Juan 21
21
Jesús lhain'ältej siete lechufwenkay
1Tä tajyäme tähestso, yachajo tä Jesús lhain'ältej iyhäj lechufwenkay tä lham ihi lhip lewomek tä lhey Tiberias. Häp täja m'ak tä mälhyej: 2Iche siete lhamel tä iwek, häpehen häp Simón Pedro, lhäy'e Tomás tä äp õyen lheya Täkwhiyis, lhäy'e Natanael, häp elh tä tälhe Caná tä ihi Galilea, lhäy'e Zebedeo leles, lhäy'e iyhäj Jesús lechufwenkay täkwfwas. 3Wet Simón Pedro tahuyej iyhäj wet yok:
–Oyik, ot'ukwe w'ahat.
Iyhäj nichulho wet yok:
–Häte olhamel oyik amche.
Wet lhamel tiyäjo chalana wet yikhen, mat häp honatsitso niwohit m'ak che isakanej.#Luc 5.5 4Tä nech'e fwala Jesús lhain'älit tä i'pe ufw, mat lhamel nitäfwenhiyejt'a tä häpe lham. 5Wet tay'ätshane lhamel wet yok:
–Lay'i lhayis, ¿hä nehichet w'ahat yämthilek y'atuj?
Lhamel nichulho wet yok:
–Kha, m'ak olänhit'a.
6Wet Jesús tahuyej lhamel wet yok:
–Tumtej chalana lhip tä afwomkat häp awot, häpkhilek lesakanej w'ahat.
Wet iwoye, itumtej lewot häp lhip tä lefwomkat, wet lhamel ikalhihit'a tä fwetaj itonphä, tsi w'ahat tapoyejej.#Luc 5.6 7Wet nech'e Jesús lechufwenek tä wuj tä lham ihumin, tahuyej Pedro wet yok:
–¡Häpe Lhawuk!
Häpet tä Simón Pedro iläte tä häpe Jesús, wet iwo lew'uya tsi ts'ilakche, wet nech'e tiyäjo inät wet ihoye. 8Mat iyhäj ihi chalana wet iton lewot tä w'ahat tapoyej, wet ichätyene ufw tsi tajlhama cien metros. 9Tä lhamel inukwehchä tä nichät ufwe, hiw'en itäj fwiyhol tä pajche lak'e t'at, wet w'ahat i'pe, wet häte iche pan. 10Wet Jesús tahuye lhamel wet yok:
–Hänay alhoho elhpej w'ahat tä amel lesakanej.
11Wet Simón Pedro tä iläte Lewuk, wet yik tä tiyäjo chalana wet itonpe tä tamchäy häp lewot tä tapoyejej w'ahat tä wusche, iche ciento cincuenta y tres (153). Mat tej tä wujpe w'ahat, mat hikw'esichet'a lewot. 12Wet Jesús t'äne lhamel wet yok:
–Lhuyay, n'at'ekhen.
Wet niwohit elh lhamel chik fwetaj tay'ätshaneje chik yok, “¿Atsi tä ahäpe?”, tsi nitäfwelej t'at tä häpe Lhawuk. 13Wet nech'e Jesús ihowhäye wet tachuma pan wet hiw'enhomche lhamel, lhäy'e w'ahat.
14Wet täjtso nech'e tres tä Jesús lhain'ältej lechufwenkay, tälhe tä lham inuphä tä tälho n'op'itseyhay.
Jesús yämhoplhi Simón Pedro
15Tä ileyej tä t'ekhen, Jesús tay'ätshane Simón Pedro wet yok:
–Simón, Juan lhäs, ¿hä lenu'pe aiyhäj tä lehuminn'o?
Pedro nichulho Lewuk wet yok:
–Ey'a, Iwuk, am lehanej t'at tä oaihumin.
Jesús ifwenho tä yok:
–Chunnhena oläy tson'atas les.
16Jesús äp yachajo tä tay'ätshane tä yok:
–Simón, Juan lhäs, ¿hä lehuminn'o?
Pedro nichulho wet yok:
–Ey'a, Iwuk, am lehanej t'at tä oaihumin.
Jesús ifwenho tä yok:
–Uyehena oläy tson'atas.
17Jesús äp yachajo tä tay'ätshane tä yok:
–Simón, Juan lhäs, ¿hä lehuminn'o?
Wet Pedro ifwitajejlhi tä nech'e tres tä Jesús tay'ätshane che matche tä lham ihumin. Wet nech'e nichulho Lewuk wet yok:
–Iwuk, am lehanej nilhokej m'ayhay. Wet lehanej t'at tä oaihumin.
Jesús ifwenho tä yok:
–Hänach'oye lhäk oläy tson'atas. 18Matche, matche tä ofwel amho, Tä ahäpe mamse wet lewopej haw'uya wet lehoyepej lhip tä am lehumin tä lehoye. Mat chik ahäpe hin'o wumek, lepiynhichetshila akweyey wet elh iwohla haw'uya wet ihänla ame lhip tä kahumina chik lehoye.
19Tä Jesús iwoyetso, itäfwnhatej m'ak tä mälhhiyeja häp Pedro t'ilek wet iwunthiyeja Dios. Tä ileyej tä iwoyetso, wet yok:
–¡Nek n'okwe!
Jesús lechufwenek tä lham wuj tä ihumin
20Wet Pedro iyahin lew'echehi wet hiw'enlä elh tä nekche len'äyij. Häpe t'at Jesús lechufwenek tä wuj tä Lewuk ihumin, häp elh tä inajwhäye tä t'ekhen wet tay'ätshaneje naji Lewuk häp elh tä yachajila.#Juan 13.25 21Tä Pedro hiw'enlä, tay'ätshane Jesús wet yok:
–Iwuk, ¿atsi m'ak tä mälhhiyeja hin'otsi?
22Jesús nichulho wet yok:
–Chik ohumin chik iläy t'at yämthilek otpil, tej t'attsi, y'ajit'a ame, nek n'okwe am.
23Häp tä tamenej tä nilhokej Dios leles yämejwethä tä fwetaj Jesús lechufwenektso tek y'inhila. Mat Jesús yämhiyet'a tä tek y'inhila, tajlhama tä yok, “Chik ohumin chik hin'otsi iläy t'at yämthilek otpil, tej t'attsi, y'ajit'a ame.”
24Wet häpe t'at häp Jesús lechufwenektso tä yäme häp m'ayhayna wet ilesayen. Wet olhamel ohanej tä matche t'at m'ak tä yäme.
25Wujpey m'ayhay iyhäj tä Jesús iwoye, wet chik õ'lesayen elh tefwajpejni, oyenek libros w'awulhihot'a honhat imälhewek wet lew'et ihihit'a.
Currently Selected:
Juan 21: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.