
6“Taqla xb'oqb'aleb' li xteepal laj Leví, re naq te'xtenq'a laj Aharón. 7Te'xtenq'a laj Aharón ut te'xb'aanu li tento sa' xb'een chixjunil li komonil chiru li Loq'laj Muheb'aal, rik'in k'anjelak sa' li Loq'laj Na'ajej. 8Eb' a'an te'iloq re li k'a'aq re ru nak'anjelak sa' li Loq'laj Muheb'aal ut te'xb'aanu ajwi' li tento sa' xb'eeneb' laj Israel sa' li Loq'laj Muheb'aal. 9Taaq'axtesiheb' laj Leví re laj Aharón jo' ajwi' reheb' li ralal xk'ajol cho'q xmaataneb': siib'ilaqeb' sa' xk'ab'a'eb' chixjunil laj Israel. 10Laj Aharón ut eb' li ralal xk'ajol taaxaqab'eb' chi k'anjelak cho'q aj tij. Wi junaq li maawa' aj tij taanach'oq aran, taakamsiiq”, chan li Qaawa'.
11Li Qaawa' kixye ajwi' re laj Moisés:
12“K'e reetal naq xinsik' ruheb' laj Leví sa' xyanqeb' laj Israel, ruuchileb' chixjunileb' li xb'een ralaleb' laj Israel. Wehaqeb' laj Leví, 13xb'aan naq weheb' chixjunil li xb'een alalb'ej. Sa' li kutan naq kinrahob'tesi chixjunileb' li xb'een ralaleb' laj Ejiipt, kinraheb' cho'q we chixjunileb' li xb'een ralaleb' laj Israel, jo'eb' li winq, jo'kan ajwi' eb' li xb'een ral li ketomq.#3,13 Ex 13,2.11-16. Weheb' laa'in. Laa'in li Qaawa'”.
14Li Qaawa' kiraatina laj Moisés sa' li chaqich'och' re Sinaí ut kixye re: 15“Ajlaheb' li ralal xk'ajol laj Leví chi junqkab'alil ut chi teep; taawajlaheb' chixjunileb' li teelom chalen aj junq po”, chan. 16Ut laj Moisés kirajlaheb' laj Leví, jo' kiyehe'k re xb'aan li Qaawa'.
17Li xk'ab'a'eb' li ralal laj Leví a'aneb' a'in: laj Kersón, laj Kehat ut laj Merarí.
18Li xk'ab'a'eb' li ralal laj Kersón sa' li xjunkab'al a'aneb' a'in: laj Libní, ut laj Semehí.
19Eb' li ralal laj Kehat sa' li xjunkab'al a'aneb' a'in li xk'ab'a'eb': laj Amrán, laj Isar, laj Hebrón ut laj Usiel.
20Li xk'ab'a'eb' li ralal laj Merarí sa' li xjunkab'al a'aneb' a'in: laj Majlí ut laj Musí.
A'aneb' a'in li xch'uuteb' laj Leví chi junqkab'alil.
21Laj Kersón a'an chaq li xxe'toonil yuwa'eb' laj Libní ut eb' laj Semehí. A'aneb' a'in li xch'uuteb' laj Kersón. 22Li rajlankil chixjunileb' li teelom chalen aj junq po, a'an wuqub' mil rik'in o'k'aal xkab' o'q'ob' (7,500). 23Li xch'uuteb' laj Kersón neke'xyiib' li xmuheb'aaleb' chirix li Loq'laj Muheb'aal, sa' xjayal rokeb'l saq'e. 24Li xjolomil li xjunkab'al laj Kersón a'an laj Eliasaf, ralal laj Lael. 25Eb' li ralal xk'ajol laj Kersón a'aneb' li te'iloq re li Loq'laj Muheb'aal, li xmuheel ut li t'ilkem li natz'apok re li okeb'aal sa' li Loq'laj Na'ajej, 26jo' ajwi' li t'ikr wank chiru li neb'aal ut li t'ikr wank sa' rokeb'aal li neb'aal chi xsutam li Loq'laj Na'ajej ut li artal, jo'wi' chixjunil li xk'aamal nak'anjelak.
27Laj Kehat a'an chaq li xxe'toonil yuwa'eb' laj Amrán, laj Isar, laj Hebrón ut laj Usiel: a'aneb' a'in li xch'uuteb' laj Kehat. 28Li rajlankil chixjunileb' li teelom chalen aj junq po, a'an waqxaqib' mil rik'in o'lajuk'aal (8,300). A'aneb' a'in li neke'ilok re li Loq'laj Na'ajej. 29Li xch'uuteb' laj Kehat neke'xyiib' li xmuheb'aaleb' sa' xjayal xsak'leb' iq', chi xk'atq li Loq'laj Na'ajej. 30Li xjolomil li xch'uuteb' laj Kehat, a'an laj Elisafán, ralal laj Usiel. 31A'aneb' a'in li neke'ilok re li Loq'laj Kaax, li meex, li xna'aj kanteel, eb' li artal, li k'a'aq re ru li nak'anjelak re loq'onink, li loq'laj t'ikr ut chixjunil li xk'anjelankil a'an.
