YouVersion Logo
Search Icon

Juan 20

20
Jesús inuphä tä tälho n'op'itseyhay
(Mat 28.1-10; Mar 16.1-8; Luc 24.1-12)
1Häp fwala tä ichunpe semana, tä nech'e fwala, tä kamaj honatsi i'pe honhat, María Magdalena ihoye n'op'itsekw'et. Tä nichäte, wet hiw'en tä pajche õ'tiyej kanhi tunte tä õhp'oyeji lepe. 2Wet inu alhoho tä ihoye häp Simón Pedro lhäy'e elh Jesús lechufwenek tä Lewuk wuj tä ihumin. Wet ifwenho lhamel tä yok:
–¡Õ'tonphä m'athi Lhawuk lep'itsek, wet olhamel ohanhiyejt'a ihi lhip tä õ'tihi!
3Tä Pedro lhäy'e elh Jesús lechufwenektso iläte, lhamel yikhen tä ihoye n'op'itsekw'et. 4Wet inukwe alhoho, mat elh lhaiteläfwit wet ichunlä Pedro wet ichun tä nichäte. 5Wet t'upeyejchä tä iyahin lech'oye, wet hiw'en häp wesas tä pajche õ'käfwlejche Jesús lep'itsek, mat ihohit'a lech'oye. 6Wet Simón Pedro tälhche elh len'äyij, tä nichäte, wet lham tiyäj lech'oye wet hiw'en häp wesastso, 7lhäy'e elh wesaj tä õ'käfwlejlhi Jesús lhetek tä hap'akhiyejt'a iyhäj, mat ts'ilak tä õ'käfwelche. 8Wet häte elh tä ichunne tä nichäte n'op'itsekw'et, lham nech'e iho lech'oye. Tä hiw'en m'ak tä mälhyejtso, iwo lechayaja. 9Mat lhamel kamaj ihanhiyejt'a häp m'ak tä Dios lhämet yäme tä Lhawuk iwohiyet'ak ninuyaphä tä tälho n'op'itseyhay. 10Wet nech'e lhamel yäple lew'et.
Jesús lhain'ältej María Magdalena
(Mar 16.9-11)
11Mat häp María Magdalena imälheyej n'op'itsekw'et wet tafwlhi. Wet t'upeyejchä tä iyahnho, 12wet hiw'en täkwfwas ángeles tä lew'uyis ipelas. Lhamel ihi lew'etnaj Jesús lep'itsek ihi tä tatachephä, elh ihi täjnaj lhetek tumej wet elh itakäläye. 13Wet lhamel tay'ätshane María wet yok:
–Atsinha, ¿chipte tä letafwlhi?
Lham nichulho wet yok:
–Häp tä õ'chäj m'athi Owuk, wet ohanhiyejt'a ihi lhip tä õ'tihi.
14Häpet tä iwoyetso, wet nitilhakhi wet hiw'en Jesús, mat tek nitäfwelej tä häpe lham. 15Wet Jesús tay'ätshane wet yok:
–Atsinha, ¿chipte tä letafwlhi? ¿Atsi tä let'ukwe?
Mat María yenek häpe häp hin'o tä t'uye n'olafwek, wet tahuyej tä yok:
–P'altsenn'o, che am p'iyak lehänej kanhi, fwel n'oho lhip tä letihi wet ot'uhikwela.
16Wet nech'e Jesús tahuyej wet yok:
–¡María!
Wet lham iyahin tä iläte wet yok:
–¡Rabuni!
(Häp täja Hebreo lhämet tä yok, Maestro.)
17Wet Jesús yok:
–Le n'oyej, tsi kamaj ohohiyet'a Ojcha. Mat mäh hoye opuhfwas, fwenhola tä ohohiyela häp Elh tä häpe Ojcha wet tä äp amel Ajcha, oka Dios wet äp amel aka Dios.
18Tä mälhyejtso, María Magdalena yik wet ifwenho Jesús lechufwenkay wet yok:
–¡Ow'enne Lhawuk!
Wet äp yäme m'ak tä Jesús ifwenhon'e.
Jesús lhain'ältej lechufwenkay
(Luc 24.36-49)
19Tä honatsi, häp ifwalatso tä ichunpe semana, lechufwenkay lhaihutwek wet hip'ohiche lepelis tä lhamel ichufwi hup, tsi nowaye niyatey tä Judío lhayis. Wet Jesús lhain'älit tä takasthi lechowej lhamel wet yok:
–¡Atamsekis ihi!
20Tä iwoyetso, wet ipäyne lhamel takwech'ol lhäy'e lesulaknaj õ'tshänejo n'ohun. Wet lhamel wuj tä lakäjyaj ihi tä hiw'en Lhawuk. 21Wet Jesús yachajo tä tahuyej lhamel wet yok:
–¡Atamsekis ihi! Hätet iwoye tä Lhajcha ichenn'o, häte ochen amel.
22Wet yafwutejpe leyalh häp lhamel, wet yok:
–Chumayhlä häp Espíritu tä Dios T'amajchet. 23Häp lhamel tä letäyhtejen lesukyajay, tatäy t'at lesukyajay. Wet häp lhamel tä katäyhtayej lesukyajay, tatäyhit'a lesukyajay.#Mat 16.19; 18.18
Tomás nech'e t'ekhaye tä matche, inuphä t'at Lhawuk
24Tomás, häp Jesús lechufwenkay tä ihi doce elh tä äp õyen lheya Täkwhiyis, lham ihiyejt'a iyhäj tä Jesús lhain'ältej. 25Mat tä näm, lhamel ifwenho wet yok:
–¡Olhamel ow'en mathi Lhawuk!
Mat Tomás nichulho wet yok:
–Che olham n'am w'en clavos n'äyhäy tä ihi takwech'ol, wet äp n'am t'uyitche ofwuj häp letowej, wet äp n'am tachumpe letowejn'aj õ'tshänho lesulak, ot'ekhahiyet'a.
26Tä tajyäme p'ante semana tefwaji, yachajo tä lhamel lhaihutwek tä ichufwi hup, mat nech'e Tomás iyej t'at lhamel. Wet lhamel hip'ohiche lepelis, mat Jesús lhain'älit tä takasthi lechowej lhamel wet yok:
–¡Atamsekis ihi!
27Wet tahuyej Tomás wet yok:
–Lhek yahin otkwech'ol, uyitche afwuj häp letowej, wet ti alhoho akwey wet chumejpe olhipn'aj õ'tshänho. ¡Leyej akachuhanyaj, mat ekhaye!
28Tomás yok:
–¡Iwuk, ika Dios!
29Jesús tahuyej wet yok:
–Nech'e let'ekhaye tsi lew'enn'o. Mat lhäy'e lhip Dios lakäpfwayaj tä is tä iyej häp wichi tä niw'enan'o mat t'ekhaye t'at.
Häp m'ak tä tamenej tä õ'lesayen nilhokej tähesna
30Wujpey letetnhay iyhäj tä Jesús yenlhi tä lechufwenkay hiw'enej, mat ihihit'a lehina. 31Mat m'ak tä otihi, otihi t'at häpkhilek amel lechayaye tä Jesús häpe t'at Dios Lhäs, häp N'ofwayhthi tä Dios Chenek, wet häp tä elh che ichaye ikatej lew'atshancheyaj.

Currently Selected:

Juan 20: WCHB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy