Nm 2
2
Li xmuheb'aaleb' laj Israel
1Li Qaawa' kiraatinaheb' laj Moisés ut laj Aharón ut kixye reheb':
2“Eb' laj Israel te'xyiib' li xmuheb'aaleb' chi teep, rub'el reetalil li junjunq, rub'el reetalil li xteepaleb' li xyuwa'eb', chi xsutam li Loq'laj Muheb'aal ut najt b'ayaq rik'in.
3“Eb' li te'xyiib' xmuheb'aaleb' sa' xjayal releb'l saq'e, a'an li xteepal laj Judá, chi ch'uut, rub'el li reetalileb'. Li xjolomileb' a'an laj Najsón, ralal laj Aminadab. 4Li rajlankileb' li jun ch'uut a'in, a'an kaalaju xkaak'aal mil rik'in lajeek'aal xkab' o'q'ob' (74,600). 5Chi xk'atqeb' a'an, te'xyiib' li xmuheb'aaleb' li xteepal laj Isakar. Li xjolomil xteepal laj Isakar a'an laj Natanael, ralal laj Swar. 6Li rajlankileb' li jun ch'uut a'in, a'an kaalaju roxk'aal mil rik'in jun o'q'ob' (54,400). 7Li xjolomil eb' li ralal xk'ajol laj Sabulón, a'an laj Eliab, ralal laj Jelón. 8Li rajlankileb' li jun ch'uut a'in, a'an wuqlaju roxk'aal mil rik'in jun o'q'ob' (57,400). 9Li rajlankileb' chixjunil li wankeb' sa' xmuheb'aaleb' laj Judá, chi ch'uut, a'an waqib' xlajeek'aal mil rik'in jun o'q'ob' (186,400). A'aneb' li te'xik chi uub'ej naq te'xjal li xna'ajeb'.
10“Eb' li te'xyiib' xmuheb'aaleb' sa' xjayal rokeb'l iq', a'an li xteepal laj Rubén, chi ch'uut, rub'el li reetalileb'. Li xjolomileb' a'in, a'an laj Elisur, ralal laj Sedewr. 11Li rajlankileb' li jun ch'uut a'in, a'an waqib' roxk'aal mil rik'in o'k'aal xkab' o'q'ob' (46,500). 12Chi xk'atqeb' a'an, te'xyiib' li xmuheb'aaleb' li xteepal laj Simehón. Li xjolomileb' li ralal xk'ajol laj Simehón a'an laj Salumiel, ralal laj Surisaday. 13Li rajlankileb' li jun ch'uut a'in, a'an b'eleelaju roxk'aal mil rik'in o'lajuk'aal (59,300). 14Li xjolomil eb' li ralal xk'ajol laj Gad a'an laj Eliasaf, ralal laj Rewel. 15Li rajlankileb' li jun ch'uut a'in, a'an oob' roxk'aal mil rik'in lajeeb' roxlajuk'aal xkab' o'q'ob' (45,650). 16Li rajlankileb' chixjunileb' li wankeb' sa' xmuheb'aaleb' laj Rubén, chi ch'uut, a'an junlaju xwaqxaqk'aal mil rik'in lajeeb' roxk'aal xkab' o'q'ob' (151,450). A'aneb' li te'xik sa' xkab' ch'uutal naq te'xjal li xna'ajeb'.
17“Toja' naq taak'ame'q li Loq'laj Muheb'aal rochb'een li xmuheb'aaleb' laj Leví, xb'aan naq eb' a'in wankeb' sa' xyiheb' li ralal xk'ajol laj Israel. Jo' chanru naq ke'xk'ojob' li xmuheb'aaleb', jo'kan ajwi' naq te'xik, li junq teep wanqeb' rub'el li reetalileb'.
18“Sa' xjayal rokeb'l li saq'e te'xyiib' xmuheb'aaleb' li ralal xk'ajol laj Efraín, chi ch'uut, rub'el li reetalileb'. Li xjolomileb' a'in, a'an laj Elisamá, ralal laj Amiud. 19Li rajlankileb' li jun ch'uut a'in, a'an ka'k'aal mil rik'in o'k'aal xkab' o'q'ob' (40,500). 20Chi xk'atqeb' a'an, te'xyiib' li xmuheb'aaleb' li xteepal laj Manasés. Li xjolomil eb' li ralal xk'ajol laj Manasés, a'an laj Gamaliel, ralal laj Pedasur. 21Li rajlankileb' li jun ch'uut a'in, a'an kab'laju xka'k'aal rik'in lajeek'aal (32,200). 22Li xjolomileb' li ralal xk'ajol laj Benjamín, a'an laj Abidán, ralal laj Kidehoní. 23Li rajlankileb' li jun ch'uut a'in, a'an o'laju xka'k'aal mil rik'in jun o'q'ob' (35,400). 24Li rajlankileb' chixjunileb' li wankeb' sa' xmuheb'aaleb' laj Efraín, chi ch'uut, a'an waqxaqib' xwaqk'aal mil rik'in o'k'aal (108,100). A'aneb' li te'xik sa' rox ch'uutal naq te'xjal li xna'ajeb'.
25“Sa' xjayal releb'l iq', te'xyiib' xmuheb'aaleb' li ralal xk'ajol laj Dan, chi ch'uut, rub'el li reetalileb'. Li xjolomil li teep a'in, a'an laj Ajieser, ralal laj Amisaday. 26Li rajlankileb' li jun ch'uut a'in, a'an wiib' xkaak'aal mil rik'in o'lajuk'aal xkab' o'q'ob' (62,700). 27Chi xk'atqeb' a'an, te'xyiib' xmuheb'aaleb' li xteepal laj Aser. Li xjolomileb' li ralal xk'ajol laj Aser, a'an laj Pakiel, ralal laj Okrán. 28Li rajlankileb' li jun ch'uut a'in, a'an jun roxk'aal mil rik'in o'k'aal xkab' o'q'ob' (41,500). 29Li xjolomileb' li ralal xk'ajol laj Neftalí, a'an laj Ajirá, ralal laj Enán. 30Li rajlankileb' li jun ch'uut a'in, a'an oxlaju roxk'aal mil rik'in jun o'q'ob' (53,400). 31Li rajlankileb' chixjunil li wankeb' sa' xmuheb'aaleb' laj Dan, chi ch'uut, a'an wuqlaju xwaqxaqk'aal mil rik'in lajeek'aal xkab' o'q'ob' (157,600). A'aneb' li te'xik chi ixb'ej, rub'el li reetalileb', naq te'xjal li xna'ajeb'”, chan li Qaawa'.
32A'an a'in xk'ihaleb' laj Israel li ke'ajlaak, chi teep ut chi xjunqkab'alileb' li xyuwa'eb'. Li xk'ihal chixjunileb' li winq ke'ajlamank re yalok, a'an oxib' xjunlajuk'aal mil rik'in lajeeb' xwaqxaqk'aal xkab' o'q'ob' (603,550). 33A'ut eb' laj Leví ink'a' ke'k'ehe'k sa' ajl sa' xyanqeb' laj Israel, jo' xyehom li Qaawa' re laj Moisés.
34Eb' laj Israel ke'xb'aanu chixjunil jo' tz'aqal kixye li Qaawa' re laj Moisés: li junjunq kixyiib' li xmuheb'aal rub'el li reetalil li xteepal ut, naq ki'elk, koho rochb'een li xch'uutal ut li xjunkab'al.
Currently Selected:
Nm 2: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.