Nm 4
4
Eb' laj Kehat
1Li Qaawa' kiraatina laj Moisés ut laj Aharón ut kixye reheb':
2“Ajlaheb' li ralal xk'ajol laj Kehat, ralal laj Leví; ajlaheb' chi ch'uutal ut chi junqkab'alil, 3chalen laj lajeeb' xka'k'aal toj lajeeb' roxk'aal chihab', chixjunileb' li yo'ooneb' chi k'anjelak sa' li Loq'laj Na'ajej.
4“A'an a'in li k'anjel te'xb'aanu eb' li ralal xk'ajol laj Kehat sa' li Loq'laj Na'ajej: a'an jun li k'anjel q'axal loq'. 5Naq li tenamit te'xjal xna'ajeb', laj Aharón ut eb' li ralal te'isinq li t'ikr chire li Loq'laj Na'ajej ut chiru a'an te'xtz'ap ru li Loq'laj Kaax. 6Te'xk'e sa' xb'een junaq tz'uum q'un ru, ut te'xhel junaq kaqi t'ikr; chirix chik a'an te'xk'e eb' li che' re xpaqonkil. 7Chiru xmeexul li wa te'xhel junaq kaqi t'ikr, ut sa' xb'een a'an te'xk'e xna'aj li ha', li sek' ut li xaar namayejamank wi' li b'iin. Li wa wanq tz'aqal sa' xb'een chi junelik. 8Sa' xb'een a'an te'xhel junaq kaqi t'ikr li te'xlan rik'in junaq tz'uum q'un ru, ut chirix chik a'an te'xk'e eb' li che' re xpaqonkil. 9Te'xxok junaq kaqi t'ikr ut te'xlan xna'aj li saqenk, li xam, li xji'b'al ru, li xna'aj xchahil jo'wi' chixjunil li xsek'ul li aseeyt li na'oksimank re li saqenk. 10Chixjunil a'an te'xlan sa' junaq tz'uum q'un ru, ut te'xk'e sa' xb'een li che' li neke'xpaqo wi'.
11“Sa' xb'een li artal yiib'anb'il rik'in oor te'xhel junaq kaqi t'ikr, te'xtz'ap rik'in junaq tz'uum q'un ru, ut te'xk'e li che' re xpaqonkil. 12Chirix chik a'an te'xxok chixjunil li k'a'aq re ru nak'anjelak sa' li Loq'laj Na'ajej, te'xk'e sa' junaq saqi t'ikr, te'xtz'ap sa' junaq tz'uum q'un ru, ut te'xpaqo chiru junaq che'. 13Te'risi li xchahil li artal ut te'xtz'ap rik'in junaq kaqi t'ikr; 14sa' xb'een a'an te'xk'e chixjunil li k'a'aq re ru na'oksimank sa' li artal: li xna'aj xam, li xokleb' ru xam, li xchileb'aal ru xam ut li xsek'ul, naraj naxye chixjunil li k'a'aq re ru na'oksimank sa' li artal. Te'xhel sa' xb'een junaq tz'uum q'un ru, ut te'xk'e li xche'el re xpaqonkil. 15Naq akaq xe'raqe'k laj Aharón ut eb' li ralal chi xlanb'al li k'a'aq re ru jwal loq' re li artal, sa' xjalb'al xna'ajeb', aka' chik eb' li ralal xk'ajol laj Kehat te'wulaq re te'xk'am. Ab'anan maak'a' li k'aru jwal loq' te'xch'e', xb'aan naq te'kamq. A'an a'in li xk'anjeleb' li ralal xk'ajol laj Kehat sa' li Loq'laj Na'ajej. 16Laj Elehasar, ralal laj Aharón laj tij, a'an li taa'iloq re li xya'al li xam, li sununkil ensens, li ru li awimq namayejaak rajlal kutan ut li loq'laj aseeyt re yuluk. Sa' xb'een ajwi' a'an wank rilb'al li Loq'laj Na'ajej ut chixjunil li k'a'aq re ru wank chisa': a' li k'a'aq re ru jwal loq' ut chixjunil li na'oksimank aran”.
17Li Qaawa' kiraatina laj Moisés ut laj Aharón ut kixye reheb': 18“Maawisi eb' laj Kehat sa' xyanqeb' laj Leví. 19B'aanuhomaq chi jo'ka'in, re naq ink'a' te'kamq xb'aan xch'e'b'al li loq'laj eechej re li artal: laj Aharón ut eb' li ralal te'xk'e xk'anjel li junjunq ut te'xye reheb' k'aru te'xk'am. 20Ut ink'a' te'ok jun k'amokaq chi rilb'al li k'a'aq re ru jwal loq', xb'aan naq te'kamq”, chan.
Eb' laj Kersón
21Li Qaawa' kixye re laj Moisés:
22“Ajlaheb' ajwi' li ralal xk'ajol laj Kersón, chi ch'uut ut chi junqkab'alil. 23Ajlaheb' chalen laj lajeeb' xka'k'aal toj lajeeb' roxk'aal chihab', chixjunileb' li yo'ooneb' chi k'anjelak, re naq te'k'anjelaq sa' li Loq' laj Na'ajej.
24“A'an a'in li k'anjel te'xb'aanu li xch'uuteb' laj Kersón; a'an a'in li xk'anjeleb' ut li iiq te'xk'am. 25Te'xk'am li xt'ilkemil li Loq'laj Na'ajej, li Loq'laj Muheb'aal, li xmuheelal-tz'uum q'un ru, li t'ilkem wank sa' rokeb'aal li Loq'laj Na'ajej; 26li xt'ikrul li neb'aal ut li wank chire rokeb'aal li neb'aal li wank chi xsutam li Loq'laj Na'ajej ut li artal, li xk'aamal ut chixjunil li nak'anjelak aran. Te'xk'am jo'ch'inal jo'nimal nak'anjelak chiruheb' ut te'xb'aanu li xk'anjeleb'. 27Ab'an chixjunil li k'anjel te'xb'aanu eb' laj Kersón jo' ajwi' li iiq tento te'xk'am, ilb'ilaq xb'aan laj Aharón ut eb' li ralal. Laa'ex tex'iloq re li k'anjel li tento te'xb'aanu. 28A'an a'in li k'anjel te'xb'aanu li xch'uuteb' laj Kersón sa' li Loq'laj Na'ajej. Ut laj Itamar, ralal laj Aharón laj tij, a'an li taataqlanq sa' xb'eeneb'.
Eb' laj Merarí
29“Ajlaheb' li ralal xk'ajol laj Merarí, chi ch'uut ut chi junqkab'alil. 30Chixjunileb' laj lajeeb' xka'k'aal toj lajeeb' roxk'aal chihab', eb' li yo'ooneb' chi k'anjelak, ajlaheb' re naq te'k'anjelaq sa' li Loq'laj Na'ajej. 31A'an a'in li tento te'xk'am ut te'xb'aanu sa' li Loq'laj Na'ajej: te'xk'am eb' li tz'alamche', li tz'amb'a, eb' li oqech ut li neke'k'ochlaak wi'; 32eb' li roqechal nasutmank wi' li Loq'laj Na'ajej, rochb'eeneb' li neke'k'ochlaak wi'; eb' li che' li neke'chapok re sa' ch'och' ut li xk'aamal; chixjunileb' li k'anjelob'aal ut li k'a'aq re ru aajel ru sa' li xk'anjeleb'. Laa'ex teech'olob' chi junqal chiruheb' li k'a'aq re ru te'xk'am. 33A'an a'in li k'anjel te'xb'aanu li xch'uuteb' laj Merarí. Ut laj Itamar, ralal laj Aharón laj tij, a'an li taataqlanq sa' xb'eeneb' sa' chixjunil li k'anjel te'xb'aanu sa' li Loq'laj Na'ajej”, chan.
34Laj Moisés, laj Aharón ut eb' xjolomil li komonil ke'rajla eb' li ralal xk'ajol laj Kehat, chi ch'uut ut chi junqkab'alil, 35chalen laj lajeeb' xka'k'aal toj lajeeb' roxk'aal chihab', chixjunileb' li yo'ooneb' chi k'anjelak, re naq te'kanaaq chi k'anjelak sa' li Loq'laj Na'ajej. 36Li rajlankileb' li k'iila ch'uut a'in, a'an wiib' mil rik'in lajeeb' xwaqxaqlajuk'aal xkab' o'q'ob' (2,750). 37A'an a'in li xk'ihaleb' li ke'ajlaak sa' xch'uuteb' laj Kehat, chixjunileb' li te'k'anjelaq sa' li Loq'laj Na'ajej. Ke'ajlaak xb'aan laj Moisés ut laj Aharón, jo' yeeb'il xb'aan li Qaawa' re laj Moisés.
38Ke'ajlaak eb' li ralal xk'ajol laj Kersón, chi ch'uut ut chi junqkab'alil, 39chalen laj lajeeb' xka'k'aal toj laj lajeeb' roxk'aal chihab', chixjunileb' li yo'ooneb' chi k'anjelak, re naq te'k'anjelaq sa' li Loq'laj Na'ajej. 40Li rajlankileb' li k'iila teep ut junkab'al, a'an wiib' mil rik'in lajeeb' xkab'lajuk'aal xkab' o'q'ob' (2,630). 41A'an a'in li xk'ihaleb' li ke'ajlamank sa' xch'uuteb' laj Kersón, chixjunileb' li te'k'anjelaq sa' li Loq'laj Na'ajej. Ke'ajlaak xb'aan laj Moisés ut laj Aharón, jo' yeeb'il xb'aan li Qaawa'.
42Ke'ajlaak ajwi' eb' laj Merarí, chi ch'uut ut junqkab'alil, 43chalen laj lajeeb' xka'k'aal toj laj lajeeb' roxk'aal chihab', chixjunileb' li yo'ooneb' chi k'anjelak, re naq te'k'anjelaq sa' li Loq'laj Na'ajej. 44Li rajlankileb' li xch'uuteb' laj Merarí, a'an oxib' mil rik'in lajeek'aal (3,200). 45A'an a'in li xk'ihaleb' laj Merarí. Ke'ajlaak xb'aan laj Moisés ut laj Aharón, jo' yeeb'il xb'aan li Qaawa' re laj Moisés.
46Li xk'ihaleb' laj Leví li ke'ajlaak xb'aan laj Moisés, laj Aharón ut li xjolomileb' aj Israel, chi ch'uut ut chi junqkab'alil, 47chalen laj lajeeb' xka'k'aal toj laj lajeeb' roxk'aal chihab', li yo'ooneb' chi k'anjelak ut chi xjalb'al xna'aj li Loq'laj Na'ajej, 48a'an waqxaqib' mil rik'in b'eleek'aal xkab' o'q'ob' (8,580). 49Ke'ajlamank jo' yeeb'il xb'aan li Qaawa' re laj Moisés, ut ke'k'eemank xk'anjel li junjunq ut li xk'amom. Li rajlankileb' a'in ki'uxk jo' kiyehe'k re laj Moisés xb'aan li Qaawa'.
Currently Selected:
Nm 4: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.