Juan 19
19
1Wet Pilato ne'tek sip'äl tachuma Jesús wet itasinlhi. 2Wet lhamel ifwinche ch'uthanil tä yen coronaya wet iti'pe Jesús lhetek. Wet äp hiw'uyyenhi n'ow'uy tä ifwak'an, 3wet ihopejwhäye wet yopejkwe:
–¡Amtena, Judío lhayis Kaniyat!
Wet lhamel inhäpäjpej Jesús lete'pe.
4Wet Pilato yachajo tä iho alhoye, wet tahuyej Judío lhayis wet yok:
–Lhek yahinya, otonphä häpkhilek amel lehanej tä n'am w'en m'ak tä letes häp hin'ona.
5Wet nech'e inuphä Jesús tä ch'uthanil i'pe lhetek wet äp õhw'uyyenhi n'ow'uy tä ifwak'an. Wet Pilato yok:
–¡Lhek yahinay, w'etna hin'o!
6Tä sacerdotes tä len'ohyajay ihiche lhäy'e hin'ol tä t'uye Dios Lew'et hiw'enlä, wet lhamel t'änhen tä yok:
–¡P'ajtej cruz! ¡P'ajtej cruz!
Mat Pilato yok:
–Chuma amel wet p'ajtej cruz, tsi olham ow'enhit'a m'ak tä letes.
7Judío lhayis nichulho wet yok:
–Iche olhamel oka ley wet häp tä t'uhawetej t'at chik y'il hin'otsi, tsi olhamel oka ley yen tesayej tä fwetaj häpe Dios Lhäs.#Lev 24.16
8Tä Pilato iläte täjtso, lhäy'e lhip tä noway. 9Wet yäpilchufwi lew'et wet tay'ätshane Jesús wet yok:
–¿Chi letälhi?
Mat Jesús tek nichulho. 10Wet Pilato tahuyej wet yok:
–¿Hä tek lechulh n'oho? ¿Hä lehanhiyejt'a tä in'oyej on'ohyaj yämthilek one'tek õhp'ajtit amej cruz, wok oyok, “Nuhatphä”?
11Jesús nichulho wet yok:
–Chik han'ohyaj tä i'amej nitälhiye Dios, lehanhiyejt'a lewoyneje yämthilek alenuhat n'o'pe. Tä mälhyejtso, elh tä yachajn'o ame letes inu'pe am ates.
12Wet tälhe täjtso Pilato t'ukwe len'äyij m'ak chik iwoye yämthilek inuhatphä Jesús. Mat Judío lhayis t'änhen wet yok:
–¡Chik lenuhatphä hin'otsi, ahäpe lhaka niyat Romano tayhfwa! ¡Tsi häp hin'o chik lhayen häpeya niyat mälhyej iwoye lhamtsi, tatayhlä lhaka niyattso!
13Tä Pilato iläte täjtso, ne'tek õ'tonphä Jesús. Wet nech'e lham tatayphä tä ihi n'okalelhthayajw'et tä Hebreo lhämet yok, Gabata, wok õyok, Tuntey tä õyen pisoya. 14Häpe t'at ifwala tä tumejlä Pascua, wet ifwala ihi lechowej. Wet Pilato tahuyej Judío lhayis wet yok:
–¡Lhek yahinay aka niyat!
15Mat lhamel t'änhen wet yok:
–¡Län! ¡Län! ¡P'ajtej cruz!
Pilato tay'ätshane lhamel wet yok:
–Mat amel aka niyat t'at, ¿hä lene'tek op'ajtej cruz?
Mat häp sacerdotes tä len'ohyajay ihiche nichulho wet yok:
–¡Ihichet'a elh olhamel oka niyat, ts'ilak t'at lhaka niyat Romano!
16Tä mälhyejtso, Pilato yachaje lhamel häp Jesús yämlek hip'ajtej cruz, wet lhamel yikchufwi.
Õhp'ajtej cruz häp Jesús
(Mat 27.32-44; Mar 15.21-32; Luc 23.26-43)
17Jesús tilhäj t'at laka cruz tä yik, pajtha nichäte lhip tä lhey N'olhetek Lhilew'et, tä Hebreo lhämet yok, Gólgota. 18Häp tä ihi tä õhp'ajtej cruz, lhäy'e hin'ol täkwfwas, elh ihi lefwomkat wet elh ihi lets'amkat. 19Wet Pilato ne'tek õ'ti'pe cruz n'olesaynek tä yok, “JESÚS TÄ NAZARET LHELE, JUDÍO LHAYIS LAKA NIYAT”. 20Ihi t'at häp Hebreo lhämet, lhäy'e Latín lhämet, lhäy'e Griego lhämet, wet wujpe Judío lhayis tä iyahin, tsi lhip tä ihi tä õhp'ajtej cruz Jesús tek atofwehlä hupuy. 21Wet sacerdotes tä len'ohyajay ihiche ifwenho Pilato tä yok:
–Yej lesayen, “Judío lhayis laka Niyat”, mat lesayen tä yok, “Häp elh tä yäm lhame tä häpe Judío lhayis laka Niyat”.
22Mat Pilato nichulho lhamel wet yok:
–Häp m'ak tä olesayen, ihi t'at tä otihi.
23Tä sip'äl ileyej tä hip'ajtej cruz häp Jesús, lhamel tachuma lew'uyis wet hiw'en lhamhomche häp lhamel tä ihi cuatro. Häte tachuma lew'uy tä newache n'otsekkay tä ihi, mat imälhewek tä n'oyik. 24Wet yok:
–Isit'a chik y'awo lhipeya, mat n'akoyej suerte wet elh chik taj häpkhilek lewuk.
Häp tä mälhyejtso yämlek lhayäm matche Dios lhämet tä ihi Lehi tä yok:
“Hiw'en lhamhomche ow'uyis,
wet ikoyejpe suerte häp ow'uy tä n'oyik.”#Sal 22.18
Häp täjtso m'ak tä iwoye sip'äl.
25Wet Jesús lako iwhäye cruz tä lham ihi, lhäy'e Jesús lako ch'inhä, lhäy'e María tä Cleofás lech'efwa, lhäy'e María Magdalena. 26Tä Jesús hiw'en lako tä iwhäye lechufwenek tä lham wuj tä ihumin, tahuye lako wet yok:
–Atsinha, en äsa täjtsi.
27Wet nech'e äp tahuye lechufwenek wet yok:
–En akoya täjtsi.
Wet tälhe ifwalatso Jesús lechufwenektso ihän lew'ete María wet t'uye.
Jesús y'il
(Mat 27.45-56; Mar 15.33-41; Luc 23.44-49)
28Tä tajyäme täjtso, tä Jesús ihanej tä nech'e wak'alh nilhokej m'ak tä iwoye, wet yok:
–Ochim.
Iwoyetso yämlek lhayäm matche Dios lhämet p'ante ihi Lehi.#Sal 69.21
29Wet iche n'olhäthi tä vino tä tapay tapoyej tä ihi. Wet õy'uytho esponja häp vinotso wet õyäytej hal'ä tä lhey hisopo lhachafwaj tä lew'ole ihi, wet õ'tiye lak'aj. 30Wet Jesús hits'uhi, wet yok:
–Nilhokej wak'alh t'at.
Tä iwoyetso, wet lhetek ifwuhchä wet y'il.
Sip'ä itshänejo lehun häp Jesús lesulak
31Häpe ifwala tä tumejlä ifwala tä n'ot'elakw'et, wet niyatey tä Judío lhayis ihuminhit'a chik n'op'itseyhay kamaj ihiche cruces pajtha ifwala elh. Tsi ifwala tä n'ot'elakw'ettso yiwete ifwala tä Pascua wet häp tä lhäy'e lhip tä õyen t'amajcheta. Häp tä tamenej tä lhamel ihoye Pilato wet yok:
–Is chik lene'tek õ'näksen takäläy häp hin'ol tä ihiche cruces wet õ'hänej kanhi.
32Tä mälhyejtso, Pilato ichen sip'äl. Tä lhamel nichäte, wet inäksen takäläy hin'o tä ichun tä ihi cruz, wet äp hip'ajtej elh tä tumej lhip elh Jesús. 33Mat tä nichäte Jesús, wet hiw'en tä pajche y'il t'at, wet tek inäksen takäläy.
34Matkat elh sip'ä itshänejo lehun häp Jesús lesulak, wet lew'oyis lhäy'e inät tälho. 35Elh tä hiw'enej täjtso häp tä yen lhämeta, wet matche t'at lhämet, lham ihanej tä matche, häpkhilek häte amel lechayaye. 36Tsi mälhyejentso m'ayhay yämthilek lhayäm matche Dios lhämet tä ihi Lehi tä yok, “Õ'näk'äsit'ala elh lhiley.”#Éx 12.46; Núm 9.12; Sal 34.20; 1~Cor 5.7 37Wet Dios lhämet lhip elh yok, “Lhamel iyahnhila t'at häp elh tä itshänho.”#Zac 12.10; Apoc 1.7
Õ'tihi n'op'itsekw'et Jesús
(Mat 27.57-61; Mar 15.42-47; Luc 23.50-56)
38Iche p'ante hin'o tä lhey José tä tälhe hupuy tä Arimatea. Lham häpe elh tä yen lehäneka Jesús, mat weskatej t'at tsi nowaye niyatey iyhäj tä Judío lhayis. Lham ihoye Pilato wet yok:
–Wahin n'oyej Jesús lep'itsek.
Wet Pilato yok:
–Is, mäye t'at.
Wet José yike wet ichäj. 39Häte näm Nicodemo, häp hin'o tä ihoye p'ante honajche häp Jesús tä yämhoplhi.#Juan 3.1-2 Lham ichäje Jesús lep'itsek treinta kilos m'ak tä lenij akäjche, häp mirra tä õ'kasoyej áloe. 40Wet José lhäy'e Nicodemo tachuma wesas wet ikäfwlejche Jesús lep'itsek wet y'isej m'ak tä lenij akäjche, mälhyej m'ak tä Judío lhayis lakey tä tajänch'oye elh tä y'il. 41Wet iche p'ante n'olafwek tä iwhäye lew'et tä õhp'ajtej cruz häp Jesús, wet ihi n'olafwektso iche n'op'itsekw'et tä kamaj niwohit n'op'itsek chik õ'thatho, tsi nech'ayek t'at. 42Wet häp tä lhamel itihi Jesús lep'itsek, tsi atofwiyet'a, lhäy'e tä tatäy lhimphaj wet iwo tesa häp ifwala tä Judío lhayis t'elakw'et.
Currently Selected:
Juan 19: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.