32Li najolomink reheb' laj Leví, a'an laj Elehasar, ralal laj Aharón laj tij. A'an li na'ilok reheb' chixjunil laj k'anjel sa' li Loq'laj Na'ajej.
33Laj Merarí a'an chaq li xxe'toonil yuwa'eb' laj Majlí ut eb' laj Musí: a'aneb' a'in li xch'uuteb' laj Merarí. 34Li rajlankil chixjunileb' li teelom chalen aj junq po, a'an waqib' mil rik'in lajeek'aal (6,200). 35Li xjolomil li xch'uuteb' laj Merarí a'an laj Suriel, ralal laj Abijahil. Neke'xyiib' li xmuheb'aaleb' chi xk'atq li Loq'laj Na'ajej, sa' xjayal releb'l iq'. 36Eb' li ralal xk'ajol laj Merarí a'aneb' li neke'ilok re li xtz'alamche'il li Loq'laj Na'ajej, eb' li tz'amb'a, eb' li oqech, li neke'k'ochlaak wi' ut chixjunil li k'a'aq re ru nak'anjelak re li Loq'laj Na'ajej, 37jo' ajwi' eb' li oqech nasutmank wi' li neb'aal, eb' li neke'k'ochlaak wi', eb' li neke'chapmank wi' sa' ch'och' ut eb' li xk'aamal.
38Sa' xjayal releb'l saq'e neke'xyiib' li xmuheb'aaleb' laj Moisés ut laj Aharón rochb'eeneb' li ralal. A'aneb' a'in li neke'ilok re li Loq'laj Na'ajej sa' xk'ab'a'eb' laj Israel. Wi junaq na'ok aran chi maawa' aj tij, taakamsiiq.
39Li xk'ihaleb' chixjunileb' laj Leví, chalen aj junq po, naq ke'ajlaak xb'aan laj Moisés jo' kiyehe'k re xb'aan li Qaawa', a'an wiib' xka'k'aal mil tz'aqal (22,000).
40Li Qaawa' kixye re laj Moisés:
“Ajlaheb' chixjunileb' li xb'een ralaleb' laj Israel, chalen aj junq po, ut taatz'iib'a xk'ab'a'eb'. 41Chirix chik a'an, taaq'axtesiheb' cho'q we li Qaawa' eb' laj Leví, cho'q ruuchileb' chixjunil li xb'een ralaleb' laj Israel. Jo'kan ajwi' taaq'axtesi cho'q we li xketomq eb' laj Leví, cho'q ruuchileb' li xb'een ralaleb' laj Israel. Jo'kan ajwi' taaq'axtesi cho'q we li xketomq eb' laj Leví cho'q ruuchileb' li xb'een ral chixjunileb' li xketomq eb' laj Israel”, chan.
42Laj Moisés kirajlaheb' chixjunileb' li xb'een ralaleb' laj Israel, jo' chanru kiyehe'k re xb'aan li Qaawa'. 43Ut kik'eemank reetal naq li xk'ihaleb' chixjunileb' li xb'een alalb'ej chalen aj junq po, a'an wiib' xka'k'aal mil rik'in oxlaju xkaalajuk'aal (22,273).
44Toja' naq li Qaawa' kixye re laj Moisés:
45“Q'axtesiheb' we eb' laj Leví cho'q ruuchileb' chixjunil li xb'een ralaleb' laj Israel. Jo'kan ajwi' q'axtesi we li xketomq eb' laj Leví cho'q ruuchileb' li xketomq eb' laj Israel, xb'aan naq wehaqeb' laj Leví. Laa'in li Qaawa'. 46Ab'anan eb' li xb'een ralaleb' laj Israel jwal naab'aleb' chiruheb' laj Leví. Jo'kan naq, cho'q reeqaj li oxlaju xkaalajuk'aal (273) li neke'xq'ax xk'ihaleb' laj Leví, 47taaxok o'otq chi tumin sa' xk'ab'a' li junjunq aj Israel, sa' li Loq'laj Na'ajej, jo' chanru li xtz'aq chi plaatil. 48Taak'e li plaat re laj Aharón ut reheb' li ralal, sa' xk'ab'a' naq numtajenaqeb' wi' chik xk'ihaleb' laj Leví”, chan li Qaawa'.
49Tojo' naq laj Moisés kixxok li tumin xtojeb' li xk'ihaleb' laj Israel chiruheb' laj Leví. 50Kixxok oob' xb'eleek'aal xka o'q'ob' (1,365) chi plaat sa' xk'ab'a' li xb'een ralaleb' laj Israel, jo' chanru li b'isleb' wank sa' li Loq'laj Na'ajej. 51Ut laj Moisés kixq'axtesi li tumin re laj Aharón ut reheb' li ralal, jo' chanru kiyehe'k re xb'aan li Qaawa'.
Currently Selected:
Nm 3: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.